Read Vaiphei ROMTE 2 Bible Online

ROMTE 2 - Vaiphei bible

ROMTE 2

¹Ziaziakchun, Aw mihing, bang gual mi hiziang lechinle suanlam ding bangma la nei diak puai: Midang awimaw sek lechinle, nang in midang demsia zing sek in, nang inle zia tawhbang ma chun la bawl kit sek ngal a; ziaziakchun, nang in mi la demsiatna ma ma chun nangmale thiamlo la kichansak ahi.

²Ahi’n, zia tawhbang thil gilo bawlte chung ah chun Pathian in thutak in vai hun hawm ngei ngei ding ahi, ti I hiatsau ahi ngal a.

³Ziaziakchun, aw nang mihing, nangma zia gual thil bawlsekte awimaw sekpa chun, zia gual ma chu la bawl leh, Pathian vaihawmna chu pumpel diak dingin la kigingcha a hem?

⁴Ahiloleh, Pathian phatna, zaidawna leh thawk-hatna thûk zia chu musit ziang la hem? Pathian phatna chun lungheina dingin a hun pui huai zing hi ti helo la hem?

⁵La lung tâkna leh la gitlo khawk saklona ziakin, Pathian in dik tak ah a vaihawmna chu a hun puandaw phat leh, zia lungnatna ni ding ah lungnatna kikhol khawm mai hizaw ding la hi.

⁶Pathian chun mitin amau thilbawl dungzui chiat ah hun dit ding ahi ngal a.

⁷Kuale thilpha hi ah, dawthei tak ah umte chun, lopina leh choisânnate, thitheilona leh kumtuang hinna chu chang in au.

⁸Himaleh, amau lungawina ding bep hawl ah, thutak zawm nuam lo ah, diklona dan zawm zaw te chung ah chun a thangtawmna leh a lungnatna chu tung in a.

⁹Thil gilo bawlte chung in lunggimna leh beidonna Judate chung ah tung masa’n tin, ziazaw chuleh Jentelte chung ah tung in a;

¹⁰ahi’n la, thilpha bawlte chung ah chun lopinate, choisânnate leh thamuannate Judate chung ah tung masa’n tin, ziazaw chuleh Jentelte chung inle tung in a.

¹¹Pathian in mi doichuam a nei pawngal a.

¹²Dan pang lo ah gitlona bawlte chu dan pang lo ma’n mangthai in tiu in; chuleh, dan nuai ah gitlona bawlte chu dan dungzui ah vaihawm piak hiding a hiu.

¹³Dan hete mai chu Pathian ma ah thiamchang ahi puau in, dan gual ah bawlte chu thiamchang in um zaw’n au.

¹⁴Dan neilo Jentelte chun, dan dungzui in amau phatna ziakin thil a hi’thei un, dan neilo himaleu, amau ah chun dan pakhat a um hi, ti’na ahi.

¹⁵Amau lung sung ah dan kiziksa a um hi ti kilatna chu, sia leh pha hetna a nei ui; tichun, amau ngaituana chun a châng leh thiamlo a kichan un, a châng leh thiam a kichan kit sek ui.

¹⁶Ka chanchinpha gen gual ahin, zia ni phat chuleh, Pathian in mihing lunggil ngaituana zosia chu, Jesu Khrista ah chun vaihawm piak ding ahi.

¹⁷Himaleh, nang chu Juda mi kiti la hileh, dan ah chun la kingak ah, Pathian ah la kisakthei a,

¹⁸ama lung lam chu he ah, dan thuhil ah la um ziak ah thil phazaw diak chu la hetchian thei a,

¹⁹nangma ngei chu mitthûmte vengtu la hi’na chun la kimuan ma ma ah, thim lak ah umte salvâktu ah la kihiat ah;

²⁰mingolte sudiktu, naupangte hiltu le la hi ah, dan leh thutak chu he ah la kingai leh:

²¹Zia gual chu hingal in, nang midangte zilsak sektu, nang leh nang kizilsak lo la hem? Nang gukchâk lo ding ti thugen sek chun, nang in la gu sek maw?

²²Ângkawm lo ding ahi ti mi hilsek chun, nang in âng la kawm sek maw? Nangma milim ho ding zada chun, milim hona thilte la gu sek maw?

²³Nangma dan kisaktheipi chun, dan bawtsia’n Pathian chu la suminsia ta hilo maw?

²⁴“Nangmau ziakin Pathian min chu, Jentelte lak ah sukminsiat in a um tai,” ti zik gual ah khan.

²⁵Dan chu a la zawm hilechin, la zektan kha phachuam ma ma ding ahi’n; himaleh, dan botsepa la hi’chun, la zektan chu tan lo tawh kibang zing ahi.

²⁶Ziaziakchun, zektanlo chun dikna dan chu zawm ta leh, a zektan lona chu zektan gual ah ngai hitho lo ding a hem?

²⁷Chuleh, ama piandan ah zektan lo chun dan a zui kim leh, nang, a lekha thu leh zektan dan nei ngal ah, dan botsepa chu hun kãl lo ding a hiu em?

²⁸A kilang mai ah Juda mi hi chu a tak ahi ziang puai; a pawlam ah taksa mai ah zektan chule zektan tak tak ahi puai.

²⁹A sunggil lam ah Juda mi hite bep chu a tak a hiu; chuleh, tak tak hilo in, lunggil lam thagau ah zektante bep chu zektan tak tak a hiu. Zia gual mite chun, mihing pachatna sâng in Pathian pachatna a law zaw sek ui.