Read Vaiphei NASEPTE 8 Bible Online

NASEPTE 8 - Vaiphei bible

NASEPTE 8

¹Zia ni chun, Jerusalem ah kochuamte chung in sukgentheina nasa tak a hung kipan ta’n, apostolte tilo ngal chu a leng un Judea leh Samaria gam pâmlam te tiang ah naw jak in a um tau a.

²Pathian ngaisak lawi khat chun, Stephen luang chu a vui un, ngai tak in a sûn tau hi.

³Ahi’n, Saul chu intin ah lut in; numei, pawsal hitaleh a kaidok ah, suangkul in a khum pek ah, kochuamte chu a sugenthei ma ma tai.

⁴A taijakte chu mun tin in a chia tau a, thu chu a puang jak pek un.

⁵Philip chu Samaria khawpi’n a vachia suk ah, a kiang un Messiah thu chu a tângkopi ta’n.

⁶Philip thugen chu zia tak ah mipite chun kithu gual tak in a ngaithau ah, a thugente chu hia’n, a thilmak bawlte chu a muu a.

⁷Thitha buakte chule, aw ngai tak tak ah kiko jak in a lutnateu ah kipat chun a pawtdok ua; zeng tam takte leh kengbai tam takte le sukdam in a um un,

⁸zia khawpi chun kipakna nasa tak a tung tai.

⁹Himaleh, zia khawte lak ah chun mi pakhat a min Simon kiti a um a. Ama chun tu’ma sia mitvaidawi mang in Samaria mite chu a thêm sek a, milian tak gual in a kisiam a.

¹⁰“Zia pa hi Pathian thihitheina thupi tak chawi milian ahi,” a tiu ah, a lian a neu chun a la ngaisân ma ma sek uh a la hia.

¹¹Zia gual ah chun hun sawt tak chu, a mitvaidawi chu mang in mi ngaisân tak in a la um a.

¹²Himaleh, Philip thugen, Jesu Khrista min leh Pathian gam thu a gente chu a hun gin phat un, a numei a pawsal in baptisma a chang chiat tau a.

¹³Zia Simon ngei chunle a hun ging ta’n; baptisma a hun chan phat in, Philip mang ah thilmak kibawlte leh tepte’na kibawlte chu ngaitua kawm in, a kiang ah chun a um zing in, mak a sa thei ma mau a.

¹⁴Jerusalem khua um sawlchâkte chun, Samaria gam ah mite chunle Pathian thu a hun awi tau hi ti a hun het phat un, a kiang un Peter leh Johan a hun sawl tau a.

¹⁵Amau chu a hung suk un, Thagau Thiangtho a chan theina ding un a hung pauchap piak ua.

¹⁶(Amau haw chu Lalpa Jesu min bep ah baptisma chang ahi nâklai ziak un, Thagau chu a chung un a tung kha naipua’n.)

¹⁷Tichun, a chung un a khut uh a ngau ah, Thagau Thiangtho chu a chang tau a.

¹⁸Simon chun, apostolte khut ngat ziakin Thagau Thiangtho piak in a um thei hi, ti a mu phât ah chun,

¹⁹“Keima’nle mi chung ah ka khut ka ngak ah, Thagau Thiangtho a nei theina ding un, zia thilhitheina chu keima le ei piau in,” ti’n dangka piak dingin a don a.

²⁰Himaleh, Peter chun a kiang in, “La dangka tawh mangthai khawm ta’n, Pathian thilthawnpiak chu dangka sum ah chawk thaw ding la guat ziakin.

²¹Zia chung thu ah hin bangma chan nei pua’n la tin, pannale nei diak pua’n la; la lungthim chu Pathian mit mu’n a dik pawngal a.

²²Ziaziakchun, zia la gitlona hi kisik inla, la lungthim ngaituana gilo hi a hun ngaidam thei khâk leh, Pathian kiang in pauchap ta’n.

²³Ênna’n la dim ah, gitlona kol ah tâng la hi ti ka he ngal a,” a tia.

²⁴Simon in, “La thil gen uh bangma ka chung ah a tun lona dingin, nang un Lalpa kiang in ei pauchap piak un,” a tia.

²⁵Chun, amau chun Lalpa thu chu a hiatsak ua, a gen zaw phat ua chun Jerusalem khua a chia kit un; Samaria gam ah mite khua tam tak in chanchinpha a gen pek ui.

²⁶Ziaphatchun, Lalpa vansawlchâk pakhat hin Philip kiang in, “Kipan in la, gamkeu ah lampi, Jerusalem ah kipat Gaza lam zotna simlam zuan ah kithung kha zui in,” a ti’n.

²⁷Tichun a kipan ah, a chia ah; zia lampi chun, Ethiopia lengnu Kandaki nuai ah nasem mi lal tak khat, Ethiopia mi kiget, lengnu vaihawmna a go zosia enkolpa chu, Jerusalem ah Pathian ho ding ah hung,

²⁸a kile’kit lam ahi’n, a kângtalai chung ah chuang in jawlnei Isai lekhabu a hun sim malam pek a.

²⁹Thagau in Philip kiang ah chun, “Chia inla, a kângtalai ah sawn nang le vachuang in,” a ti’n.

³⁰Philip le kin tak in a tai to ah, jawlnei Isai lekhabu a sim chu a hia’n, a kiang in, “La lekha sim chu a thu umzia la hethiam em?” a ti’n.

³¹Ama chun, “Mi ei hilchian piak umlo in bangti’n hethiam thei ding ka hem?” a tia. Tichun, Philip chu a kiang ah chuang dingin a ko a.

³²Pathian lekha thu a simna chu zia hi ahi’n: “Ama chu belam gual ah tha ding ah pui in a um in; belamno a mulmêtpa ma’ a thip hiat hiat gual in, ama’nle a kam a ka puai.

³³Musit ah a um lai in a chung ah thu dik chu pom ahi puai. A suan khanggui thu kua a hem gen ta ding? Khawvel ah kipat in a hinna a lâkpiak tangal un,” ti hi.

³⁴Mi kigetpa chun Philip kiang in, “Zia tak ah jawlnei in a gen hi kua a genna a hem? Ama leh ama kigen ahi diam? Ahiloleh midang a genna ahi diam?” a ti’n.

³⁵Ziaphatchun Philip in, zia Lekha thu ah kipat chun Jesu chanchin chu a hun gen ta.

³⁶A kiton pek lai ua chun lui pakhat a tung ua, mi kigetpa chun, “Entia, zia tak ah hin tui a um hi, baptisma ka channa ding bang ei dâl a um em?” a hun ti’n.

³⁷Ziaphatchun, Philip in, “La lunggil zosia’ la gin leh chang thei inla,” a tia. Chun, ama chun a hun dawnhu a, “Jesu Khrista chu Pathian Chapa ahi, ti ka ging hi,” a tia.

³⁸Tichun, a kângtalai chu a cholsak ah; Philip leh mi kigetpa chu a paniu in tui umna chun a chiau a; Philip in ama chu a baptis tai.

³⁹Lui ah kipat a hung pawtdaw phat un, Lalpa Thagau chun Philip chu a lamang ta’n, zia mi kigetpa chun ama chu a mu ta puai; chuleh, ama chu kipak tak in a chia kit tai.

⁴⁰Himaleh, Philip chu Azota khua mu in a um kit a; khawpi chuam chuam in thu a gen vêl vêl ah, Kaisaria tiang in a hung pek hi.