Read Vaiphei 2 KORINTH 4 Bible Online

2 KORINTH 4 - Vaiphei bible

2 KORINTH 4

¹Pathian hepina ziak ah zia nasepna hi ka nei ziak un ka lungthuai puau hi.

²Thil jachâk um kisêlte chu ka nusiau ah, dawha phalo chu ka mang puau in, Pathian thu chu mi thepna’n ka mang puau in, thutak chu hiatsak in Pathian mit mu in mi tin sia leh pha hetna mit ka tunsak zawu ahi.

³Himaleh, ka chanchinphau hi khû ah a um chun, mangthai zingte â ding ah khû ah um ahi.

⁴Khrista Pathian kibatpi, a lopi dan chanchinpha vâk in a salvâk theilona dingin, amau chu ahileh zia khawvel pathian hin ginglote lungthim chu a sukthûm piak ahi.

⁵Kei un keimau thu ka gen puau in, “Khrista Jesu chu Lalpa ahi,” ti leh Jesu jal ah la suakteu ka hiu chu ka gen zawu ahi.

⁶“Thim ah kipat vâk hung um hen!” ti ah thu pepa Pathian chun, Jesu Khrista mêl ah Pathian lopi dan hetna vâk ei pia ding in I lunggil uh a salvâk tangal a.

⁷Himaleh, thilhitheina chungnung chu keimau â hilo ah, Pathian â ahi ti a kilat theina dingin zia go chu leibêl ah ka koi tau hi.

⁸Langkhat langkhat in haksatna ka tuak ui; himaleh, ka lungkia diak puau ah; suklungjin in ka um un, ka lungkia diak puau hi;

⁹sukgenthei in ka um un, nutsia in ka um diak puau a; vokpâi in ka um un, hi’mangthai in ka um diak puau a;

¹⁰bangtik lai inle, Jesu hinna ka taksau ah a kilat theina dingin, Jesu thina chu ka taksau ah hin ka pu zing sek ui.

¹¹Kei uh hing dam ah umte hi Jesu ziak ah thi ding ah piakdaw ka hi mat chet ui; Jesu hinna le ka taksau thi thei ah hin a kilat theina dingin.

¹²Tichun, keimau ah hin thina’n a sêm zing in, nangmau ah chun hinna’n a sêm zing hi.

¹³Himaleh, ginna Thagau kibang I nei chiat gual un, Pathian Lekhathu’n; “Ka ging ah ka gen ahi” a ti gual in, I gin ziak un I gen uh ahi.

¹⁴Lalpa Jesu kaithopa chun kei uh le Jesu ah chun ei kaitho intin, nang uh tawh a ma-âng ah ei dinsak ding ahi ti ka hiau.

¹⁵Bangkim la phatna ding uh ahi. Hepina mi tam zaw ziak ah hi’pun ah um in, Pathian lopina ding ah kipak thu nasa tak ah la gen theina ding un.

¹⁶Ziaziakchun, ka lungkia puau hi. Ka pawlam mihing uh hi jawngkhal hiai hiai maleh, ka sung lam mihing uh nisi’n ah siamthak in a um zawi.

¹⁷Ka thokgimnau neucha, mit phet kâl bep ding hin, lopina nasa tak, kumtuang â ding ei siam piak ahi.

¹⁸Mutheite hilo in, mutheilote chu ka en zawu a; mutheite hi hun chomcha â ding ahi’n, mutheilote chu kumtuang â ding ahi ngal a.