Read Vaiphei ROMTE 4 Bible Online

ROMTE 4 - Vaiphei bible

ROMTE 4

¹Chutichu ahileh, taksa lam ah I puu Abraham chung thu ah chun bang a hem I gen ding uh?

²Ama chu thil hi’ziak ah midik ah kisim ahileh vang, kisuanna ding a nei hi, ahi’n la, Pathian lam ah vang a nei puai.

³Pathian Lekha thu chun bang a gen em? “Abraham chun Pathian a ging ah, zia chu ama dikna ah ngai ahi,” ti ahi.

⁴Nasemtu law kipia chu hepina ziak a hipua’n, bat ah ngai ahi zawi.

⁵Himaleh, nasep ziak hilo ah, Pathian helote thiam chansakpa ah ginna nga mi ginna chu, a dikna ah ngai ahi.

⁶Mi a nasep ziak hilo ah, Pathian in midik ah a ngaite chu, mi hampha ahi dan uh, David in zia gual hin a la gen a:

⁷“A thil hi’khelnau ngaidam ah um ah, a gitlonateu liakhu ah um chu, mi hampha a hiu.

⁸LALPA‘n gitlona nei ah a guatlote chu, mi hampha a hiu,” ti in.

⁹Ahileh, zia hamphatna chu zektante kiang bep ah um a hem, zektanlote chung ah le? “Abraham ginna chu a dikna ah ngai ahi,” I tiu a.

¹⁰Zia chu bang gual ah hithei a hem? A zektan nung a hem, a zektan masang in? A zektan nung in a hipua’n, a zektan masang in ahi zawi.

¹¹Tichun, zektanlo ah a um lai in, ginna’n dikna a mui ti tepte’na chu a chang in; zia dikna chu amau â ding ah guat a hi’na dingin; zektanlote lak ah a gingtute zosia pa a hitheina dingin.

¹²Chutichun, zektanlote â ding ah zektan pa bep hilo in, I puu Abraham zektanlo ah a um lai ah, ginna a nei gual ah neite pa le ahi.

¹³Abraham leh a suante kiang ah, khawvel golua’na ding thutiam kha dan ziak a hipua’n, ginna ah dikna ziakin ahi zawi.

¹⁴Dan ah umte bep a golua ding hitaleu chu, ginna chu bangmalo hita’n tin, zia thutiam chule mattâk lo hita ding ahi.

¹⁵Dan um lona chun bawsiatnale a um pua’n, dan chu lungnatna supuang bep ahi zawi.

¹⁶Hepina ziak ahitheina dingin ginna chu a hung um ah, a thutiam chu a suante zosia chung ah, a tawp chan ah a um zing theina dingin, Dan nuai ah umte bep hilo in, Abraham ginna kikoppite â dinginle ahi, ama chu I leng ua pa ahi ngal a.

¹⁷Pathian lekha thu ah, “Nam tam takte pa hiding in ka hun siam tai,” a ti gual ah khan; a gin Pathian chun mithi a kaithaw ma pek a khanle, thil umlo te chu a um gual in a la gen thei ta ahi.

¹⁸Tichun, nam tam takte pa a hung hi’theina ding ah chun, a kigen tasa gual ngei in, kinepna ding umlo kei inle kinepna a la neitheina, ginna a nei ziakin, “La suan chu zia gual ah chu tam tak hiding a hiu,” ti chu a hung dik ta ahi kha.

¹⁹Chuleh, kum za khat hial a tin ah, a thisa tawhbang ah ngai thei, tâksa chu tawh, Sarah chîng chule a ngaitua ah, ginglel lo hial in a um a.

²⁰Ginna tasam in Pathian thutiam chu a ginglel diak pua’n, ginna hat tak in Pathian a chawihoi zaw ta’n;

²¹a thutiam a lawtinsak thei hi ti a gingcha ma ma ah, a ginna chu a hung detzaw ta ahi.

²²Ziaziakchun, a ginna chu a dikna guat ahi tai.

²³Tu’hin zia thute hi ama ziak bep ah kizik a hipua’n,

²⁴eimau â dinginle zia gual ah chun, eimau chung ah le sukdetna umthei ahi, Jesu I Lalpau thina kipat thokit chu I gin phot ua leh;

²⁵ama chu I gitlonau ziakin thâ in a um ah, thiam I channa ding un kaithaw in a um kit tai.