Read Vaiphei 2 KORINTH 8 Bible Online

2 KORINTH 8 - Vaiphei bible

2 KORINTH 8

¹Suapite haw, Makedonia ah kochuamte kiang ah Pathian hepina piak ah um chu hun hiatsak ka nuam ui,

²haksatna nasa tak a tuak lai un, a chatganau huaisia leh a kipaknau nasa tak chu amau lak ah kiphalna luanglet a hung hi khawlaw dante kha.

³A nei dungzui un, ahi, a nei khêlvâl ua huangphal tak in a piau hi ti ka hetpi hi.

⁴Zia hepina leh mi thiangthote nasep piakna ding ah chun ei don ngût ngût un.

⁵Zia chule ka kinep gual lo tak in, Pathian doilam in, amau ngei Lalpa kiang leh keimau kiang in a kipemasau a;

⁶a bul a la patsa, zia hepina nasep hi nangmau ah hi’buting ngal dingin Tita chu ka don tau a.

⁷Tu’hin, bangkim a: Ginnate, thugen thiamnate, hetnate, phatchuam ngainate leh lei hepinateu la hau gual un, zia hepina hile la hau theina ding un theitawp suau in.

⁸Thupiak gual in ka gen pua’n, mi dang phatchuam ngaina’n la hepinau tak dan chu patep dingin ka gen zaw ahi.

⁹Lalpa Jesu hepina chu, a gentheina ziak ah la hung hausak theina ding un, hausa maleh nanghaw ziak ah a genthei law kha la he’nau.

¹⁰Zia thu ah chun, zia gual hin ka hun thuhil la hiu: Kum khat ma ah la la pat tâk uh, la sep mai uh hilo ah, la hi nop uh kha;

¹¹la kisak zaw gual un, la nei dan jel ua sukpitin hiding in, tu’hin sêm bukim taleu chun nang uh â dingin pha’n a.

¹²Thâtnopna a um ah, min a neilo gual hilo ah, a nei tawh kiphutawk ah a piak chu kipakpi a um ngal a.

¹³Midang gim lo ah nang uh la gimna ding ua ka gen ahi puai; la nei dan uh a kigual ah,

¹⁴la haunau chu a tâksap uh awnghukna ahi ah, amau haunale nangmau tâksap awnghukna a hung hi’theina dingin ka ti ahi zawi.

¹⁵“A lakhawm tam in a vâl a nei diak pua’n; a lakhawm tawm le a tasam diak puai,” ti a zik ahi gual in.

¹⁶Ka hun ngaikhawkna gual Tita lunggil ah le pepa Pathian kiang in kipak thu um ta hen.

¹⁷Ama’n ka dotnau chu a pom a; himaleh, ka dot ziak bep uh hilo in, ama ngei inle thanuam tak in, ama thu thu’n la kiang ua hung ding ahi.

¹⁸Ama tawh unaupa hun sawl ding ka hiu ah, ama chu chanchinpha lam ah kochuam zosia’n a pâkchâk uh ahi tai.

¹⁹Zia bep chu hilo in, Lalpa lopina ding leh ka hun doisak nau sulang dingin, zia hepina thu ah ka nasepnau ah ei kitonpi ding ah kochuam pawlte’n a guat uh ahi.

²⁰Zia thilpiak ka hawmnau ah kuama’n ei dem lona ding un ka chingthei ma mau hi;

²¹Lalpa mit mu bep ah hilo in, mihing mit mu ah le thilpha ding ka ngaituau hi.

²²Ahi’n, a kiang un ka suapipau sawl ding ka hiu ah, ama chu thil tam tak ah phatchuamngai ahi ti tamvei tak ka hechian tau ah, tu’vang ah hin a hun taksan ma ma ziakin phatchuam a ngai zaw diak hi.

²³Tita ahileh ka gualpa leh nangmau lam ah ka naseppi ahi’n, ka suapite hi chu, kochuamte sawlchâk, Khrista lopina chu a hiu.

²⁴Ziaziakchun, la hepiu hi ti hetna leh, ka suanau hetna chu kochuam haw ma-âng ah chun hun hi’lang un.