Read Vaiphei NASEPTE 9 Bible Online

NASEPTE 9 - Vaiphei bible

NASEPTE 9

¹Saul chun vang Lalpa nungzuite vau ah thalup a guat dan a gen zing ah; thiampu lianpen kiang in a chia a,

²Damaska khua kikhopna In zosia ah mite kiang ah piak dingin lekha a vadon a; kuale Lampi zui taphotte chu numei hi’n pawsal hileu, Jerusalem khua lam ah kântomsa a hun pui theina dingin lekha a vala.

³Tichun, a chia pek ah, Damaska khua daikiang a hun pha ta’n; thakhat in van ah kipat vak hât tak hin a hun khaw a;

⁴leitual in a kipuk ta’n; zia lai tak ah chun aw khat in a kiang in, “Saul, Saul, bangatia ei sugenthei la hem?” a hun tia.

⁵Ama chun, “Lalpa, kua la hi em?” a tia. Lalpa chun, “Nang in la sukgenthei Jesu chu ka hi.

⁶Tho inla, khawpi sung ah lût in, la sep ding a la gen in au,” ti’n a hun dawnhu a.

⁷Ahi’n, a khualzinpite chu pau lo hial in a la ding zing un; aw chu a hiau ah, kuama chu vang a mu puau hi.

⁸Saul chu leitual ah kipat a hung thodok ah, a mit a hun têt kit leh, kuama a mu thei ta puai; tichun, a khut in a kaibât un, Damaska khua chu a pui lût tau hi.

⁹Ni thum sung chu khuale mu lo, bang male ne lo leh dawn lo in a um tai.

¹⁰Damaska khua chun Jesu nungzui pakhat, a min Ananiah kiti a um ah. A kiang in Lalpa a vakilâk a: “Anania,” a vati’n. Ama chun, “Lalpa, zia hin ka um hi,” a ti’n.

¹¹Lalpa chun a kiang in, “Kipan inla, Kotzing Zang kiti khan chia inla, Juda In ah Tarsa mi Saul kha vahawldok in; ngai in, a pauchap lai tak ahi,

¹²ama chun, mang lam tawhbang in Ananiah chu a kiang ah hung in, khua a mutheina ding ah a chung ah khut nga’n a la mu zo ta ahi,” a hun ti’n.

¹³Ananiah chun, “Zia pa hin Jerusalem khua la mithiangthote bang gual bep ah a la bawlsia ahi tam ti thu, mi tam tak in ei hilnau ka la he ta hen;

¹⁴zia lam ah hinle la min lam tapote kântom ding ah thiampu lalte phalna nei ah hung ei ve!” ti’n a dawnhu a.

¹⁵Himaleh, Lalpa chun a kiang in, “Chia mai in; ama hi Jentelte leh lalte tawh Israel chate kiang ah ka min pawlut ding ah matchâk ding ah ka têl ahi;

¹⁶ka min ziak ah bang gual gentheina a hem a thok ding, a kiang in hun hiatsak ding ka hi,” ti’n a dawnhu a.

¹⁷Ziaphatchun, Ananiah le a chia ta’n, In ah chun a lut a; a chung in a khut a nga ngal ah, “Unaupa Saul, Lalpa Jesu ngei la hungna lampi la kiang ah hung kilâkpa khan, khua la mutheina ding leh Thagau Thiangtho ah la hung dim theina dingin ei sawl ka hi,” a ti’n.

¹⁸Ziaphatchun, a mit ah kipat in phulip tawhbang a hung ketha’n, tichun, khua a hun muthei tai. A hung thodok ah, baptisma a chang ngal a;

¹⁹an a ne, a hung hat tai. Zia nung ah chun, Saul chu Damaska khua nungzui umte kiang ah chun ni bang jat a hem a châm tai.

²⁰Zia kipat chun kikhopna In ah, “Jesu chu Pathian Chapa ahi,” ti thu a hun gen pan ngal a.

²¹Himaleh, ama thugen hekha zosia chun mak a sau a, “Zia pa hi zia min susepa kha hilo a hem? Zia tak ah hile zia gual mite chu hung man ah, kântomsa thiampu lalte kiang ah pui ding ah hung kha hilo a hem?” a tiu a.

