Read Vaiphei 1 KORINTH 15 Bible Online

1 KORINTH 15 - Vaiphei bible

1 KORINTH 15

¹Suapite haw, la kiang ua Chanchinpha ka hun gen tâk, la het ua la din zing nau kha ka hun gen thak kit hi;

²ka thugen kha la taksan bep uh hilo ah, la tukchak uh chun, zia chun hukhin in la um uh ahi.

³Keima’n ka la mu chu thil poimaw masa pen gual in ka hun hilsawn la hiu, Khrista chu Pathian Lekha thu gen gual in, I gitlo ziak un a hung thi ta’n,

⁴a vui un, Pathian Lekha thu dungzui in ni thum ni’n kaithaw in a um tai.

⁵Zia nung ah chun Kipha kiang in a kilâk a; chuleh, sawm leh nite kiang inle.

⁶Zia nung ah chun unau za nga sâng ah tam zaw te lak in, khatvei thu’n a hung kilâk a; ziate lak ah a tam zaw chu tu’hin le a dam nalai un, khenkhat vang chu a thi tau hi.

⁷Zia nung ah chun Jakob kiang in a kilâk a, zia nung ah chun apostolte kiang in.

⁸A tawp pen in, a hun lo ah piang gual, keima kiang inle a kilâk hi.

⁹Kei chu sawlchâk lak ah neupen, Pathian kochuamte ka bawlsiat ziak ah apostol ti tâk le ka hi puai.

¹⁰Himaleh, Pathian lungsiatna jal in ka hi’ding gual tak ka hi zo ta’n; chun a lungsiatna chu a thawn puai. Amau zosia sâng in ka sêm nasa zaw bawn hi; himaleh, keima sep hilo in, Pathian lungsiatna kei ah um chun a sep a hizawi.

¹¹Kei hi’n, amau hitaleu, thu chu ka gen un, la hun ging tau hi.

¹²Khrista chu thina kipat thokit ta ah gen in a um zo tangal in, bangtidan ah la lak ua khenkhat in mithi thawkitna a um puai ti thei la hiu em?

¹³Mithi thawkitna a umlo chun, Khrista le kaithaw hipua’n a.

¹⁴Khrista chu thokit lo ahi chun, ka thugen uh hi a thawn hi’n tin, la ginnau le a thawn hi’n a.

¹⁵Ahi, Pathian le diklo tak ah puang hita ding ka hiu; Pathian in Khrista chu a kaitho hi ti’n ka gen tangal un; mithite chu thokit lo hi taleu, ama chule a la kaitho lo ding ahi.

¹⁶Mithite chu thokit lo a hiu chun, Khrista kha le thokit lo ding ahi.

¹⁷Khrista chu a la thokit lo ahi chun, la ginnau le a thawn hin ti’n, la gitlonau ah um zing nalai ding la hiu hi.

¹⁸Chun, Khrista ah a la thite kha le a mangthai hita’n au.

¹⁹Zia dam sung â ding bep ah Khrista kineppi I hiu chun, mi lak lak ah lungsiat um pen hi’ tiu.

²⁰Himaleh, Khrista chu thina kipat kaithaw in a la um ngei ah, a thisate thawkitna mapuipa ahi tai.

²¹Mihing pakhat ziakin thina a tung a, mihing pakhat ziak ma’n thina kipat thawkitna le a hung um tai.

²²Adam ah chun mi zosia a thi tau a, zia gual ma chun Khrista ah chun mi zosia suk-hin hiding a hiu hi.

²³Himaleh, mitin chu a um ding dan gual chiat un um in au: Khrista chu ga masa hi’ntin, a hung phât tak leh, Khrista â zosia chule hi’nau.

²⁴Vaihawmna zosia leh lalna leh thuneina zosia a suksiat zaw phat leh lenggam chu, Pa Pathian kiang ah pedok ta’n tin, ziaphat chuleh, tawpna chu tung ta’n a.

²⁵Mêlma zosia a chotden masia, ama’n vaihawm ding ahi ngal a.

²⁶Mêlma nunung pen sukmanthai ah um ding chu thina ahi.

²⁷“Pathian in bangkim a keng nuai ah a chotdensak tai,” ti ahi ngal a. “Bangkim a nuai ah chotden,” a ti hin bangkim a nuai ah chotdensakpa chu a huam puai ti a kilang hi.

²⁸Bangkim chu a thunuai ah koi ahi’phat leh, Chapa ngei chule a nuai ah bangkim chotdensakpa thunuai ah um ta’n tin, Pathian chu bangkim ah bangkim hita’n a.

²⁹Ahiloleh, mi thisate min ah baptisma changte hin bang lawchâk ding a nei awm? Mi thisate thokit lo tak tak ding hi taleu, amau thasâng ah bang ding ah baptisma chang sek a hiu em?

³⁰Keihaw hile bangatia hundan kâl si’n ah lauthawn um ah um zing ka hiu em?

