Read Vaiphei NASEPTE 5 Bible Online

NASEPTE 5 - Vaiphei bible

NASEPTE 5

¹Himaleh, mi khat a min Anania chun, a ji Saphira tawh kithutuak in a thil nei uh a zuak un,

²a ji hetpi in, a man hun tiang chu a îmgu ta’n, bang a hem jat bep a hun chawi ah, apostolte keng bulin a hung koi ta’n.

³Peter chun, “Ananiah, Thagau Thiangtho thêm ding leh gam zok man hun tiang chu îm ding ah, bang ziak ah Setan in la lungthim hi’dim a hem?

⁴Zokdaw ahi masang ah chun nang â hilo a hem? Zokdaw ahi’nung inle a man chu nang thu thu hilo a hem? Bangatia, la lungthim ah zia thil hi gêlgu la hem? Kei uh ei thêm la hipua’n, Pathian thêm la hizawi,” a ti’n.

⁵Ananiah in zia thute chu a het phat in, a kipûk ah a thi tai. A la he zosia chu launa’n a dim tau a.

⁶Tangvalte chu a hung ua, a luang chu a tuam un, a pawdok ua, a vavui tau a.

⁷Ziazaw dâkkâl thum ding vêl nung ah chun, a ji chu bangma chanchin helo in a hung lut a.

⁸Peter chun a kiang in, “Gam chu zia jat ah chu la khot uh ahi em ei hil tia,” a ti’n. Amanu chun, “I, zia jat man chu ahi,” a ti’n.

⁹Ziaphatchun, Peter in a kiang in, “Bangtidan ah, Lalpa Thagau thêm ding ah hung kithu gual ziang la hiu em? Entia, la pawsal vuite keng chu kotkhak bul a hung tung tau hi, nang le hun jawndok ding a hitau hi,” a tia.

¹⁰Ziazaw zaw ah chun amanu chu a kengbul ah chun a kipûk ah, a thi ngal tai. Tangvalte chu a hung lut phat un, amanu chu a thisa’n a mu tau a; tichun, a jawndok ua, a pawsal kiang in a vavui tau a.

¹¹Kochuamte haw zosia leh zia thu he zosiate chu launa’n a dim tau hi.

¹²Chun, mipite lak ah chun, apostolte khut in tepte’nate leh thilmakte tam tak bawl in a um a. Amau chu a leng un Solomon Hulliap ah chun a um khawm ua.

¹³A dangte chun a vabêl ziang ngam ta puau ah; himaleh, mipite chun amau chu a ngaisâng ma mau hi.

¹⁴Himaleh, Lalpa â ding ah mihing kibelap chu ni dang sâng in a nasa zaw ma ma tai; numei leh pawsal tam tak a hitau hi.

¹⁵Tichun, Peter a hung phat leh, a lîm bêk in a lia khâk ding ti’n, damlote chu khawlai ah chun a pawdok un, lupnate leh phêk chung in a sial un.

¹⁶Jerusalem kîmvêl ah khuate ah kipat chunle, mipite a hung khawm ua, damlote leh thitha buak vopte a hun pui ua; amau chu sukdam in a um chiat tau hi.

¹⁷Ziaphatchun, thiampu lianpen leh a umpite chu (ziate chu, Sadukai pawlte a hiu) a hung kipan tau ah, itsikna dim in,

¹⁸apostolte chu a man ua, vantang khumna suangkul ah chun a khum tau a.

¹⁹Himaleh, jan kâl in Lalpa vansawlchâk chun suangkul kotkhak chu a hung hon piak ah, a puidok ah, a kiang un,

²⁰“Chiau in, tempul ah vading unla, mipite kiang ah chun zia hinna thu hi vagen un,” a ti’n.

²¹Zia chu a het phat un, phalvak ah chun tempul sung ah valût in, a thuhil uh chu a sunzom tau a. Thiampu lianpen leh a umpite chu a hung tun phat un, vaihawm pawlte leh Israel upate chu a ko khawm ua, suangkul ah kipat vapuidok dingin mi a sawl tau a.

