Read Vaiphei ROMTE 16 Bible Online

ROMTE 16 - Vaiphei bible

ROMTE 16

¹I suapinuu Phoibi, Kenkria khua kochuamte nasemnu hi, hun kimêlhiat sak ka nuam hi.

²Lalpa min ah mithiangthote chung ah hiding gual in la la lop theina ding uh leh, la panpiu a ngaina phot ah la panpi theina ding un; ama ngei inle mi tampi a la panpi ta’n, keima ngei le ei panpi sek hi.

³Khrista Jesu ah ka naseppite, Priska leh Akuila chibai ei la bûk piak un.

⁴Ka hinna ding ah amau hinna pe’ngamte a hiu hi; kei bep hilo in, Jentel kochuam pawl zosia’n le kipak thu a hun gen ui.

⁵Zia gual ma chun, a In ua kochuam kikhawm sek te khale chibai ka bûk hi. Asia gam ah gamasa Khrista gingtu, ka ngainat tak Epainetas khale chibai ei la bûk piak un.

⁶La lak ua sêmgim Mari khale chibai ei la bûk piak un.

⁷Ka chipi Andronika leh Junia, ka suangkul tânpite kha sawlchâkte lak ah minthang tak a hiu a, kei sâng ah Khrista ah um masate a hiu hi.

⁸Ampliatas Lalpa ah doitak khale chibai ei la bûk piak un.

⁹Khrista ah ka seppiu, Urbana leh ka doitak Stakhis kha chibai ei la bûk piak un.

¹⁰Khrista ah mi tak, Apelles kha tawh Aristobul chanaute lak ah mite khale chibai ei la bûk piak un.

¹¹Ka chanau Herodion kha chibai ei la bûk piak un. Narkisa chanaute lak ah Lalpa ah umte kha chibai ei la bûk piak un.

¹²Triphaina leh Triphosa, Lalpa nasêm gim sekte kha, chibai ei bûkpiak un. Doi tak Persis, Lalpa nasem, gim ma ma kha chibai ei la bûk piak un.

¹³Lalpa têldaw, Rufa leh a nu, kei â ding ah le ka nu kha, chibai ei la bûk piak un.

¹⁴Asinkrita, Phligon, Hermi, Petroba, Herma leh a kiang ua suapi umte kha tawh chibai ei la bûk piak un.

¹⁵Philologas leh Julia, Nirea leh a suapinu leh Olimpas leh a kiang ua mithiangtho um zosia kha chibai ei la bûk piak un.

¹⁶Kichawp thiangtho in chibai kibûk un. Khrista kochuam pawl zosia’n chibai a hun bûk ui.

¹⁷Suapite haw, nangmau thu kihilna tawh kikãl ah, kikhenna leh pûkna siamte chu vêngpha ding leh, kiheisan dingin ka don la hiu.

¹⁸Zia gual mite chun I Lalpau Khrista na chu a sêm puau in, amau gilpi na bep a sêm zawu hi; a kamthiam uh leh pâkchâkna thuteu chun, mi mawlte chu a thêm sek ui.

¹⁹La thu mat dan uh mi zosia lak in a kithang tangal a. Ziaziakchun, nangmau chung thu ah ka kipak hi; ahi’n, thilpha lam ah la pil ua, thil phalo lam ah la mawl uh ka dawi hi.

²⁰Tichun, chamna Pathian chun Setan chu la kengpêk nuai un chuan jawt vak ta’n a. Lalpa Khrista lungsiatna chu la kiang un um ta hen.

²¹Ka seppi Timothi leh ka chipite Lusia, Jason leh Sosipater te hin chibai a hun bûk ui.

²²Kei Tertia, zia lekha hun zikpa ngei hinle Lalpa min in chibai ka hun bûk hi.

²³Ka tunnapa Gaias leh kochuam pumpi hin chibai a hun bûk ui. Khawpi sumkolpa Erastas leh ka unaupau Kuartas hin chibai a hun bûk ui.

²⁴I Lalpau Jesu Khrista hepina la leng ua kiang in um ta hen. Amen

²⁵Tu’hin, ka chanchinpha gen leh, Jesu Khrista puanlat ah a umna dungzui leh, khang sawt tak puandaw lo ah a la um thugûk kilatdawna dungzui ah,

²⁶ahi’n la, tu’hun ah hung kipuangdok leh kumtuang Pathian thupiak dungzui ah, jawlneite’n lekha zik mang ah, ginna thuzopna um dawsak theina ding a ti, Jentelte kiang ah hiatsak ah um, a hun hi’hat thei Pathian —

²⁷Pathian pil pakhat bep kiang ah chun, Jesu Khrista jal in lopina chu kumtuang in um ta hen! Amen.