Read Vaiphei ROMTE 14 Bible Online

ROMTE 14 - Vaiphei bible

ROMTE 14

¹Ginna lam ah hat lo mi chu, la ngaidan thu mai ah kinialpi lo in, kipak tak in lop unla.

²Mi pakhat chun thil bangkim a nêkthei dingin a ngai thei ah; midang a jawngkhalte chun anche lohingte bep a nethei ui.

³A netheipa chun a nethei lo chu musitna’n nei ki’hen la, a nethei lo jawk chunle a nethei chu demsiatna’n nei diak ki’hen; Pathian in a pom tho ngal a.

⁴Midang suakte awimawpa chu kua la hem? A din leh a kilik chu a pu â ding ahi. Amau chu dinsak in um in au, Lalpa chun a dinsak thei ngal a.

⁵Mi khenkhat in ni khat hi nidang sâng in a ngai lopi diak sek ah; mi khenkhat in ni zosia hi kibang chiat in a ngai sek hi. Mi zosia amau lunggil in kihechian tau hen.

⁶Ni khat changtu chun Pathian lopina dingin a chang hi. Chuleh, a nepa chun Pathian kiang ah kipak thu gen in Lalpa lopina dingin a ne’n; a nelopa chunle Pathian kiang ah kipak thu gen in, Lalpa lopina ding ah nelo ahi.

⁷Kuama eima â ding bep ah hing I hi puau in, kuama eima â ding ah thi le I um diak puau hi.

⁸I hin unle Lalpa â ding ah hing I hiu a; I thiu leh le Lalpa â ding ah thi I hiu hi. I hin unle, I thi unle Lalpa â I hi zing ui.

⁹Khrista thi’na leh a hung thawkitna chu mi hing nalaite leh mithite Lalpa â a hi’theina ding ahi.

¹⁰Aleh, nang in bangatia la suapi chu gensia la hem? ahiloleh, bangatia la suapi chu musit ziang la hem? I leng un Pathian vaihawmna chutpha ma ah ding chiat ding I hingal un.

¹¹Lalpa chun, “Mi zosia ka ma-âng in bokkhup intiu in, lei zosia le Pathian pâkchâtna pia’n au, ti’n sia ka sam hi,” a tii, tia zik ahi ngal a.

¹²Chutichun, I leng un Pathian kiang in eimau umdan chiat kipuan ding I hiu.

¹³Ziaziakchun, kuama kigensia tua ta puai tiu; zia malak ah chun, kuama’n a suapi ma-âng in, pûkna thei a hem, kipalpâi theina ding a hem bawl piak lo dingin kivêng zawi tiu.

¹⁴Bangkim hi a thianglosa him him a um puai, ti hi Lalpa Jesu ah chun hiatsak in ka um hi ti ka hia’i; ahi’n la, min ama â ding ah thianglo ah a ngai chun, ama â dingin a thianglo a hi mai hi.

¹⁵Himaleh, la thil nêk ziakin la suapi a sukliam chun, hepina um talo la hi tai. Ama â ding ah Khrista thi ta, mi dang khat chu la thil nêk in manthai sak dâ hen.

¹⁶Chutichun, nang uh ding ah phatna chu a selam ah gen in um ki’hen.

¹⁷Pathian gam hi nêk leh dawn thu a hipua’n, Thagau Thiangtho ah dikna, thamuanna leh kipaknate a hizaw ngal in.

¹⁸Kuale zia gual ah Khrista nasêm ah pangte chu Pathian pom tâk a hiu in, mihing pâkchâk le a law sek ui.

¹⁹Ahi’n, midang tawh kichamna ding leh kisuk-hattuana ding thilte chu del hitiu.

²⁰La thil nêk ziakin Pathian nasep susia kin. Thil zosia chu a thiangtho in; himaleh, a thil nêk in mi a kiliksak chun a nepa â dingin diklo ahi.

²¹La sa nêk a hem, la zudawn a hem; ahiloleh, la thilbawl pakhat pen pen chun la suapi a kiliksak chun, zia chu thilpha ahi puai.

²²La ginna nei chu Pathian ma-âng in nang bep het in nei mai in. Ama phatsakna, thiamlo kichan lo mi chu mi hampha ahi.

²³Kuale ki-awimaw kawm kawm ah ne chun, ginna ah a nêk a hilo ziakin, thiamlo chang ahi ngal hi; ginna lo ah thil kibawl taphot chu gitlona ahi.