Read Vaiphei ROMTE 11 Bible Online

ROMTE 11 - Vaiphei bible

ROMTE 11

¹Ahileh, Pathian in a mite a pâmpai ta a hem? Pâmpai lo e. Keima ngei le Israel mi, Abraham suan, Benjamin nam ah mi ka hingal a.

²Pathian in a hetlawkte a hiziak un, a mite chu a pâmpai puai. Elijah khan Israel chung thu ah Pathian kiang ah thu a tutna thu, Pathian Lekhabu’n a gen kha helo la hiu em?

³Ama chun, “Lalpa, la jawlneite a that gam tau in, la mâichâmte a hichim zo tau a; keima bep hi ka um tai, keima hinna hile a hawl zing uh ahi,” ti in.

⁴Himaleh, Pathian in a hun dawnhuna kha bang a hem? “Baal ma-âng ah khiangkho kha nailo, mi sangsagi ka nei nalai hi,” a ti kha.

⁵Zia gual ma chun tu’hin le Pathian in a jangaina ziak ah mi a têlte khenkhat a um zing ui.

⁶Hepina ziak ahi chun thilhi ziak a hita puai; chutilochun hepina hi hepina hita lo ding ahi.

⁷Bangti’n a hita diam? Israel mite chun a hawl uh chu a mu ta puau hi. Têlte vang chun a muu ah, a dang zosia chu a ngong zo tau a;

⁸Pathian Lekhabu chun: “Pathian in tu’ni tiang in i-mut vuanna thagau a pia’n, muthei lona mitte tawh, hetthei lona bilte tawh,” ti zik gual in.

⁹Chuleh, David in, “A dawkân uh chu amau â dingin, thâng leh pial leh kipalna leh, thukkitna hihen la;

¹⁰khua a muthei lona ding un; a mit uh hung thûm hen; tichun, a ting uh kûlden ta hen,” a la ti tai.

¹¹Aleh, a pûkden ding ah kipalpai a hitau em? Hilo e; himaleh, amau pûkna ziakin Jentelte kiang in hukdamna a hung tung tai; tichun, Israelte chun a hun mitthîp theina ding un.

¹²Chutia, amau pûkna chu khawvel hausakna a hung hi ah; amau niamna chu Jentelte hausakna a hung hi kit chun, a bukimnau chu bang gual bep a hung hita diam?

¹³Tu’hin, nanghaw Jentelte kiang in ka gen ahi: Jentelte â ding ah sawlchâk ka hiziak in, keima nasep chu ka hun chawisâng ahi.

¹⁴Chutichun, ka chipite chu ka mitthîpsak ah, a lak ua mi khenkhatte bêk ka hukhin theina dingin.

¹⁵Amau haw pâmpai ah a umnau bawn, khawvel kituak theina a hung hi’chun, amau haw kilop lut kitna chu bang gual bep in thina pat hinna a hung hita bep diam!

¹⁶Chuleh, gamasa gual ah changbuang kilân chu a thiantho leh, a leng ah thiangtho ahi’n; a zung chu a thiantho leh a bâkte le a thiangtho ui.

¹⁷Chun, a bâk khenkhatte chu sâtthâk ah um in, nang gam Oliv chu amau zung ah kizom ah la um ah, Oliv thing phatna chu kikoppi la hi chun,

¹⁸a bâk chung ah chun kisathei kin. Nang a zung vâkpa la hi pua’n, a zung chu nang hun vâkpa ahi zawi.

¹⁹Keimau tawh ka kizop theina ding un, a bâk takte chu sâtthâk a hiu, la tizaw ding uh ahi.

²⁰Ahi, amau chu a ginlona ziak un sâtthâk in a um un, ziaziakchun nang uh chu ginna’n la hung ding thei uh ahi; tichun, kisathei kin la, lau zaw tau in.

²¹Pathian chun a bâk takte bawn a hoi lo chun, la kivên phat lo leh nang le hun hawi diak pua’n a.

²²Ziaziakchun, Pathian lau um dan leh a phatnate hi ngaitua phau in; a pûkte â dingin lau um tak ahi; ahi’n la, Pathian lungsiatna la chung un a um hi, a lungsiatna la um zing lo ua leh sâtthâk in um mai ding la hiu.

²³Chun, Israelte chule ginglo ah a um zing lo nâk ua leh, Pathian in a zop kit thei ngal a.

²⁴Nang, piandan ah oliv tak lo ah kipat sâtthâk ah um in, oliv thing tak ah zop ah la um chun, piandan ah a bâk tak takte hi amau oliv thing tak tak ah chun zop in um nalawm in au e!

²⁵Suapite haw, zia thugûk hi helo ah la um ding uh ka dawi puai, dan leh nangmau ngaidan mai in kipilsak kha tawl in lau; Jentelte bukimna a hung tun masia mu theilo dingin, zia tawhbang mitthûmna chu Israel lak ah khenkhatte chung ah le a um hi.

²⁶Tichun, Israel zosia chu hukhin in um in au: “Zion ah kipat in Tandokpa chu hung pawt intin, Jakob ah kipat in Pathian ngaisak lona chu sumang in a.

²⁷Chuleh, zia hi a kiang ua ka thuthung ding chu ahi: A gitlonateu chu ka lâkman tak leh,” ti zik gual in.

²⁸Chanchinpha lam thu ah chun, nangmau ziakin amau chu Pathian mêlma a hung hiphot un; himaleh têl hi’na lam thu ah chun, a pu le pateu jal in vang a doitakte a hiu hi.

²⁹Pathian in a thilthawnpiak leh a kona haw chu sukbei kit thei ahi puai.

³⁰Nidang lai ah khan Pathian ginglote la la hiu a, tu’hin amau ginlona ziakin a jangaina chu la chang thei tau ahi.

³¹Zia gual ah chun, nangmau ah a jangaina suklat ahiziak in, amau inle jangaina a mutheina ding un ginglo in a um tau hi.

³²Pathian chun mi zosia chung ah jangaina a neitheina dingin, mi zosia chu thumat lona ah chun a khum khawm suak ta ahi.

³³Pathian pilna leh hetna leh hau zia chu a thûkna lawm lawm e! A vaihawmnate chu hiat thei gual leh, a lampite chu sui thei gual a hi paw na e!

³⁴“Lalpa lunggil kua a hem hia? A lemguatpi ah kua a hem vapang?

³⁵Ahiloleh, kua a hem a mu kit ding ah thilpiak pesek?”

³⁶Ama ah kipat leh ama ziak leh, ama â ding ah thil zosia hung um ahi ngal ah; ama kiang ah chun kumtuang lopina chu um ta hen, Amen.