Read Vaiphei ROMTE 10 Bible Online

ROMTE 10 - Vaiphei bible

ROMTE 10

¹Suapite, amau â ding ah ka lungtup pen leh ka pauchapna pen chu, hukdam ah a umna ding uh ahi pen hi.

²Pathian â ding ah phatchuam ngaina chu a nei ui ti vang ka hia’i; himaleh, hetna dungzui in vang ahi puai.

³Pathian ah kipat dikna ngaisak lo in, amau dikna bep sukdetna ding hawl in, Pathian dikna chun a kipelut diak puau hi.

⁴Kuale a ging tapo chun Pathian dikna chu a chan theina ding un, Khrista chu dan suktawpna a hung hita ahi.

⁵Dan lam ah dikna thu ah chun, Mosi’n zia gual hin a la zik a: “Mi zia thil hi’taphot chu, zia ma ah chun hing in a,” a la tia.

⁶Himaleh, ginna ah dikna lam thu ah chun zia gual hin a kigen ah, “Van ah kua kal to ding a hia hem?” (Zia chu Khrista hang pui tha ding ti’na ahi) ti’n la lungthim unle ti kiu in.

⁷Ahiloleh, “Kua mithikhua chia suk ding a hem?” (Zia chu mithi lak ah kipat Khrista pui to kit ding ti’na ahi) ti kiu in, ti in.

⁸Himaleh, bang a hem a gen chu? “Thu chu la kam leh la lungchang ah chun, naicha’n a um hi; zia chu ginna thu, ka gen sek uh hi ahi”. (Zia chu, a thu ka taklat sek uh chu ahi;)

⁹la kam ngei in, “Jesu chu Lalpa ahi,” ti la puandaw ah, “Mithi lak ah kipat Pathian in a kaitho hi,” ti la lunggil ah la gin chun hukhin hiding la hi.

¹⁰Min lunggil ah a gin chun dikna a mu hen, kam in a puangdok ah, hukhinna a mu sek ui.

¹¹Pathian lekha thu chun, “Kuale ama ging chu mualpho pua’n a,” a ti’n.

¹²Judate leh Grikte kikâl ah bangma kikhiakna a um puai, Lalpa pakhat, mi zosia chung ah Lalpa ahi, a min lam tapote chung ah phatna a hau ngal a.

¹³Ziaziakchun, “Kuale Lalpa min lam tapo chu hukhin in um ding ahi”.

¹⁴Ahi’n la, a ginchâk lo uh chu bangti’n a lam diam uh? A thu a het lo uh chu bangti’n ging thei ding a hiu em? Thugen a umlo leh bangti’n a la hethei ding a hiu em?

¹⁵Sawl a hilo ua leh bangti’n thu gen thei ding a hiu em? “Chanchinpha hun tuntute keng chu a mêlpha na lawm lawm e!” ti zik gual ah khan.

¹⁶Himaleh, a leng un chanchinpha chu a taksang diak puau a, Isai chun, “Lalpa, kua’n ka thu gensawn uh a taksang awm?” a la ti gual ah khan.

¹⁷Tichun, ginna chu hetna ziakin a hung um ah, hetna chu Khrista thu kigen ziakin a hung um hi.

¹⁸Ahi’n la, a bil un a hepuau ah a hem? He e: “A thawm uh lei chung zosia’n a kithang in, a thuu chu kawl kîmvêl tiang in a thang suak tai,” ti ahi.

¹⁹Ahi’n la, Israel mite’n a hepuau ah a hem? “Nam ting ah genkhamlote hun thangsiatsak ing ka tin; nam mawlte chu mang in hun lungnatsak ding ka hi,” ti’n, Mosi’n a la gen masa pen hi.

²⁰Chun, Isai in hangsan tak in, “Ei hawllote mu in ka um a, ei kanlote chu ka kimusak tai,” ti in.

²¹Himaleh, Israel mite thu ah chun, “Thununglote leh nialhatte ziakin sun nitum in ka bân ka jak sek hi,” ti’n a la gen kit hi.