Read Vaiphei 2 KORINTH 2 Bible Online

2 KORINTH 2 - Vaiphei bible

2 KORINTH 2

¹Keima lam thu ah chun, lungngai pum ah la kiang ua hung talo dingin ka tup tai.

²A ziak chu, keima’n ka hun suklungngai ahileh, ka suklungngaite longal chu ei sukipak ding kua a hem?

³Tichun, zia ma chu ka zik ahi, achutiloleh, ka hung phat leh, ka kipakna dingte lak ah lungngaina ding mu jaw’ng ka tin; ka kipakna chu la leng ua kipakna ahi ngei ding ka gingcha ngal a.

⁴Lunggil ah haksa leh lungkham tak ah mitthi luang pum in ka hun zik ahi; zia chu suklungkham ah la umna ding uh hilo in, la chung ua hepina thupi tak ka nei dan uh la hiat thei zawkna ding un ahi.

⁵Himaleh, mi kua’nle ahi’lungkham chun, keima bep ei hi lungngai ahi pua, (ka ti tâkluat lona dingin) la leng un ei hi’lungngai chiat ahi.

⁶Zia gual mi â ding ah chun, mi tam tak gawtna chu a hun tawk hi.

⁷Ngaidam unla, thamuan tau in, chutilochun a lungngaina’n val zo kha’n a.

⁸Ziaziakchun, ama la hepinau chu hi’det dingin ka ni la hiu.

⁹Ziaziak ma hin ka zik ahi, bangkim ah la thu awi leh thu awilo uh hetchianna dingin.

¹⁰Bang lam ah le mi la ngaidam uh chu ke’n le ka ngaidam ah, ka ngaidamsa chu bangkim ah ka ngaidam ah, nangmau ziakin Khrista ma ah chun ka ngaidam ta ahi.

¹¹Chutilochun Setan in lemchâng mu kha’n ah, a dawha chu la I hemaw pawngal un.

¹²Khrista chanchinpha gen ding ah Troas ka tun in, Lalpa ah chun kot hon piak in ka um a;

¹³himaleh, ka unaupa Tita ka mu lo ziakin, ka lungthim a muang puai. Tichun, amau nusia in Makedonia lam in ka chia tai.

¹⁴Himaleh, gâlzawna ei puipa Khrista, keimau ziak ah mun tin ah ama hetna gimtui hiatsakpa Pathian kiang in kipak thu um ta hen.

¹⁵Hukdam hizingte leh mangthai hizingte kiang ah, Pathian â dingin Khrista gimtui chu ka hingal un.

¹⁶Lawi khat â dingin thina lak ah thi’na ding gimtui ka hiu ah, lawi khatte â dingin hinna lak ah hinna gimtui ka hiu.

¹⁷Mi tam tak in, Pathian thu chu mite thêm ah sumdawnna a mat gual un, kei un vang ka mang puau a; titak zet in, Pathian sawl ah Pathian mitmu in, Khrista ah chun ka gen zawu ahi.