³¹Unaute haw, I Lalpau Jesu Khrista ah nanghaw ka hun suanna zal in, nisi’n in ka thi sek hi.

³²Mihingte kinepna mai mai a la hileh, Ephesa ah gamsa hângte tawh ka kisual uh khan, bang phatchuamna ka mu diam? Mithite kaithaw kit lo ding a hiu chun: “Ne leh dawn in um hitiu, jing leh thi ta ding I hiu”.

³³Thepzaw in um kiu in: “Gual phalo in nunchan pha a susia sek hi”.

³⁴Ngaituana pil leh dik tak hun nei unla, gitlo bawl ta kiu in; mi khen khat hin Pathian hetna a nei puau hi; la jachâkna ding ua ka gen ahi.

³⁵Mi khenkhat chun, “Mithi bangti thawkit ding a hiu em? Bang gual taksa tawh hung ding a hiu em?” tiding la hiu in.

³⁶Mingol! La tu’ sekte hile, a thi zet lo chun a hung hingdok ngai puai.

³⁷La tu’ chule gehuchang hi’n, thâichi dang hitaleh, a taksa ding tawh la tu’khawm pua’n, a mu bepcha la tu’ in.

³⁸Himaleh, a chi um dan chiat ua chun, Pathian in a ti dan dan in a taksa ding chu a hun piai.

³⁹Taksaphe zosia hi a kibang pua’n, mihing taksaphe hi a chuam ah, sanga â leh vacha â te le a chuam kit hi.

⁴⁰Van taksa leh lei taksa te le a um hi; himaleh, van taksa lopina tawh, lei taksa lopina chu a chuam chuam ahi.

⁴¹Nisa lopina chu chi khat ahi’n, thapi lopina chu chi khat, aksite lopina chule chi khat ahi; aksi pakhat leh aksi dang chule a lopinau a kibang puai.

⁴²Mithi thawkitna le zia gual chu ahi. A kitu’ chu a mangthai thei in, a kikaitho chu vang a mangthai kit thei puai.

⁴³Tawm tak ah tu’ in a um ah, lopi tak ah kaithaw in a um hi. Hatlo tak ah tu’ in a um ah, thilhithei tak ah kaithaw in a um hi.

⁴⁴Mihing pianken taksa ah tu’ in a um ah, thagau lam taksa ah kaithaw in a um hi. Mihing pianken taksa a um leh, thagau lam taksa le a um hi.

⁴⁵Tichun, “Mi masa pen Adam chu mihing a hung hi tai,” ti zik ahi’n; Adam nunung zawk chu hinna pia thei thagau a hung hi tai.

⁴⁶Himaleh, thagau lam um masa lo in taksa a um masa’n, zia nung ah chun thagau lam chu a hung um hi.

⁴⁷Mi masa chu lei ah siam ahi’n, leivui mihing ahi; himaleh, a pani’na pa chu van ah kipat hung Lalpa chu ahi.

⁴⁸Lei mite chu lei ah siam gual chu a hiu a, van lam mite chule van ah mi gual a hiu.

⁴⁹Lei lam mi mêlpu ah piang I la hi gual un, van mi mêlpu ah siam in hung um ding I hiu.

⁵⁰Suapite haw, taksa leh thisan hin Pathian gam lua thei pua’n tin, a muatthei hinle a muatthei lo chu lua thei pua’n a.

⁵¹Ngai un, thugûk hun hil ding ka hi! I leng un thi khel puai tiu;

⁵²ahi’n, pengkul chu a hung git phat leh, mitphet kâl sung bep ah thakhat ah I leng un sukdanglam in um chiat hitiu; pengkul chu hung gi ding ahi ngal a. Ziaphat chuleh, mi thisate chu a mangthai thei talo ding ah kaithaw hi’n tiu in, eihawle sukdanglam in um chiat tai tiu.

⁵³Zia taksa muatthei hin muatthei lona chang intin; zia taksa thithei hin thi’thei lona chang ta’n a.

⁵⁴Tichun, zia taksa muatthei hin muatthei lona a chan ah, zia taksa thi thei hin thithei lona a chan phat leh: “Thina chu zawna’n a val zo tai”.

⁵⁵“Aw thina, la zawna khoi ah a um tam? Aw thina, la gu chu khoi ah a um tam?” ti thu kizik hi guitung ta’n a.

⁵⁶Thina gu’ chu gitlona ahi’n, gitlo thilhitheina chu dan ahi.

⁵⁷Himaleh, Pathian chu pâk in um ta hen, ama’n Lalpa Jesu Khrista ah chun zawna chu ei pia tai.

⁵⁸Ziaziakchun, ka doitakte haw, suklîng zaw lo ding ah det tak in um unla, Lalpa nasepna chun theitawp sua zing un; la sepgimnau chu Lalpa ah chun a thawn puai, ti la he ngal un.