Read Vaiphei ROMTE 9 Bible Online

ROMTE 9 - Vaiphei bible

ROMTE 9

¹Khrista ah chun thutak ka gen ahi, juau ka gen puai; ka sia leh pha hetna hin Thagau Thiangtho ah chun ei hetpi ahi.

²Ka lunggil sung ah hin lungngaina leh lunggimna bei theilo ka nei zing hi.

³Taksa lam ah ka unaute, ka chipite ziakin kei hi Khrista ah kipat khenthâk ah um hial in, hânsia pawzaw mai leng ka nuam zaw ahi.

⁴Israel mite, cha hi’na changte, lopina changte, thuthung leh Dan thupiakte leh, Pathian nasepnate leh thutiam zosia a la changte a hiu a;

⁵pu leh pate kha le amau â a hiu ah, taksa lam thu ah Khrista le amau lak ah kipat hung pawt ahi’n; ama chu thil zosia chung ah um ahi, kumtuang ah pâk tâk Pathian ahi, Amen.

⁶Himaleh Pathian thu chu a lawsam ahi diak puai. Israel suante zosia chu Israel ahi sik sek ziang puau hi.

⁷Abraham suante a hiziak un a leng un a chate dik tak ahi diak puau hi, “Isak ah kipat hin la suante a la ti’n au,” ti ahi ngal a.

⁸Taksa dan ah chate chu, Pathian chate a hiziang puau ah; thutep chate bep chu a suante ah sim ahi zawu ti’na ahi.

⁹Pathian in thu a la tiam chu zia hi ahi: “Zia hun vêl ah hin hung kit ing ka tin, Sarah chun chapa hun nei in a,” ti hi.

¹⁰Zia bep chule ahi puai; Rebekka in Isak zal in chate a vop lai ah khan, zia gual thil hi a la um hi:

¹¹A chate chu a pianmau in, sia leh pha a sepdaw mau in, thil hi’ziak hilo in, a kopa dawi ziak hi zaw’n, têlna lam thu ah chun Pathian thil guat chu a dettheina dingin a kiang in:

¹²“A upa zaw chun a naupang zaw na sep piak in a,” Pathian in a ti ahi.

¹³“Jakob ka hepi in, Esau chu ka hua ahi,” ti zik gual ah khan.

¹⁴Aleh, bang I gen ta diam uh le? Pathian ah chun diklona a um ah ahi diam? Hilo e.

¹⁵Mosi kiang ah chun, “Ja ka ngaina dingte chung ah chun jangai ing ka tin, ka lainat dingte chung ah chun, lainatna nei ding ka hi,” a la tii.

¹⁶Chutichu ahileh, mihing dawi ziak leh tup ziak le a hipua’n, hepipa Pathian ziak ahi zawi.

¹⁷Pathian lekha thu chun Pharaoh kiang ah chun, “Nangma ah ka thilhitheina a hung kilat ah, lei chung zosia ka min a hung kitâklat theina dingin, zia thiltup ziak tak ah chun ka hun tundin la hi,” a la ti kit a.

¹⁸Ziaziakchun, ja a ngaina ding chung ah chun ja a ngai ah, a nop nople a lung uh a hi’tâk piak sek hi.

¹⁹Nang un ka kiang in, “Bangatia ei dem zing a hem? A doilam kua’n a nang zo ah a hem?” ei tiding la hiu a.

²⁰Himaleh, a dik tak in, aw mihing, Pathian nial chu kua la hia hem? Thilsiam in ama siampa kiang in, “Bang a tia zia gual ah hi lei siam a hem?” tiding a hia hem?

²¹Bêllei tâng khat ah kipat bêl pakhat lûl tak ah mat ding ah, bêl dang pakhat lûl lo deu ah mat ding ah siam dingin bêlsêkpa chun, bêllei chung ah chun thu a nei pua hem?

²²Lungnatna mangthai ding ah kilawmte chung ah, Pathian in a lungnatna leh a thilhitheina latsak nuam ah, a dawzaw ham ham leh bang khawk ding a hem?

²³Lopina ding ah a la siam lawk, jangaina changte â ding ah a lopina hau dan taklatna ding in,

²⁴Judate lak ah kipat bep hilo in, Jentelte ah kipat leh kodawsa eihaw â ding inle a la bawl hitaleh, bangti ding a hem?

²⁵Hoshea lekhabu ah, “Ka mi la hi khalote chu ka mite hun ti ta’ng ka tin; ka hepi hilote chu hepite hun tiding ka hi.

²⁶Ka mite la hipuau, a ti’na mun ah khan, Pathian hing chate ti in hung um ta’n au,” ti ah a la gen gual ah khan.

²⁷Israel chung thu ah chun, Isai khanle, “Israel chate tam dan chu tuisuagiat ah piaunêl jat hi ziangleu le, a lak ua tawmcha bep hukdam ah um ding a hiu;

²⁸Lalpa chun kin-gang tak ah sêm zo in, lei chung a gawt ding thu chu mualsua ding ahi,” ti’n a la zik hi.

²⁹Chuleh, Isai ma ma chun, “Sepaite Lalpa chun ei suan ding ei la khêk piak lo leh chu, Sodom khua gual in um tai tiu in, Gomorrah gual ah bawl in um tai tiu,” ti ah a la genlawk gual khan.

³⁰Bang gen ding I hitau em? Jentelte dikna dellote chun dikna a la mu tau ah, ginna ziak ah dikna chu.

³¹Israelte dikna dan ah delte vang chun dikna dan chu ahi’bukim zo ta puau hi.

³²Bang ziak ah zo lo a hiu em? Ginna’n a del puau ah, thil hi’ ah a del ziak un ahi. Kipalna suang ah chun a kipal tau ahi.

³³“Ngai in, Zion ah kipalna suang leh, dâlna suangpi ka koi in, kuale ama ging tapo chu mualpho pua’n au,” tia kizik gual khan.