Read Vaiphei 2 KORINTH 11 Bible Online

2 KORINTH 11 - Vaiphei bible

2 KORINTH 11

¹Ka ngol deu nau ah hin lei ngaithiam uh ka nuam hi. Ei ngaithiam mai un!

²Pathian thangsiatna’n ei vei ka hun thangsiat; Khrista kiang ah nungak thiangtho gual ah ka piakdaw theina dingin, pawsal khat ka hual piak la hiu.

³Ahi’n la, gûl chun dawha thiam ah Evi a thep gual khan, Khrista ah takna leh thianthona ah kipat la lungthim uh susia kha’n au ti ka lauthawng hi.

⁴Keimau gen hilo, Jesu dang chanchin hung gen uh hen la, la chan khâk lo uh thagau leh chanchinpha dang hung gen taleu, ziate chu a la pom in kipumpiak ngal ding la hiu a.

⁵Zia gual sawlchâk liante chu bang lam lam ah le ka phâk lo ka gingcha puai.

⁶Thu gen lam thiamlo maleng, hetna lam ah chun ka mawl puai; zia chu bang lam leh bangkim in la kiang un ka tâklang tau hi.

⁷Pathian chanchinpha a thawn ah ka gen ziak un, choisa’n ah la umtheina ding ua ka kisukniam uh chu, thil hi’khial ka hiu em?

⁸La nau ka septheina dingin, kochuam pawl dangte kiang ah law la’n, amau siatna ka bawl piak kha sek ahi.

⁹La kiang ua ka um ah, ka tâksap lai khan, kuama ka giksak diak puau a; Makedonia ah kipat unau hungte khan ka tâksap zosia ei piau a. Nanghaw sukbuai ka tup pua’n, sukbuai lo tup jel ing ka.

¹⁰Khrista thutak keima ah a um gual hin, Akaia gam ah zia ka suanna hi kuama’n ei sukbei piak pua’n a.

¹¹Bang ziak a hem? Ka hepi lo ziak a hem? Pathian in ka hun hepi zia chu a hia’i.

¹²A nasep uh kisaktheipi ah, kei uh sep gual sêm kitite chu ka suktân theina dingin ka sep chu ka sêm zom jel hi.

¹³Zia gual mite chu Khrista sawlchâk ah kisiam in, sawlchâk lêm, mi dawha bawl ah nasem ahi zawu hi.

¹⁴Zia chu thilmak ahi puai! Setan ngei le vâk vansawlchâk gual in a kisiam danglam sek hi.

¹⁵Ziaziakchun, a nasemte chule dikna nasêm gual in kisiam taleu thilmak ahi diak puai. A tawpna chun a thilbawl dan uh hung kilang ding ahi ngal a.

¹⁶Gen kit ing ka, kuama’n ngol eisa kiu hen; ahi’n la, ngol lei sak ua leh le, neukhat bêk ka suan theina dingin, mingol gual in ei ngai un.

¹⁷Ka gen hi Lalpa thuneina ka gen ahi puai; ka suan taksanna hin a ngol gual in ka gen zaw ahi.

¹⁸Mi tam tak in khawvel thilte a suan ziak un, ke’n le suang ing ka.

¹⁹Nanghaw vang mipil la hiu in, mingolte chu lungawi tak in la hethiam sek ui.

²⁰Min suak in hun ngai uh hen la, hun ne zo kei in, phajesa’n, bangma’n hun ngailo in la maijang uh hun bêng leule la daw sek ui.

²¹Zachât um maleh, I hatlo’nau gen ding ka hi! Mi kuale bang lam ah le a kisuan chun, ngol huai tak in gen mai leng, keile ka kisuang hi.

²²Hebrai mi a hiu maw? Kei le ka hi. Israel mi a hiu maw? Kei le ka hi. Abraham suante a hiu maw? Kei le ka hi.

²³Khrista nasemte a hiu maw? Mingol gual in ti mai leng, keima hi ka hizaw diak hi. Sepgimna lam in ka ha’pan zaw’n, thokzaw lo ding tiang hial ah vokna le ka tuak ta’n, suangkul ah le a khawk zaw diak in, a thilo bep ah koi in ka um in.

²⁴Judate lak in vokna sawmli vei a tinna ding khatvei bep ah sam in, zia gual chu ngavei ka tuak tai.

²⁵Jepna thumvei ka tuak ta’n, khatvei suang ah se in ka um ah; Long siatna’n thumvei ka pang ta’n, ni khat leh jan khat tui thûk tak chung ah tawvêl in ka um a.

²⁶Ka khualzinna’n tui lau umna lak ah te, mi suamte lau umna lak ah, ka chipite lau umna lak ah, gamthip lau um leh tuisuagiat lau um lak ah te, unau lêm lau um lak ah te;

²⁷sepgimna leh thokgimna, i-mut lona ah tamvei, gilkial leh dangchâk ah umnate, an ngolna tamvei tak, dap thokna leh ngawnchang ah umna ah te leh,

²⁸chuleh, zia tilo ahinle, kochuam pawl zosia ka ngaituana ziakin nisi’n ah ei del zing le a um hi.

²⁹Mi hatlote ka khawksak lo kua a um awm? A kipûk, ka veinat lo kua a hem um?

³⁰A suang tho tho ding ka hi chun, ka hâtlo dan ei kawkmu thei thilte chu suang ing ka.

³¹Lalpa Jesu Pathian leh Pa, (kumtuang in ama chu pâk in um zing hen!,) ama ah chun zuau ka gen puai.

³²Damaska khua lengpa Aretas nuai ah gam ukpa chun ei man dingin Damaska khawpi a vênsak a;

³³himaleh, tukvan ah kulbâng jul ah chun bawm in ei khâithau ah; a khut ah kipat chun ka suakcha tai.