Read Vaiphei 1 KORINTH 11 Bible Online

1 KORINTH 11 - Vaiphei bible

1 KORINTH 11

¹Khrista ka etton gual in, keima ei enton un.

²Bangkim ah ei hezing in, thugo ka hun piak la vop zing ziak un ka hun pakcha la hiu.

³Ahi’n la, Khrista chu pawsal zosia luchang ahi’n, pawsal chu a ji luchang ahi’n; Pathian chu Khrista luchang ahi ti, la het uh ka dawi hi.

⁴Pawsal lukhuk khuk kawm ah pauchap leh thugen tapo chun, a luchang chu a hi’mualpho hi.

⁵Ahi’n la, numei a luchang khu’lo ah pauchap leh thugen chun, a luchang a himualpho ah, a luchang mêtkol tawh kibang ahi.

⁶Numei a luchang khu nuam lo chun mêtkol ngal ngal hen; numei â dingin sam mêt leh mêtkol jachak a um chun lukhuk khuk hen.

⁷Pawsal chu Pathian kibatpi leh lopina ahiziak in, lukhuk khuk ki’hen; numei vang chu pawsal lopina ahi.

⁸Pawsal chu numei ah kipat pawt a hipua’n, numei vang pawsal ah kipat pawt ahi.

⁹Pawsal hi numei ah kipat siam a hipua’n; numei vang pawsal ah kipat siam ahi.

¹⁰Ziaziakchun, vansawlchâkte ziakin numei chun thuneina suklatna a khuk diu ahi.

¹¹Himaleh, Lalpa ah chun numei hi pawsal bei in a um thei pua’n; pawsal le numei bei in a um thei diak puai.

¹²Numei hi pawsal ah kipat siam ahi gual in, pawsal le numei ah kipat piang ahi; ahi’n la, bangkim hi Pathian ah kipat pawt ahi.

¹³Kingaitua mai un: Numei in a luchang khu’lo ah Pathian kiang ah a pauchap chu a kilawm em?

¹⁴Pawsal hin a sam a hoisau chu ama â ding ah jachak um ahi ti, thilsiam inle a hiatsak hilo a hem?

¹⁵Numei chun samsau a nei leh, ama â dingin lopina ahi. A sam chu kikhû’na ding ah piak ahi ngal a.

¹⁶Kuale kinial thanuam a um chun, zia gual dan him him chu I nei puau hi; Pathian kochuamte’n le a nei diak puau hi.

¹⁷A nuai ah thuhilnate hin ka hun pakcha puai; la kikhop phat ua leh, a phazaw lam hilo in, a sezaw ding lam ngen ahi.

¹⁸Amasa pen in, kochuam la kikhop phat ua leh, la lak un kikhenna a um sek hi ti mi gen ka he’n, ginle ka gingcha tho hi.

¹⁹La lak ua a tak takte a kilat theina dingin, kikhenna le a um ding him ahi.

²⁰Lalpa an thiang nekhawm ding ah kikhawm la hi ngai puau hi.

²¹Mitin in jan an la kinêk masak ua; mi pakhat a gilkial nalai in, midang pakhat chu a kham ta’n.

²²Bangti a hem? Nêk leh dawnna ding In, la nei puau ah a hem? ahilo leh, Pathian kochuam hi mutawm ah, bangma neilote chu sukmualpho gua la hiu em? La kiang un bang gen ding ka hi em? Pâkcha ding ka hem? Zia thu ah hin ka hun pâkcha thei puai.

²³La kiang ua ka piaksawn kha Lalpa ah kipat ka mu ahi. Lalpa Jesu matsak ah a um ding jan ah khan vaithum a lâ,

²⁴kipak thu a gen zaw in, a phelsua ah, “Zia hi ka taksa, nang uh â ding ah piak chu ahi. Lei hetzingnau in zia hi bawl sek un,” a ti’n.

²⁵Zia gual ma chun, jan an a nêk zawu in, no chu a la, “Zia no hi ka thisan ah thuthung thak chu ahi; zia hi la dawn si’n ua leh lei hetzingnau in hisek un,” a ti’n.

²⁶Zia vaithum hi la nêk ua, no ah chu la dawn si’n ua leh, a hung kit masia ding ah Lalpa thina chu la tâklang uh ahi.

²⁷Ziaziakchun, kuale zia vaithum leh zia no ah, a tâk lo sapi ne leh dawn chu, Lalpa taksa leh thisan in thiamlo chang in a.

²⁸Mitin ama leh ama ki-enchian zet in, zia vaithum hi ne hen la, zia no hile dawn hen.

²⁹Lalpa taksa chu ngaitua lo hial ah a nêk leh a dawn chun, ama chung ah vaihawmna dingin a ne’n a dawn ahi.

³⁰Zia ziak hin la lak ua tam tak la jawngkhal un, la damlo khawlaw tau in, khenkhat a thi khawlaw tau hi.

³¹Eimau kingaitua leu hin, vaihawm piak ah umlo ding I hiu hi.

³²Ahi’n, LALPA‘n ei vaihawm piak phat leh, khawvel tawh thiamlo changkhawm lo ding ah ei thunun a hizaw sek hi.

³³Ziaziakchun, ka suapite haw, an ne ding ah la hung khawm phat ua leh, ki-ngâk tua sek unla;

³⁴la kikhopnau ah thiamlo la chan lona diu in, a gilkial tapo in In ah neu hen. Thu dangte kha ka hung phat leh hil ing ka.