Read Vaiphei GALATIA 1 Bible Online

GALATIA 1 - Vaiphei bible

GALATIA 1

¹Sawlchâk Paul, (mihingte sawl hilo, mihingte ziak ah le hi diak lo, Jesu Khrista leh mithi lak ah kipat kaithopa, Pa Pathian ziak ah hizaw) leh,

²ka kiang ah um suapite zosia hin, Galatia gam ah kochuamte kiang in:

³Pa Pathian leh I Lalpa Jesu Khrista ah kipat hepina leh chamna chu la kiang un um ta hen.

⁴Ama chun I Pathian leh I Pau doigual ah, tu’lai khawvel gilo tak lak ah kipat ei hukdaw theina dingin, I gitlonateu ziakin ama ngei chu a hung kipiak tâk ziak in,

⁵Pathian kiang in lopina kumtuang in um ta hen, Amen.

⁶Khrista hepina ziak ah a hun kopa nusia ah chuti thut ah chanchinpha chuam lam ah la kiheimangsan ziang uh hi mak ka sa ahi.

⁷Chanchinpha dang um a hipua’n, nangmau hun subuai in, Khrista Chanchinpha sukdanglam nuam kuate a hem a la um ahi.

⁸Himaleh, keimau a hem, van ah kipat vansawlchâk inle, chanchinpha la kiang ua ka gen uh hilo ngal, chanchinpha dang him him a gen uh chun, hânsia dong in um hen!

⁹Tu’ ma ka hun gen gual uh khan tu’hin le ka gen kit ahi; chanchinpha la la don tâk uh tilo ngal chanchinpha dang kua’nle a hung hil chun, hânsia dong in um hen!

¹⁰Ahileh, tu’hin mihing doisakna a hem ka hawl, Pathian doisakna? Ahiloleh, mihing kipaksak gua ka hem? Mihing kipaksak mai ka hi zing chun, Khrista suak hi pua’ng ka.

¹¹Chutichun, suapite, ka chanchinpha gen kha mihing lam ah ahi puai ti ka hiatsak la hiu.

¹²Mihing ah kipat ka mu le ahi diak pua’n, mi ei hil le ahi diak pua’n, Jesu Khrista kilâkna ziak ah ka mu a hi zawi.

¹³Judate biakdan ah, ka ni dang lai umdan la he zo tangal un; khatia Pathian kochuamte nasa tak ah ka sukgenthei zing kha.

¹⁴Chuleh, pu leh pate thugosia chung ah phatchuam ka ngai nasat diak ziakin, Judate biakdan lam inle ka chipite lak ah ka khan gualte tam tak chu ka la khêl tai.

¹⁵Chuleh, ka nu gilpi sung ah kipat ei la khenchuampa leh hepina ziak ah ei kopa Pathian chun,

¹⁶Jentelte lak ah a chanchinpha ka gen theina dingin, a chapa chu lungdam tak ah keima ah a kilatsak lai khan, taksa leh thisan tawh kiho hilo in,

¹⁷Sawlchâk ka hi masang ah, sawlchâk a la hisate kiang ah Jerusalem ah vachia diak lo in, Arabia gam ah ka chia mang pai zaw ngal ah; ziazaw chun Damaska khua ka hung kit tai.

¹⁸Chun, kum thum a bei nung in Kipha ve dingin Jerusalem ah ka vachia to ah, a kiang in ni sawm leh ni nga ka châm a.

¹⁹Sawlchâk dangte vang Lalpa suapi Jakob tilo ngal kuama ka mu puai.

²⁰La kiang ua thu ka zikte hi Pathian mit mu inle ka zuau puai.

²¹Zia nung ah chun Suria leh Kilikia gam ah ka hung a.

²²Chuleh, Judea gam ah kochuamte, Khrista ah umte mêlhet ka la hinai pua’n.

²³Tu’ma lam ah ei sugentheipa khan ni dang ah ginna thu a la sukbuai chu tu’hin a gen zaw tai, ti bep a la hiau a.

²⁴Tichun, keima ziakin Pathian a chawihoi tau ahi.