Read Vaiphei ROMTE 13 Bible Online

ROMTE 13 - Vaiphei bible

ROMTE 13

¹Mitin a chung ua thuneite thunuai in um chiat uh hen, Pathian ah kipat longal kuama thunei in a pang ngai puau hi; thuneite hi Pathian guat a hiu hi.

²Ziaziakchun, kuale a chung ah thuneite dodâl chu Pathian namdetna dodâl a hiu; zia gual ah dodâlte chun amau â ding ah thutanna kihawldaw bep in au.

³Vaihawmte hi thilpha bawlte â dingin lau um ahi puau ah, thil phalo bawlte â dingin vang a lau um ui. Ahileh, thuneite lau lo hial ah um la nuam em? thilpha chu bawl lechin pâkchâk law ding la hi.

⁴Amau chu nangma phatna ding ah Pathian nasem ah pang a hiu. Himaleh, thil gilo chu la bawl leh vang, lau mai in; ama chun chemjam chu a mawk choi ahi puai; ama chu Pathian nasêm ahiziak in, thil gilo bawlte chung ah lungnatna phuba la ding chu ahi ngal a.

⁵Ziaziakchun, lungnatna lau ziak bep hilo in, sia leh pha hetna ziak inle thuneite thunuai ah la um diu ahi.

⁶Ziaziak tak ah hin Sia le la pesek uh ahi. Zia thilte sêm ding ah chun Pathian nasem ahi ngal un.

⁷Mi zosia kiang in piak ding chu pia mai un; leiman piakna ding ah chun leiman piau inla; Sia piakna ding ah Sia piau inla, kichâk ding chu kichâu inla, ja ding dawl chu ja tau in.

⁸Kihepituana beplo chu kuama thil ba kiu in; midang hepitu chun dan chu a hi’bukim ahi.

⁹“Ângkawm kin, Tual that kin, Gu kin, Êng kin,” ti leh thupiak dang um nalai him himte hi, “Nangma la kihepi gual in la vêngte hepi in,” ti hin a khaikhawm suak tai.

¹⁰Hepina hin a Invêng siatna ding bangma a bawl puai; ziaziakchun, hepina hi Dan hi’bukimna ahi.

¹¹Tu’lai hun umdante hi la het ziak un, ipmu lai thawhal a hun tak zet tai, ti hia’i tiu; tu’hin chu I gin lim lai sâng ua khan I hukdamnau chu a naizaw tai;

¹²jan hi a bei vâng vâng ta’n, khua hung vâk ding ei tai; zia ziak chun, khawthim ah thilhite chu paitha’n vâkthuam in kithuam hitiu.

¹³Sûn ah khawsa gual ah pha tak in um hitiu; zudawn buai leh zukham ah umlo in, hûk leh kidoicha umlo in, kina’ leh kithangsia umlo in;

¹⁴Lalpa Jesu Khrista ah chun kithuam zawu inla, taksa utna te pitin dingin bangma bawl kiu in.