Read Vaiphei GALATIA 2 Bible Online

GALATIA 2 - Vaiphei bible

GALATIA 2

¹Chuleh, kum sawm leh li nung in Tita le pui in, Barnaba tawh Jerusalem khua’n ka vachia kit un.

²Hiatsakna ziak ah vachia ka hi’n; Jentelte lak ah chanchinpha ka tângkopi chu ka vahil a; milian deute chu a chuam in ka hil a; achutiloleh a thawn in tai kha’ng ka tin, Ahiloleh, a thawn ah tai ka hi’lona ding in.

³Himaleh, Tita ka kiang ah um chule Grik mi himaleh, zektansak tei tei ahi puai.

⁴Zia chu unau tak lo, a gûk ah pui lût ah umte suak ah ei lutsak theina ding ua, Khrista Jesu ah thawvenna I nei uh entha ding ah hung lutte ziakin ahi.

⁵Himaleh, chanchinpha chu nang uh â ding ah bit tak ah voptup ahi theina dingin, mitphet kâl maile ka kipelut puau hi.

⁶Chuleh, hi’na nei deute, (bang tawhbang hi’na nei maleule kei â dingin lamdanna a um puai; Pathian in kuama a khen chuam puai) zia min nei deute chun bangma ei belap piak chuam puau in;

⁷chutinâk sâng chun, zektante kiang ah chanchinpha chu Peter kiang ah vopsak ahi gual in, zektanlote kiang ah chanchinpha chu kei kiang ah vopsak in a um hi ti a het phat un,

⁸(zektanlote sawlchâk hiding ah Peter ah sêmpa chun Jentelte sawlchâk hiding in keima ah a sêm ngal a.)

⁹Tichun, hepina kei kiang ah piak ah um chu a mu phât un, Jakob, Kipha, Johan leh Inkhuampi ah a ngaiteu chun, kei uh Jentelte kiang ah chia ding leh, amau chu zektante kiang ah chia dingin, kei leh Barnaba chu kipawl theina khut changlam ei pia tau a.

¹⁰Gentheite ka het zing ding uh ti bep chu ei dawi ua, zia ngei chu sep ding ka tup himle ala hi.

¹¹Kipha chu Antiok khua a hung lai in, demkâi tak ah a um ziak in a maichang ngei in ka kinialpi a.

¹²Mi kuate a hem Jakob kiang ah kipat a hung mau in Jentelte kiang in an a ne sek a; himaleh, a hung tun phat un zektante a lau ziak ah pang talo in a kichuam koi ta’n.

¹³Juda dangte chule a la lepchia tho un; tichun, Barnaba hial le a gitlonau ah chun pui mang in a um tai.

¹⁴Himaleh, chanchinpha thutak gual in a um dukdak puau hi ti ka het in, Kipha kiang ah, a leng ua ma ah chun, “Nang Juda mi la hingal a, Judate um gual ah umlo in, Jentelte um gual ah la um zawk leh bangtidan ah Jentelte chu Judate umdan gual ah la umsak a hem?” ka ti tai.

¹⁵Ei uh chu Jentel migilote hilo in, Juda mi him ah piang I hiu a;

¹⁶himaleh, dan thilhite ziakin mi thiamchang in a um puau a, Jesu Khrista gin ziak bep in thiamchang in a um zawu hi, ti I he ngal un; ei unle dan thil hi’ziak hilo in, Khrista ginna ziak ah thiam I chan theina ding un, Khrista Jesu chu I ging uh ahi; dan thil hi’ te ziakin mihing him him thiamchang in um pua’n au.

¹⁷Ahileh, Khrista ah thiamchan I tup nâk sapi ah le migilo I la hi kit thei chun, Khrista chu gitlona umsakpa a hem leh? Hilo e!

¹⁸Ka phiatsate ka sak phat kit sek chun, thil hi’khialpa ka hi’na ka latsak mai hi’n a.

¹⁹Pathian lam ah ka hung hin theina dingin, kei vang dan ziakin dan lam ah chun ka thi tangal a.

²⁰Khrista kiang in khetden in ka um ta’n, ahi’n la, ka hing ahi; keima kha ka hita pua’n, Khrista keima ah hing ahi zawi; Pathian chapa, ei hepi ah, ka thasâng ah kipepa ginna ziak zaw’n.

²¹Pathian hepina chu bangmalo in ka bawl pua’n, dan ziak ah dikna a um chun, Khrista chu a thawn ah thi hi’n a.