²²Himaleh, Saul chu a hung hat deu deu ah, Jesu chu Messiah ahi ngei nai, ti thu chu puang in Damaska khua Juda umte chu a nial dong tai.

²³Ni bang jat a hem nung ah chun, Judate chun ama tha theina ding a hun ngaitua pan tau a;

²⁴ahi’n, a thiltup uh chu Saul in a la he ta’n. Amau haw chun a thatheina ding un, kul kotkhak zosia chu a sûn a jan in a châng tau a;

²⁵himaleh, a nungzuite chun jan kâl in a puidok ua, bawm in kulbâng pawlam ah chun a khaitha tau hi.

²⁶Saul chu Jerusalem khua a tun phatin, apostolte chu vakipawlpi a gua; amau haw chun nungzui hiding ah a ginchâk lo ziak un a la lau tau a.

²⁷Himaleh, Barnaba chun Saul chu a pui ah, apostolte kiang ah chun a pui lût ah, lamkâl ah Lalpa a mudan leh a kiang ah a thugente chu kichian tak in a gen leh, Damaska khua hangsan tak ah Jesu min ah thu a gendante a hiatsak a.

²⁸Ziaphatchun, a lak ua lut leh pawt in, Jerusalem ah chun a um ah, hangsan tak in Lalpa min in thu a gen tai;

²⁹Grik mite haw tawh le a kinial sek un; himaleh, ama chu tha a hun gua zaw tau a.

³⁰Unaute chun zia chu a het phat un, Saul chu Kaisaria lam in a pui ua, Tarsa lam in a sawl mang tau ahi.

³¹Zia hun sung ah chun, kochuamte chu Judea, Galili, Samaria gam ah chun muang tak ah um in a det tau hi. Lalpa lau kawm in Thagau Thiangtho thamuan in a um un, a pung deu deu tau hi.

³²Peter chu gingtute lak ah a zin vêl vêl lai in, Ludda khua mi thiangthote kiang ah chun a hung suk a.

³³Zia tak ah chun mi pakhat a min Ainia a tiu chu, kum giat sung hial zeng ah damlo in a la lum ta’n.

³⁴Peter chun a kiang in, “Ainia, Jesu Khrista’n a hun hi’dam tai, hung thodok inla, la puanpha chu jialdok ta’n,” a tia. Ziaphat ah chun a hung thodok phut ziang tai.

³⁵Ludda leh Sharon khua umte zosia chun ama chu a muu ah, Lalpa lam in a hung kihei tau hi.

³⁶Joppa khua chun nungzui pakhat, a min, Tabitha kiti a um a: Zia chu Grik pau ah Dorka ahi’n. Ama thilpha bawl leh thilpiak pha ah dim mi ahi.

³⁷Zia hun ah chun, a hung dam pua’n, a hung thi tai. A sil zaw phat un, pindan chungnung lam in a lup sak un.

³⁸Ludda khua chu Joppa khua kiang ahiziak in, nungzuite’n Peter zia tak ah chun a um hi ti a hiau a, “Sawt dâng lo in ka kiang un hung in,” tia vako dingin mi pani a sawl tau a.

³⁹Tichun, Peter le a kipan ah, a zui ngal ah; a tun phatin pindan chungnung lam ah chun a pui to pai tau a. Meithâite zosia chu a kiang ah dingin a la kap un, Dorka chun a dam lai ah amau â ding ah a puanâk leh puan a bawlpiakte chu a la etsak ua.

⁴⁰Himaleh, Peter in amau haw chu a sawldok sik sek ah, a khupdin ah, a pauchap a. A luang umna lam chu a hun nga, “Tabitha, hung tho ta’n,” a hun tia. Ziaphatchun, a mit a hun te’, Peter a hun mu phât in, a hung kitungdok tai.

⁴¹A khut a vak pia, a hun kaitho tai. Mi thiangthote leh meithâite chu a hun ko ah, dam tak in amau kiang ah chun a hun puidok tai.

⁴²Zia thu chu Joppa khua sung zosia in a kithang ah; mi tam tak in Lalpa a hun ging tau hi.

⁴³Peter chu savun siampa Simon In ah pansa’n, Joppa khua chun ni tam tak a châm tai.