Read Vaiphei ROMTE 8 Bible Online

ROMTE 8 - Vaiphei bible

ROMTE 8

¹Chutichun, tu’hin chu Khrista Jesu ah umte â ding ah chun, thiamlo channa him him a um ta puai.

²Khrista Jesu ah hinna Thagau dan chun, gitlona leh thina Dan ah kipat chun ei pawtsak tangal in.

³Chutichun, Dan in a mamaw chu, ei uh taksa dan ah chawn lo ah, Thagau dan ah chawnte ah hin sukbukim ahitheina dingin,

⁴taksa’n a sukzawngkhal ziak ah Dan in a bawlthei tâk lo chu, Pathian in a chapa chu gitlona taksa mêlpu’n, gitlo thoina ding ah hun sawl in, taksa ah gitlona chu thiamlo a hun chansak tai.

⁵Taksa Dan zuite chun taksa lam thilte a lunggul sek un, himaleh, Thagau dan zuite chun Thagau thilte ma a lunggul sek ui.

⁶Taksa lam thilte lunggulna chu thi’na ahi’n; thagau lam thil lunggulna chu hinna leh thamuanna ahi ngal a.

⁷Taksa lam doidan vang Pathian tawh kimêlmâkna ahi’n; Pathian dan tawh kituakna a um puai; um le a um theilo him ahi.

⁸Ziaziakchun, taksa ah umte chun Pathian a kipaksak thei puau hi.

⁹Nanghaw vang taksa um la hita puau in, Thagau ah um la hizaw tau hi; ziaziakchun, nangmau ah chun Pathian Thagau chu a chêng hi. Kua’nle Khrista Thagau a neilo chun ama mi ahi puai.

¹⁰Khrista chu nangmau ah a um chun, taksa chu gitlo ziakin a la thi ta maleh, dikna ziakin thagau in la hung hing kit tau hi.

¹¹Himaleh, mithi lak ah kipat Jesu kaithokitpa Thagau chu nangmau ah a um leh, mithi lak ah kipat Jesu kaithokitpa chun, nangmau ah um Thagau ah chun la taksau thithei chu hun hinsak kit in a.

¹²Ziaziakchun, unaute haw, bat I nei ui; taksa dan ah um ding ah taksa kiang in vang ahi puai.

¹³Taksa dan ah la um zing uh chun thi ngei ding la hiu; himaleh, Thagau ah chun taksa thilhi’te la thâ zing ua leh vang hing in lau.

¹⁴Pathian Thagau pui ah um tapote chu Pathian chate ahi ngal un.

¹⁵Lau tak ah um kit ding ah suak hi’na thagau la chang puau in, cha hi’na thagau la chang uh a hizawi. Tichun, “Abba! He pa!” ti ah I ko phat ua leh,

¹⁶Thagau ngei chun eimau thagau tawh kizom in Pathian chate I hitau hi ti ei hiatsak hi;

¹⁷chuleh, chate I hiu chun, golua dingte I hiu ah, Pathian golua ding, Khrista tawh golua khawm ding I hitau hi; ama lopina I chan khawm theina ding un, ama thokna le I thokpiu a ngai hi.

¹⁸Tu’lai thoknate hi tu’nung ah lopina I chung ua hung kilang dingte chu tawh te’pi kham in ka ngai puai.

¹⁹Thilsiam zosia chun kinem tak in Pathian chate kilatna ding chu a ngakla ma ma tangal un;

²⁰thilsiam zosiate chu thil thulim lo thu thu’n umsak in a um tau ah; a nop thuu ah um hilo in, kinepna umsakpa ziak ahi zawi;

²¹thilsiam zosia le siatna suak ah kipat suachâtsak in um in tiu in, Pathian chate zalenna lopi tak chu chang ding ahi ngal un.

²²Thilsiam zosia chu, nauvei nat thuak leh thûm leh mâu in tu’tiang ah hin a um ui ti I hiau hi.

²³Amau haw bep hilo in, eimau ngei Thagau ga masa neite hile, cha hi’na kilatna, I taksau tatna chu ngakla in, lungthim ah thûm leh mâu in I um uh ahi.

²⁴Zia kinepna ziak ah hin hukdam I hiu hi. Himaleh, kinepna mu zing thei chu kinepna ahi puai; min a mutâk nung chu bangti’n kineppi nalai ding a hem?

²⁵I mu nailo I kineppiu chun, zia chu gunchu tak in I ngak ham ham sek ui.

²⁶Zia gual ah chun, Thagau chun I hatlonateu ah ei panpi sek in, eimau hin bangti pauchap ding I hiu em ti I hepuau in, zia Thagau ngei chun gen daw theilo khop ah nasa zaw’n ei dot piak in a la thûm sek hi.

²⁷Ama, lungthim sunggil lam ensui sekpa chun, Thagau lungthim leh ngaituate chu a hia’n, ziaziakchun, Pathian lung lam tawh kituak in mithiangthote â dingin a dot piak zing ahi.

²⁸Pathian in a guat dungzui ah a kote, ama hepite â ding ah chun a phatna ding un thil bangkim a bawl piak sek hi ti I he ngal un.

²⁹Pathian chun, a Chapa chu unau tam tak lak ah cha piang masa pen ahi’theina dingin, a hetlawkte chu a Chapa gual hiding in a guatlawk a.

³⁰Chun, a guatlawkte chu a ko ah; a kote chu thiam a chansak ah; chun, thiam a chansakte chu a chawihoi sek hi.

³¹Zia thute ah chun bang gen ding I hitau em? Pathian ei lam ah a pan chun kua’n ei do thei ding a hem?

³²Ama Chapa hial bawn hawi lo ah, I leng ua thasâng ah hun pepa chun, thildang zosia le a thawn in ei pelo ding a hem?

³³Pathian mitêlte chu kua’n hêk thei ding a hem? Thiam chansakpa chu Pathian ahi ngal a.

³⁴Thiamlo chansak chu kua a hem? A hung thi Khrista Jesu kha ahi; ahi ngût hi, a thokit ah Pathian khut changlam in a um ah, ama chun ei pauchap piak zing ahi.

³⁵Aleh, Khrista hepina ah kipat chun kua’n ei khen zo ding a hem? Thokgimna’n a hem, lungkhamna’n a hem, sukgentheina’n a hem, kial in a hem, ngawnchang hi’na’n a hem, lau umna’n a hem, chemjam in a hem, ei khen zo ding ahi diam?

³⁶“Nangma ziakin nitum in tha in ka um sek un; belam tha ding gual ah sim in ka um ui,” ti ah zik gual khan.

³⁷Ei khen zo lo e! Zia zosia ah chun ei haw ei hepipa zal ah chun gâl zo te sâng ah chungnung zaw I hiu.

³⁸Kichian takin ka he ahi, thina a hem, hinna a hem, vansawlchâkte a hem, lalna a hem, thil um lai a hem, a hung um ding a hem, thilhi’theina a hem,

³⁹sânna a hem, thûkna a hem, thilsiam dang him him inle I Lalpau Jesu Khrista ah um, Pathian hepina kipat chun ei khen zo pua’n a.