Read Vaiphei 1 KORINTH 14 Bible Online

1 KORINTH 14 - Vaiphei bible

1 KORINTH 14

¹Hepina del unla, thagau thilpiak chu lunggul un, a diak in thu la gen theina ding un.

²Pauhetlo ah thugen chun mihing kiang ah hilo in, Pathian kiang ah gen ahi zawi; kuama’n a thugen a hepuau a; thagau lam in thugûk a gen hi.

³Thugente chun vang mihingte kiang in siamphatna, kitîlkhona leh lungmuanna thute a gen a.

⁴Pauhetlo ah thugen chun ama bep a kisiam pha’n, thugente chun vang kochuamte a siamphai.

⁵La leng un pauhetlo ah thu la gen uh ka dawi piak la hiu; himaleh, thu la gen uh ka dawipiak diak hi. Kochuamte’n kisiam phatna a nei theina ding un mi pakhat in a le’daw lo ngal leh, hetthei ah thugente chu pauhetlo ah thugente sangin a thupi zawi.

⁶Suapite haw, tu’hin la kiang un pauhetlo in thu hung gen ta leng, hiatsakna a hem, hetna a hem, thugenna a hem, zilsakna a hem ah ka hun gen lo chun bang a hem lei phatchuampina ding uh?

⁷Hinna neilo, thilgithei, lilu a hem, tingtang a hem chule umzia bei ah a git chun, bang La kai zui a hem ti hetthei ding a hem?

⁸Pengkul chu mumal bei ah a git chun kua gâl kuan ding ah kisiam thei ding a hem?

⁹Zia gual ma chun, nang unle het theilo ding pau ah la gen uh chun, bang thu gen la hem ti kua’n he ding a hem? Beingawn ah thu gen hi’n lau.

¹⁰Khawvel ah pau chuam chuam a um hi; ahi’n la, umzia bei a um puai.

¹¹A pau umzia ka hetlo chun, kei chu a thu genpa hetkhâk lo hi’ng ka tin; a genpa chule ka hetkhak lo gual hi’n a.

¹²Chutichun, nang unle, Thagau thilpiak chung ah phatchuam la ngai ziak un, kochuamte siamphat theina ding thilpiakte hawl un.

¹³Ziaziakchun, pauhetlo ah thugen chun a ledaw theina dingin pauchap hen.

¹⁴Pauhetlo ah ka pauchap chun, ka thagau a pauchap ngei ah, ka hetna’n vang a phatchuampi puai.

¹⁵Bang ka hita diam leh? Thagau in pauchap ka tin, hetna’n le pauchap ing ka; thagau in La sa’ng ka tin, hetna’n le sa’ng ka.

¹⁶Achutiloleh, thagau in kipak thu gen lechinle, a helote chun la kipak thugen helo ah, bangti’n, “Amen,” ti’thei ding a hiu em?

¹⁷Kipak thu la gen a pha ngei ah, midang vang a siampha diak puai.

¹⁸Nanghaw sâng ah pauhetlo ah thu ka gen tam ziakin Pathian kiang in kipak thu ka gen hi.

¹⁹Himaleh, biak In ah chun pauhetlo ah thumal sîng khat gen sâng in, midangte ka hiltheina dingin hiat thei in thumal panga bep gen ka nuam zawi.

²⁰Suapite haw, ngaituana lam in chapang kiu in; phatlona lam in nausen hiu inla, ngaituana lam in piting hiu in.

²¹Dan Lekhabu chun, “Pau chuam thawte kam leh gam dang mite mûk in, ziate kiang hin thu gen ing ka tin; Chutisapi’nle ei ngaitha diak pua’n au,” ti’n LALPA’n a gen hi.

²²Ziaziakchun, pauhetlote hi gingtute â dingin tepte’na ahi pua’n, a ginglote â dingin ahi zawi; thugen hi ginglote â ding a hipua’n, a gingte â ding ahi.

²³Ziaziakchun, kochuam zosia kikhawm unla, pauhetlo in thu gen chiat taleu chin, a helote a hem, a ginglote a hem hung taleu, ngol salo ding a hiu em?

²⁴Ahi’n la, la leng ua thu la gen uh chun, ginglo a hem, pawlam mi a hem hung lut ta leh, a thiamlo jia la leng ua la hiatsak uh hi’ntin, la leng ua la suasal uh hi’n a.

²⁵A lunggil ah thugûkte chu suklat ahi’phat leh, bokkhup in Pathian bia’n tin, “Pathian la lak un a um ngei hi,” ti’n puangjak ta’n a.

²⁶Ka gualte haw, bangti’n a hita diam? La kikhop phat ua leh pâkna La a hem, thuhilna a hem, kilâkna thu a hem, pau hetlo hilchetna a hem la nei chiat sek un. Bangkim chu kisiam phatna ding ah mat hi hen.

²⁷Kua’nle pauhetlo ah thu a gen chun, pani a hem, a tam pen ah pathum a hem hiu hen la, kithâk thaw’n gen uh hen la; pakhat in a let zel hen.

²⁸A let ding a umlo chun biak In ah chun thip mai hen la, ama leh Pathian kikâl in gen mai hen.

²⁹Thugente’nle, pani a hem, pathum a hem in gen uh hen la, a dangte’n gunchu tak in ngaituau hen.

³⁰A kiang ah midang pakhat kiang ah hiatsakna thupiak ahi chun, a masa chu thip mai hen.

³¹Mi zosia’n a zil ua a lungmuan theina ding un, la leng un pakhat khat in gen thei in lau.

³²Thugente thagau chu a thugente thu thu’n a um hi.

³³Pathian chu buaina Pathian a hipua’n, kichamna Pathian ahi zaw ngal a. (Kochuam tin ah mi thiangthote a um gual un,

³⁴biak In ah chun numeite chu thip hiat hiat uh hen. Thu a gen uh phal ahi pua’n, dan thu’n le a gen gual in kingainiam zaw tau hen.

³⁵Het nop a nei ua leh In ah a pawsalteu dong uh hen. Biak In ah numei in thu a gen chu jachâk um ahi ngal a.

³⁶Pathian thu hi nangmau ah hung kipan a hem? Ahiloleh, nangmau kiang bep ah hung tung a hem?)

³⁷La lak ua thugen thei leh thagau thilhitheina nei ah kingai la um ua leh, ka thu hun zikte hi Lalpa thupiak ahi ti hiau hen.

³⁸Kua’nle, zia chu a hetlo chun, ama le hetlo in um hen.

³⁹Tichun, ka gualte haw, thugen thanuam unla, pauhetlo ah thugen le khap kiu in.

⁴⁰Himaleh, bangkim mêlpha leh a dan tak ah bawl hi hen.