²²Himaleh, tempul mimante a vachia phat un, suangkul sung ah chun a vamu ta puau ah; tichun, hung vaikit in,

²³“Suangkul chu det tak in a kikam ah; a vêngte le kot bulin a ding zing un; himaleh, ka vak hon ua leh, a sung in kuama ka mu ta puau hi,” a tiu a.

²⁴Tempul hotu leh thiampu lalte chun zia thute chu a het phat un, amau chu a lungkhampi ma ma ziang tau ah; bang gual thil hung um ahi tam ti a lungkham un.

²⁵Chun, mi pakhat a hung lut ah a kiang un, “En tiam un, suangkul ah la khumteu kha tempul ah ding in mipite thu a hil ui,” a hung ti’n.

²⁶Ziaphatchun, hotulianpa chun tempul mimante chu pui in, mipite’n suang ah a se’khak diu a lau ziak un, khut vang a tha puau hi.

²⁷A hung pui lût phat un, vaihawm pawlte âng in a dinsak ua. Thiampu lianpen chun amau chu a dong a:

²⁸“Zia min ah hin thu gen lo dingin thu khau tak ka hun pia tau in; himaleh, la thuhil uh hin Jerusalem sung la sudim tau ah, zia pa thisan maw chu ka chung ua but gua ham ham la hiu maw!” a ti’n.

²⁹Himaleh, Peter leh apostolte chun a dawnhuu a, “Mihing thuneina sâng ah Pathian thu ka mat zawk diu ahi.

³⁰Jesu, thinglêk ah la khaikâng ua la thau kha, I pu leh pateu Pathian in a kaitho tai.

³¹Ama chun Israelte kiang ah lungheina leh gitlo ngaidamna a piak theina dingin, Pathian in Lalpa leh Hukdampa hiding in a khut changlam in a chawisâng tai.

³²Chuleh, kei uh hi tawh, Pathian in a thu awite kiang ah a piak, Thagau Thiangtho chu, zia thilte hiatpite ka hiu hi,” a tiu a.

³³Zia thu chu a het phat un, a siat uh a hung so ah, amau chu tha a gua tau a.

³⁴Himaleh, vaihawm pawl lak ah Pharisai pakhat, a min Gamaliel, dan lam ah hotu, mi zosia’n a ja uh chu a hung dingdok ah, zia mite chu chomkhat In mai lam ah va-umsak dingin thu a pia.

³⁵Chuleh, a kiang un, “Israel ka chanpite haw, zia mite chung ah la thilhi guat uh hi pilvâng tak in gêl tau in.

³⁶Tu’ma lam deu khan Theuda a hung kipan ah, mi khat ka hi, hung kiti’n mi tam tak, za li vel in a la zui un; himaleh, ama chu tha in a hung um ah, ama zuite zosia chule thejak ah um in, a kisêlmang zo tau hi.

³⁷Ama nung ah chun, Galili mi Juda kha kisimpi lai tak in a hung kipan ah, ama zui ding mi tam tak a kimu ah; ama chule a hung mangthai ta’n, a nungzui zosia le sukchek in a um tau hi.

³⁸Tu’hun thil thu ah hinle, ka hun hil la hiu, zia mite ah kipat hin kikoi kâng unla, a um um un umsak un; a ziak chu, zia a thil guanggal uh leh patdawu hi mihing ah kipat ahi chun, lawsam ding ahi;

³⁹ahi’n la, Pathian ah kipan ahileh vang, nang un amau chu zo thei pua’n lau; chutitaleh, Pathian tawh kido hung hi’khawlaw nalai ding la hiu!” a ti’n. Ama thugen chu dik a sa chiat tau a.

⁴⁰Apostolte chu a ko lut kit ua, a vua tau a. Chun, Jesu min ah thugen lo dingin thu a piau ah, a thâdok tau hi.

⁴¹Vaihawm pawlte lak ah kipat a pawt daw phat un, zia min ziak ah mualphona thuak tâk ah ngai a hiziak ua chun, a kipak ma mau a.

⁴²Nisi’n leh tempul leh In tin ah Jesu chu Messiah ahi, ti thu a hil uh leh puanjak chu a chawl diak puau hi.