Read Vaiphei ROMTE 15 Bible Online

ROMTE 15 - Vaiphei bible

ROMTE 15

¹Eimau a hatte hin, eimau kipakna ding mai hawl lo in, a hatlote titlona chu I ngaithiam diu ahi.

²Mitin in, I Invêngteu sukkipakna ding hawl chiat in, amau suk-hatna dingin a phatna diu ngaituapi chiat hitiu.

³Khrista ngei inle ama kipakna ding mai a hawl pua’n; “Nangma hun hosiate hosiatna chu keima chung ah a chu tai,” ti zik gual ah khan.

⁴Pathian Lekha thu, ngilneina leh kitilkhona chung ah kinepna I nei thei zawkna ding un, malai ah thu a la kizikte kha, eimau kihilna ding ah zik a la hingal a.

⁵Tu’hin ngilneina leh thok-hatna Pathian chun, Khrista Jesu ah um lungthim gual hun putsak ta hen.

⁶I Lalpa Jesu Khrista Pa ngei Pathian chu lungthim munkhat leh kithu gual ah la hun suklopi theina ding un.

⁷Pathian lopina ding ah Khrista’n nangmau a hun lop gual in, nangmaule kiloptua chiat un.

⁸I pu leh pateu kiang ah thutiam chu sukdetna dingin, Pathian a thutak ziakin, Jesu Khrista chu zektante nasem a hung hi tai, ka ti ahi.

⁹A jangaina ziak ah, Jentelte’n Pathian a chawihoi theina ding un. “Ziaziakchun, Jentelte lak ah chun, chawihoi ing ka tin, La min pâk in La sa’ng ka,” ti zik gual ah khan.

¹⁰Chuleh, ama chun, “Nanghaw, Jentelte haw, a mipite tawh kipak tau in,” a la ti kit a.

¹¹Chuleh, “Nang uh Jentel mi zosiate haw, Lalpa chu pâk unla, nam zosia’n ama pâk tau hen,” a la ti kit ngen a.

¹²Zia ban ah chun, Isai inle, “Jesse zung jam ah chun mi pakhat, Jentelte vaihawm dingin hung dingdok intin; Jentelte chun, ama ah chun, kinepna hun nei ding a hiu,” a la ti kit a.

¹³Thagau Thiangtho thilhitheina ziak ah, kinepna la hau theina ding un, kinepna Pathian chun la gin ziak un kipakna leh thamuanna’n hun hi’dim ta hen.

¹⁴Ka suapite haw, nangmau in phatna leh hetnate la hau dan uh leh, nangmau leh nangmaule kikaihuai thei la hitau ti ka hechian hi.

¹⁵Himaleh, Pathian in ei piak hepina ziakin, nang uh hun hiatsak kitna dingin thu khenkhat chungchâng in hangsan tak in ka zik tai.

¹⁶Chanchinpha ah thiampu nasepna lam ah chun, Jentelte kiang ah Jesu Khrista nasêmpa ka hi’theina dingin; chutichun, Jentelte kipiakna chu pom tâk leh, Thagau Thiangtho ah sukthiantho a hitheina ding in.

¹⁷Tichun, Khrista Jesu ah chun, Pathian â ding ah ka nasep hi suan theina ding ka nei hi.

¹⁸Jentelte chu thu leh nasep ah thu awisakna ding ah, Khrista’n keima mang ah a sep tilo ngal chu gen pua’ng ka.

¹⁹Pathian Thagau thilhitheina leh, thilmakte leh tepte’na lopi takte chu mang in, Jerusalem ah kipat in Ilirikam leh a tuamvêl ah chun Khrista chanchinpha chu ka gen suak tai.

²⁰Mi suang lepsa chung ah insa bep ka hi’lona ding in, Khrista min puak lut nailonate kiang ah, chanchinpha gen suak têi chu ka tup ahi.

²¹“A chanchin kigen khâklonate chun hun hia’n tiu in; a hekha ngailote chunle hun hechian ta’n au,” ti zik gual ah khan.

²²Ziaziak hin ahi, la kiang ua ka hung ding hi dâl in a um sek.

²³Himaleh, tu’hin chu zia gam tuam ah sepna ding ah hin mun a um ta puai; chuleh, la kiang ua hung ding ka nuam ah, ka nopna hi kum tampi le a hita’n.

²⁴Spain gam ah ka chia tak leh, ka chia kawm ah nang uh hun mu ka kinem a. Nangmau hun pawl zet phot in, zia gam ah chia ding ah chun lei hung thak thei uh le ka kinem hi.

²⁵Ahi’n la, tu’hin chu Jerusalem lam ah mithiangthote ding ah panpina puak piak kawm in, chia ding ka hi.

²⁶Makedonia leh Akaia gam ah umte chun, Jerusalem ah mithiangtho umte lak ah a gentheite chu, a sum leh paiteu kikoppi a nuam un.

²⁷Zia a thilbawl uh chun amau a kipaksak ah, zia gual thil hi, chu a bat uh le ahi him a; Jentelte chun thagau lam ah a thil chanteu chu a hun kikoppi tâk ziak un, taksa lam thil ah amau tâksapnau a kithuapiu chu, a bawl ding dawl uh le ahi him hi.

²⁸Zia chu ka vahi zaw ah, a kiang ua piak ding zosia ka vapiak zaw phat leh, Spain gam zuan in nangmau kiang ah hung malam ing ka.

²⁹La kiang ua ka hung phat leh, Khrista maljawlna bukim tawh hung ding ka hi, ti ka hia’i.

³⁰Suapite haw, Lalpa Jesu Khrista jal leh, Thagau hepina jal ah chun, Pathian kiang ah phatchuamngai tak ah ei la pauchap piak dingin, titakzet in ka hun ni la hiu.

³¹Judea gam ah ginglote lak ah hukhin ka hitheina ding leh, Jerusalem ah mite â ding ah ka nasep hi mithiangthote â ding ah pom tâk a hitheina dingin.

³²Pathian lemsak dungzui ah kipak tak ah la kiang ua ka hung ah, la lak ua hi’hal ah ka umtheina ding in.

³³Thamuanna Pathian chu la leng ua kiang in um ta hen. Amen.