Read Vaiphei 1 KORINTH 16 Bible Online

1 KORINTH 16 - Vaiphei bible

1 KORINTH 16

¹Tu’hin, mithiangthote â ding thawlawm thu ah chun: Galatia ah kochuamte ka hil gual kha a la zui tau in.

²Hapta ni masa pen ah chun mitin in la law dawu vâl zosia koidok in, khol unla, ka hung phat leh dawl khawm ngailo dingin.

³Tichun, ka hung phat leh, mi pha la sak pen uh chu lekhathot tawh la thilpiak uh chu Jerusalem ah ka vathaksak ziang thei dingin.

⁴Keima le ka chia kilawm ahi chun, amau chu vakitonpi ziang ing ka.

⁵Makedonia hun chot malam ka tup in, Makedonia ka chot zaw phat leh la kiang un hung ding ka hi.

⁶La kiang un ka hung châm mai thei ah, phalbi sungsia le a hi mai thei hi; chutia, ka chiana ding lam lam ah lei thakdaw ding un.

⁷La kiang ua hung bân malam vuat chu ka nuam puai, LALPA‘n lem a sak leh la lak ua sawt deu châm ka nuam hi.

⁸Ahi’n, Pentikost ni masia Ephesa ah hin hung châm tadi ing ka.

⁹Phachuam tak ah sepna ding kotkhak lian tak hon piak in ka um ngal ah; a dâlte le chu a tam ui.

¹⁰Timothi a hung leh, la lak ua bangma a lauthawn ding umsak kiu in, ama’nle keima gual tho hin Lalpa na a sêm ngal a.

¹¹Kuama’n a la musit kiu in. Ka kiang a hung tun theina dingin, thamuang tak in chiasak unla, unau dangte kha tawh mu pai kinêm in ka ngâk zing hi.

¹²I suapipau Apollo kha unau dangte kha tawh, la kiang ua hung dingin ka tîl nasa ma ma in; himaleh, tu’ziang ah hin a hung nuam him him puai. Hun lemchâng a nei phat leh hung in a.

¹³Kivêng unla, ginna’n ding det in, hangsan tak leh hat tak in um un.

¹⁴La thilhi zosiau chu hepina ah bawl hi hen.

¹⁵Suapite haw, Stephanas-te sunghaw kha Akaia gam ah gingtu masa pen a hiu ti la hiau a, mithiangthote nasepna hin theitawp suan a pang ui.

¹⁶Zia gual mite leh, amau naseppi leh sepgimpi taphot kiang ah chun lut dingin ka ni la hiu.

¹⁷Stephanas, Fortunatas leh Akaikas a hung uh hi ka kipak hi, la umlo uh le a kilang puai.

¹⁸Amau chun ka thagau leh la thagau uh ei suhal ngal un. Zia gual mite hi chawihoi un.

¹⁹Asia gam ah kochuamte’n chibai a hun bûk ui; Akuila leh Priska leh a In ua kochuam kikhawm sekte’n le Lalpa min in chibai a hun bûk ui.

²⁰Suapite zosia’n chibai a hun bûk ui. Kichawp thiangtho in chibai kibûk un.

²¹Kei Paul hin zia chibai bûkna hi ka khut ngei ah ka zik ahi.

²²Lalpa hepi lo taphot chun, hânsia dong uh hen. I Lalpau chu, a hung hi! Maranatha!

²³I Lalpau Jesu hepina la kiang un um ta hen.

²⁴Khrista Jesu ah chun ka hepina la kiang un um ta hen. Amen.