Read Vaiphei 2 KORINTH 12 Bible Online

2 KORINTH 12 - Vaiphei bible

2 KORINTH 12

¹A phatchuamna ding umlo maleh, suang him him ding ka hi; Lalpa kiang ah kipat kilâkna leh hiatsakna thu hun gen nalai ing ka.

²Khrista ah chun mi pakhat, van thumna tiang ah lâk to ah um ka hia’i; zia chu kum sawm leh li masang kha a hita’n, taksa a hem, taksa umlo a hem ka gen thei puai, Pathian in a hia’i.

³Ahi’n, zia chu taksa um a hem, umlo a hem ka hepuai, Pathian in a hia’i.

⁴Paradis ah lâk to in a um ah, thu gendaw ngailo, mihing genthianlote a hia’i ti ka hia’i.

⁵Zia gual mi chu suang ing ka tin, keima’n vang ka hatlona tilo ngal suang pua’ng ka.

⁶Suang nuam lengle a ngol hi pua’ng ka, thutak gen ka hingal a. Himaleh, kisûm ing ka; chutilochun, kuale ei mu tapo in ei mu gual uh leh, ka thu a het gual sâng un ei ngai thupi zaw kha’n au.

⁷Ahi’n, hiatsaknate chu a nasat ma ma ziakin ka kingaisân tâkluat lona dingin, ka taksa ah hin ling ei pia ahi; Setan sawlchâk, khutthak noina ei mang dingpa chu ka zawtheina ding in; chutiloleh kingaisâng talua kha’ng ka.

⁸Zia thu ah chun ei nutsia theina dingin, Lalpa kiang in thumvei hial ka don ta’n;

⁹himaleh, ama’n ka kiang in, “Ka hepina nang â di’n a hun hi, ka thilhitheina hi hâtlona sukbukim ah um sek ahi,” a ti’n. Ziaziakchun, Khrista thilhitheina chu ka chung ah a um theina dingin, kipak tak in ka hatlonate hi suang zaw ta’ng ka.

¹⁰Ziaziakchun, Khrista ziakin hatlonate, hosiatnate, châtganate, sukgentheinate leh buainate ah hin ka kipak sek hi; ka hâtlo phat si’n leh ka hat sek ngal a.

¹¹Ka la ngol na e! Nang uh ei bawl ka hi. Ei chawihoi zaw dingte la hiu in; bangma hilo maleng, sawlchâkliante chu ka phalâ him him pawngal a.

¹²Sawlchâk hi’na teptênate chu: sekdona, teptênate, thilmakte leh thilhitheinate haw hin la lak un a kibawl tak tak ahi kha.

¹³Ka hun suk giksak lona kha a hilo ngal leh, kochuam dangte sâng ah la nuainun zawknau bang a hem? Zia ka hi’khelna chu ei ngaidam un!

¹⁴Ngai un, la kiang ua hung ding ka guat a thumveina ahi tai. Hun sugik pua’ng ka, la thil nei uh hawl ka hipua’n, nanghaw hawl ka hizawi. Chate’n nu leh pa â ding a khol ngai puau ah, nu leh pa’n chate â dingin a khol piak ding uh ahi zawi.

¹⁵Kei vang kipak tak in nang uh â dingin kimang ing ka tin, kimang tum kei ziang ing ka. Ka hun hepi tâkluat ziak ah lei hepi lo ding uh a hem?

¹⁶Keima’n hun sugiksak lo ka hi ti he tau in. Ahi’n la, zuauthepna ka hun mat in la ngai jel un.

¹⁷La kiang ua ka hun sawlte mang in ka hun phatchuampi em leh?

¹⁸Tita chu ka jawl ah, ama tawh suapipa ka hun sawl hi. Tita chun nanghaw ziak ah phatchuamna a nei em? Lungthim munkhat ah um khawm hilo ka hiu em? Kalsuan kibang ah suan khawm hilo ka hiu em?

¹⁹La kiang ua thiam kichan bep gual ah ei ngai la hiu em? Khrista ah chun Pathian âng ah thugen ka hiu. Doitakte haw, bangkim hi nanghaw siamphatna ding ngen ahi.

²⁰Ka hung phat leh ka doigual ah ka hun mulo ah, kei le la doigual un ei mu paw kha’n lau ti leh, kinakna, kithangsiatna, lungnatna, kilanna, kigensiatna leh buainate hung um kha’n a, ti ka lau hi.

²¹Ka hung kit phat leh ka Pathian in la lak un ei himualpho khan tin, tu’ma lam ah thilhikhialte lak ah thilbuak hi’te, jawntatte leh hûk chîng ah haisan gaw lo mi tam tak chu kâ khum kha’ng ka ti le ka lau hi.