Read Vaiphei 1 KORINTH 10 Bible Online

1 KORINTH 10 - Vaiphei bible

1 KORINTH 10

¹Suapite haw, zia hi la hetlo ding uh ka dawi puai, I pu leh pateu kha sûmpi nuai in a um un, a leng un tuipi a kân ui.

²Mosi zui a hi’theina ding un sûmpi leh tuipi’n baptis a chang ui.

³A leng un thagau an khat a nekhawm un,

⁴a leng un thagau lam in a kibang a dawn chiat ui. Amau zuitu thagau lam suangpi ah tui pawt kha a dawn khawm un; zia suangpi chu Khrista ahi.

⁵Himaleh, a tamzawte chung in Pathian a kipak ta pua’n; gamkeu ah khan paithâk in a um tau hi.

⁶Thil phalo a ngaitua gual ua I ngaitua lona ding ua ei etsaknau a hi.

⁷A lak ua khenkhat gual ah khan, milim ho hi kiu in: “Mipi chu ne ding leh dawn dingin a kichuu in; chun, kihel dingin a dingdok tau a,” ti zik gual ah khan.

⁸Thanghuai puai tiu, a lak ua khenkhat a chutiu ah, ni khat ah sîng ni leh sang thum a thi tau kha.

⁹Khrista chu patep puai tiu, a lak ua khenkhat in a chutiu ah, gûl in a chu’ lum tau ahi kha.

¹⁰Phunchiak puai tiu, a lak ua khenkhat a chutiu ah, hi’mangthaipa’n a sukmanthai khawlaw tâk kha.

¹¹Zia thilte chu etsakna ding ah a chung ua tung ahi; eihaw hun nunung ah umte ei hilna ding ah kizik ahi.

¹²Ziaziakchun, ding zing ah la kingai chun chingthei ta’n, kilîk khan la.

¹³Mitin chung ah patepna vântâng tilo la chung un patepna a tung kha puai. Pathian chu a ginum in, la zaw khêl uh chetna la chung un tunsak pua’n a; la thokzawna ding un chetna tawh kigual in taidawna lampi hun bawl piak in a.

¹⁴Ziaziakchun, ka suapite haw, milim ho hi jamsan tau in.

¹⁵Mipilte kiang ah gen gual in ka gen la hiu; ka thugen hi ngaitua un.

¹⁶Maljawlna no ah maljawlna ka piak uh hi, Khrista thisan kikoppina hilo a hem? Vaithum ka thap sek uh hi, Khrista taksa kikoppina hilo a hem?

¹⁷Vaithum tang pakhat a um in, eihaw mi tam tak hi vaithum tang khat nekhawm I hiu in, taksa pakhat I hiu hi.

¹⁸Israelte chu en tiam un, kithoina sanete chun mâichâm chu a kikoppi puau em?

¹⁹Bang ka genna a hem? Milim ma ah kithoina leh, milim le thil khat tak ahi ka ti’na a hem?

²⁰Hilo e, Jentelte thillat chu Pathian kiang ah hilo in, thithate kiang ah ahi zawi ti hi ahi. Thithate la kikoppiu ka dawi puai.

²¹Lalpa no leh thithate no ah dawn kop kiu in. Lalpa dawkan leh thithate dawkân ah nekop diak kiu in.

²²Lalpa chu thangsiat sak gua I hiu em? Ama sâng in I hat zawu ah a hem?

²³Thil bangkim bawl phal ahi, himaleh, thil bangkim bawl chu a pha diak puai. Thil bangkim bawl phal ahi; himaleh, thil bangkim bawl chun ei siampha diak puai.

²⁴Kuama’n ama phat theina ding bep sâng in, midang â dingle hawl zaw tau hen.

²⁵Sazokna kizuak taphot chu, sia leh pha hetna ziak ah bangma dong lo in ne mai un.

²⁶“Lei leh a sung ah um zosia hi Lalpa â ahi ngal a”.

²⁷Ginglo pakhat in an ne ding ah a chial ah, la chia nop chun, sia leh pha hetna ziak ah bangma dong lo in, a piak taphot chu ne mai in.

²⁸Ahi’n la, kua a hem in, “Zia hi kithoina thillat ahi,” ti a hung hil chun, a hung hiltu ziak leh, sia leh pha hetna ziakin nêk dâ un.

²⁹Nangma sia leh pha hetna hilo in, ama sia leh pha hetna ka ti ahi. Bangatia midang sia leh pha hetna’n ka zalenna thunun a hem?

³⁰Kipak tak ah ka chan, kipak thu ka gen khum chung ah bangatia soisêl ah um ka hem?

³¹Chutichun, la nêk unle, la dawn unle, la thil hi’ taphot uh chu, Pathian lopina ding bep in hiu in.

³²Judate hi’n, Grikte hi’n, Pathian kochuam hitaleh, a kilikna ding bangma bawl kiu in;

³³keima’nle bangkim ka hi taphot ah mi zosia ka kipaksak gual leh, keima phatna ding bep hawl lo ah, mi tam tak phatna ding leh hukdam a hi’theina ding uh ka hawl zawk gual ah hin.