Read Vaiphei 2 KORINTH 13 Bible Online

2 KORINTH 13 - Vaiphei bible

2 KORINTH 13

¹Zia hi la kiang ua ka hung thumveina ding ahi tai. “Hiatpitu pani a hem, pathum a hem kam ah chun thu zosia sukdet ding ahi”.

²Tu’ma lam thil a la bawlkhialte leh, midang dangte khale ka hung niveina khan ka la zilgai ta hen; tu’ ka umlo sung ah hinle ka hun zilgai hi; hung vâng vâng leng jainem lo hial ding ka hi.

³Khrista chun keima kiang ah thu gen tak tak na a hem ti het la nuam ui. Ama chu nanghaw soisa dingin a jawngkhal pua’n, nangmau ah chu thilhithei tak ahi.

⁴Ama chu jawngkhal tak in khetden in um maleh, Pathian thilhitheina ziakin a hing zing tai. Kei hawle ama ah chun hatlo ka hitau; ahi’n la, nanghaw lam ah Pathian thilhitheina ziakin ama tawh hing ing kau.

⁵Ginna ah chun la umnau em ti nangmau ngei kipatep sek unla, ki-enchian un. Ahiloleh, nangmau ah chun Khrista a um hi ti la kihechian puau ah a hem? Doilo la hilo ngal uh chun!

⁶Keihaw vang doilo in ka um puau, ti he na’n lau ti ka gingchâi.

⁷Ahi’n, thil la sukkhial lona ding un Pathian kiang in ka don a; zia chu keihaw doi um ah ka lat theina ding uh hilo in, a pha taphot la hitheina ding uh ahi zawi, kei uh chu doilo gual in um ta leng uh le,

⁸thutak ding ah beplo ngal in thutak do-na dingin bangma hi’thei pua’ng kau.

⁹Keihaw hâtlo maleng un, la hât ua leh ka kipak sek ui. La bukimna ding un ka pauchap piak sek ui.

¹⁰Ziaziakchun a susia ding hilo in, a siampha dingin, LALPA‘n thuneina ei piak dungzui in, la kiang ua ka um phat leh na tak ah ka vau lona dingin; la kiang ua ka umlo lai hin ka hun zikthaw ahi.

¹¹A kichaina dingin, suapite haw, mangpha! Kisutûp unla, lungmuang tak in um un; lungthim munkhat puu inla; kicham dial dial in um un; hepina leh chamna Pathian chu la kiang un um zing in a.

¹²Kichawpna thiangtho in chibai kibuk un. Mithiangtho zosia hin chibai a hun bûk ui.

¹³Lalpa Jesu Khrista lungsiatna, Pathian hepina leh Thagau Thiangtho kithuapina chu la leng ua kiang in um ta hen. Amen.