Read Vaiphei 1 KORINTH 3 Bible Online

1 KORINTH 3 - Vaiphei bible

1 KORINTH 3

¹Suapite haw, thagau mite gual in la kiang un thu ka gen thei puai; Khrista ah nausente, taksa mite kiang ah gen gual in ka gen la hiu.

²Bugum hilo in, nawitui in ka hun vâk tadi la hiu; bugum nethei la hi nailo ziak un, tu’tiang hinle la nethei nai puau hi.

³Taksa mi la hi nâk lai ziak un, la lak ua ki’îtsikna leh kinaknate a um laisia chu, mihing khawsak ah khawsa la hi nâk lai ziak un, taksa mi hi nalai lo la hiu em?

⁴Khenkhat in, “Kei Paul pawl ka hi,” a tiu ah; a dang khat in, “Kei Apollo pawl ka hi,” a tiu chun, mihing mai mai hilo la hiu em?

⁵Apollo chu bang a hem? Paul chu bang a hem? La gin theina ding ua, LALPA‘n nasem ding ah a guat dungzui ah nasemte a hiu.

⁶Keima’n ka phu ah, Apollo in tui a buak ah, Pathian in a khansak ahi.

⁷A phutpa chu bangma a hipua’n, a tuibuakpa chule bangma ahi diak puai; Pathian bep in a khansak thei ahi ngal a.

⁸A phupa leh a tuibuakpa chun a tup uh kibang ahi; mitin in ama sepgim ga chu, a sep dungzui un kimu chiat ding a hiu.

⁹Kei uh chu Pathian naseppi, a suakte ka hiu in, nang uh chu Pathian louma leh Pathian In chu la hiu hi.

¹⁰Pathian hepina ka kiang ah piak ahi dungzui in, Insa lamkai khutthiam tak gual in keima’n suangphûm ka lem in, midang in a chung ah In a sau hi. Mitin in a chung ah a sak dan uh chun chingthei chiat tau hen.

¹¹Suangphûm kiphusa lo chu kuama’n suangphûm dang a phu thei puai, zia suangphûm chu Jesu Khrista ahi.

¹²Zia suangphûm chung ah chun mitin in sana a hem, dangka a hem, suang mantam a hem, thing a hem, bupawl a hem, hampa a hem in sa taleu,

¹³mitin nasep chu tâklat in hung um intin; zia ni chun, mei ah etchetna um ding ahi, mei chun mi tin nasep chu ahi gual takin hun tâklang ta’n a.

¹⁴Kua Insakle In suangphûm chung ah a um zing chun, zia mi chun kipakman chu mu ding ahi.

¹⁵Kua naseple a kat tum chun, Insapa chun chân in ah; ama chu vang hukdam in um in ah; ahi’n la, mei ah chiatheng gual bep hi’n a.

¹⁶Nangmau chu Pathian chênna In leh, Pathian Thagau chênna la hiu ti helo la hiu em?

¹⁷Kua’nle Pathian chênna In chu a suksiat chun, ama chu Pathian inle susia ding ahi. Pathian chênna In chu a thiangtho ah, zia In chu nangmau la hiu hi.

¹⁸Nang leh nang kithêm kin. Pil kisa la hi chun, la pil theina dingin mingol hung chang phot in.

¹⁹Zia khawvel pilna hi Pathian ngai in ngolhuai tak ahi ngal a: “Ama’n mipil chu a dawha thûknau in a man sek hi,” ti zik gual in.

²⁰Chuleh, “LALPA‘n mipilte ngaituana chu bangmalo ahi ti a hia’i,” ti zik gual in.

²¹Ziaziakchun, kuama’n mihingte suang ki’hen. Bangkim hi nang uh â ahi;

²²Paul le, Apollo le, Kipha le, khawvel le, hinna le, thina le, thil um laite le, thil um dingte le; a leng un nang uh â ahi;

²³nanghaw chu, Khrista â la hiu a; Khrista chu Pathian â ahi.