Read Vaiphei ROMTE 5 Bible Online

ROMTE 5 - Vaiphei bible

ROMTE 5

¹Ziaziakchun, ginna ziak ah thiamchang ah um in, I Lalpau Jesu Khrista jal in, Pathian tawh kicham in I um tau hi.

²Ama ziak ma in, zia lungsiatna I din detnau ah hin I lut tau in, Pathian lopina kinepna chun kipak tak in I um ui.

³Zia bep chule hilo in, gimthokna’n le kipak in um hitiu; gimthokna chun thok-hatna a siam hi ti I het ziak un.

⁴Thok-hatna chun umchan phatna ei pia’n; chuleh, umchan phatna chun kinepna ei piai.

⁵Zia kinepna chun ei mualphosak pua’n tin; Thagau Thiangtho ei piak chu mang in Pathian chun I lung sung ua hin a hepina chu a hun sung lut tangal a.

⁶I hatlo lai uh khan, a hun tak in Khrista chu Pathian helote a dingin a hung thi ta’n.

⁷Midik thasâng in kuama thi ngam khel pua’n au, mipha thasâng ah chun kua a hem khat bêk in thi ngam kha maw pua’n a.

⁸Himaleh, Pathian chun ei hepina chu a latsak ah, migilo I hi’lai ua, Khrista chu I sik un a thi ta ahi.

⁹Chutichun, a thisan ah thiamchansak I hi’tâk nung un, ama ziak man Pathian lungnatna kipat in hukhin in um ngei hitiu.

¹⁰A mêlma I hi’lai a bawn, a Chapa thina ziak ah Pathian tawh kicham I la hi tâk uh chun, kicham a I um tâk nung uh hin, a hinna ziakin hukhin in um ngei hitiu.

¹¹Zia bep chule ahi puai, kichamna, tu’ ei musakpa I Lalpau Jesu Khrista jal ah hin, Pathian chu I suang tau ahi.

¹²Chutichun, mi pakhat ziakin gitlona khawvel hin a lut ta’n, gitlona ziakin thina a lut in; zia gual ma chun mi zosia migilo I hi tâk ziak un thina’n mi zosia a zen suak tai.

¹³Dan a hung um tiang ah khanle khawvel hin gitlona chu a la um zing ah, himaleh, dan a umlo lai ah khan gitlona chu gitlo ah ngai ei puai.

¹⁴Abang hileh, Adam ah kipat Mosi tiang in, Adam hi’khialna gual ah thil hi’khiallote chung ah le thina chun vai a hawm sek ah, Adam chu a hung um kit ding tawh te’kâk ahi.

¹⁵Ahi’n la, thilthawnpiak chu hi’khelna tawh a kibang pua’n. Mi pakhat hi’khelna ziak ah bawn mi tam tak a thiu chun, Pathian hepina leh mi pakhat Jesu Khrista hepina ziak ah thilpiak chu, mi tam tak chung ah vuk in um ngei in a.

¹⁶Chun, zia thilthawnpiak chu mi pakhat sukkhial ziak ah thil hung um chu tawh a kibang pua’n; thiamlo chansakna vaihawmna chu mi pakhat ziakin a hung um ah, thiamchansakna thilthawnpiak bo chu sukkhialna tam tak ziakin a hung um zaw ahi.

¹⁷Mi pakhat sukkhialna ziakin, mi pakhat chung ah khan thina’n vai a hawm chun, hepina nasa tak leh dikna thilthawnpiak la changte khan, mi pakhat Jesu Khrista jal ah hin hinna chun vaihawm piak ngei in a.

¹⁸Tichun, mi pakhat thu awi lona ziakin mi zosia chung in thiamlo channa vaihawmna chu a tung ta’n; zia gual ma chun mi pakhat dikna ziakin, mi zosia’n hinna lutna thiamchanna a neitheina ding un thilthawnpiak pakhat chu a hung um ta ahi.

¹⁹Mi pakhat thu awi lona ziak ah khan mi tam tak migilo a hung hi tau a; zia gual ma chun, mi pakhat thu awina ziakin mi tam tak chu midik hung hi’n au.

²⁰Sukkhialna a kilat tam zawk diak theina dingin dan chu a hung lut a. Himaleh, gitlona a punna chun hepina le a pung zaw diak sek hi.

²¹Tichun, thina’n vai a hun hawm gual in, hepina chun, Jesu Khrista I Lalpau ziakin, kumtuang hinna lutna dingin dikna chun vai a hun hawm ta ahi.