Read Vaiphei NASEPTE 6 Bible Online

NASEPTE 6 - Vaiphei bible

NASEPTE 6

¹Nungzuite chu a hung tam deu deu phat un, a nisi’n an hawmnau ah a meithâiteu a ngaisak zaw lo ziak un, Grikpau mangte chu Hebraite chung in a hung phun tau a.

²Sawm leh nite chun nungzuite zosia chu a ko khawm un a kiang un, “Kei un Pathian thu genna ngainêp hial ah dawkân ka ngâk ding uh chu a dik puai;

³Ziaziakchun, suapite haw, la lak ua mi minpha pasagi, Thagau leh pilna ah dim chiat hun têldok unla, amau chu zia nasem ding ah hin hun namdet ing kau.

⁴Kei uh ka hiu leh, pauchapnate leh thu nasepna’n kipia’ng kau,” a tiu a.

⁵A thu gen uh chu a leng un pha a sau a; tichun, ginna leh Thagau Thiangtho ah dim, Stephen, Philip, Prokora, Nikanor, Timon, Parmena leh Antiok ah Juda phungkâi Nikolai, amau cheng chu a têldok tau a.

⁶Ziate chu apostolte ma’n a din sak ua, amau chu a pauchap ua, a chung un khut a nga tau a.

⁷Pathian thu chu a kizak jel ah; Jerusalem ah nungzuite chu nasa tak in a pung tau ah; thiampute tam tak inle ginna chu a pom tau hi.

⁸Chun, Stephen, hepina leh thilhitheina ah dim chun, mipite lak ah chun thilmak leh tepte’na thupi takte a bawl a.

⁹Ziaphatchun, lawi khat, Zalente sunagog (zia gual ah chu a ti sek uh ahi’n) ah kipat khenkhat, Kurini khua mite, Aleksandria mite leh Kilikia leh Asia gam ah mite chu a hung kipan ua, Stephen chu a hun kinialpi tau a.

¹⁰Himaleh, pilna leh Thagau ah thu a gen chu a nial dong thei him him puau a.

¹¹Ziaphatchun, mi khenkhat, “Mosi leh Pathian a gensiatna thuu ka hia’i,” ti dingin a golgu tau a.

¹²Tichun, mipi leh upate leh lekhazikte chu a hun tîlsia tau a; chun, ama chu a hung man ua, vaihawmte ma ah a hun pui lût tau a.

¹³Hiatpitu lêm a hung dinsak kawm ua, “Zia pa hin, zia munthiangtho hi tawh Dan chu chawl lo in a gensia’n;

¹⁴Nazareth Jesu’n zia mun hi hun susia’n tin, Mosi ei piak chawndante le hun sudanglam ding ahi, a ti ka hiau hi,” a tiu a.

¹⁵Vaihawmna kichu zosia chun ama chu a hun ensâl tau ah; ahi’n, a mâi chu vansawlchâk mai tawhbang in a hun mu tau hi.