Read Vaiphei 1 KORINTH 4 Bible Online

1 KORINTH 4 - Vaiphei bible

1 KORINTH 4

¹Keimau hi Khrista nasem leh Pathian thugûk enkolte gual in ei ngai un.

²Zia enkoltu hi’na ah hin, mi ginum hi a kûl hi.

³Ahi’n la, nanghaw’n lei etchetnau leh mihing thutanna ah etchet chu kei â dingin thil neucha ahi. Keima le ka ki-enchian ngai puai.

⁴Bang ma kithiammawna ding ka kihe puai; ahi’n la, zia chun thiam ei chansak diak puai; ei enchianpa chu Pathian ahi zawi.

⁵Chutichun, a hun masang in bangma genchian kiu in; Lalpa chun thim ah thil sêlgukte chu vâk ah hun tâkdok intin, lungthim ah tupnate le hilang in a. Ziaphat chuleh, mi zosia’n Pathian ah kipat pakchak law chiat ta’n au.

⁶Suapite haw, la phatna ding un zia thute hi Apollo leh kei chung in ka bel ah, “A kiziksa tilo phot chu,” ti umdan tak hi keimau ah kipat la ziltheina ding un; chutichun, la lak ua kuama’n pakhat suang ah pakhat la tawden lona ding un.

⁷Nang kua’n a hun chuam bawl diak ah a hem? La chan ahi ngal leh, bangatia la chan lo gual ah la kisak theipi a hem?

⁸Tu’hin chu la dawi zosia la nei tai! La hausa tau hi! Keimau panglo inle vai la hawm thei tau hi! Kei unle nang uh tawh vai ka hawmkhawm theina ding un, leng in hung pang leu chun ka nuam ngei!

⁹Pathian in kei uh sawlchâkte hi thi ding ah guatsa gual in, a nunung pen ah ei lâkdok hi’n ka ngai hi. Khawvel leh vansawlchâkte leh mihingte mit mu ah etnop ah siam in ka um un.

¹⁰Kei uh hi Khrista ziakin mingol ka hiu ah, nanghaw vang Khrista ziakin mipil la hitau hi. Ka jawngkhal un, nang uh vang la hât nau hi. Mi choisa’n in la um un, kei uh mi mu tawm in ka um ui.

¹¹Tu’tiang hin gilkial leh dangchâk in ka um un, sil leh chên ka tasam un, mi khutthak noina ka hiu a, In leh lou ka nei puau hi;

¹²khut ah nasem in ka gim ui. Min ei hosiat ua leh ka maljawl un, ei sukgenthei ua leh ka thuak ham ham un;

¹³ei gensiat ua leh nêm tak in ka hil ui. Tu’ni tiang in, khawvel buaksia, thilbuak zosia gual ka suak tau hi.

¹⁴La jachâkna ding ua ka zik a hipua’n, ka cha doitakte hilna gual ah ka zik ahi zawi.

¹⁵Khrista ah mihiltu sîng khat nei maleu chin, pa vang tampi la nei puau hi. Keima hi chanchinpha ziakin, Khrista Jesu ah la pau ka hi.

¹⁶Ziaziakchun, ka hun ni la hiu, ka umdan entonte hitau in.

¹⁷Zia ziak tak ah hin, Lalpa ah ka chapa doitak leh ginum, Timothi chu ka hun sawl ah, ama chun mun tin ah kochuamte kiang ah ka thugente leh Khrista Jesu ah ka lampi hawnate chu, hun hetdawsak ding ahi.

¹⁸Chun, keima la kiang ua hung kit lo ding gual ah ngai in, mi khen khat la ki-uansak un.

¹⁹Ahi’nla, LALPA‘n lem a sak chun, chomlokâl in la kiang un hung ing ka tin, mi kisatheite thugen hilo in, a thil hitheinau chu hawldok ding ka hi.

²⁰Pathian gam chu thu’n a um pua’n, thilhitheina’n a um zawi.

²¹Aleh, bang la dawi zawu em? Tiangpum tawh hung ding ka hem? Ahiloleh, lungniang tak ah hepina tawh nunnem tak in ka hung zaw diam?