Read Vaiphei GALATIA 3 Bible Online

GALATIA 3 - Vaiphei bible

GALATIA 3

¹Aw Galatia gam ah mingolte haw, kua’n a hun bum ngol ah a hem? La mit mu ngei un Jesu Khrista chu kichian tak ah khetden ah latsak ahi’siat tawh!

²Zia bep hi nangmau ah kipat het ka nuam hi: “Dan thilhite ziakin a hem Thagau chu la muu ah, la het ua la gin ziak un?”

³Hiti lawm lawm hin la ngol uh maw! Thagau ah kipan tangal in taksa ah zo ding la hiu maw!

⁴Thil chuti zojai chu a thawn in la thuak uh ahi maw! A thawn tak tak hitaleh chu aw!

⁵Chuleh, la kiang ua thagau hun pepa leh, la lak ua thilmak bawlpa chun dan thilhite ziakin a hem a bawl, la het ua la gin ziak un?

⁶Abraham in Pathian a ging ah, zia a ginna chu a dikna guat ahi ngal a.

⁷Chutichun, zia hi he tau in: Ginna umte ngei chu Abraham chate a hiu hi.

⁸Chuleh, Pathian Lekha thu chun Pathian in, ginna ziak ah Jentelte thiamchansak ding ahi ti hemasa’n: “Nangma ah chun mi zosia maljawl in hung um in au,” ti’n Abraham kiang in chanchinpha chu a la genlawk tai.

⁹Chutichun, ginna ah umte chu ginna nei Abraham tawh maljawl in a um khawm sek ui.

¹⁰Dan thil hi’ ah kinga tapote chu dan hânsia nuai in a um ngal un; “Dan lekhabu thu kizik zosia gual ah bawl zing lo tapo chu hânsia dawl in um uh hen,” ti zik ahi ngal a.

¹¹Ahi’n, Pathian mit mu in kuama dan ah thiamchang a um puau hi, ti a kilang zing hi.

¹²Himaleh, dan chu ginna ah kinga ahi puai; a le’lam ah chun, “Dan gual ah hi’pa chu ziate ah chun hing in a,” ti ahi zawi.

¹³Khrista chu I thasang un hânsedawl a hung hi’n, dan hânsia lak ah kipat chun ei tandok tai: “Thing ah khaikâng ah um tapo chu hânsia dong a hi,” ti zik ahi ngal a.

¹⁴Chutichun, Abraham chung ah maljawlna chu Khrista Jesu ziak ah Jentelte chung in a hung tung in, zia gual ah Thagau tiam chu ginna ziak ah I mutheina ding un.

¹⁵Suapite haw, mihing hi’dan gual in gen taleng, mihing thuthun ziang le sukdetsa chu a phel kit ngai ta puau a, belap le ahi ngai ta puai.

¹⁶Abraham kiang in thutep piak in a la um ah; a suante kiang inle, mi tam tak chung thu gen gual ah, “Chisuante kiang in,” a tipua’n, mi pakhat chung thu gen gual in, “Nangma chisuante kiang in,” a ti zawi; zia chu Khrista chu ahi.

¹⁷Chuleh, zia hi ka ti’na ahi: Thuthung Pathian in a la sukdet tâk chu, kum za li leh sawmthum nung ah hung um Dan chun thutep chu bangmalo ah sua in a hi’bei diak puai.

¹⁸Golua ding chu dan ziak ahileh, thutiam ziak a la hita pua’n tin; himaleh, Pathian in thutiam ziakin ahi zawi, Abraham kiang ah a la piak chu.

¹⁹Ahiloleh, bangtidan ah dan chu um a hem? Chi suan thutiamna chu a hung tun masang in sukkhialnate ziakin belap in a um ah, vansawlchâkte mang ah palai khut ah sukdet ahi.

²⁰Chuleh, palai I ti him him chu mi pakhat sâng ah tam zaw kikâl ah palai a hisek hi; Pathian vang pakhat ahi.

²¹Ahiloleh, dan in Pathian thutiamte chu a kãl em? Kãl lo e! Hinna pethei dan him him piak in a la um taleh, dikna chu dan ziakin a la um ta ding ahi.

²²Himaleh, Jesu Khrista gin ziakin thiltiamte chu a gingte kiang ah piak a hitheina ding in, Pathian Lekha Thu chun gitlona nuai ah bangkim a khâk khum ta ahi.

²³Ahi’n la, ginna chu a hung tun masang in, ginna hung kilat masia dan nuai ah chun khâk khum in, vên I la hiu hi.

²⁴Chutichun, ginna ziak ah thiam I chan theina ding un, dan chu Khrista kiang lam ah ei la kaihuaipa chu a la hi.

²⁵Himaleh, tu’hin ginna a hung tun nung ah hin, kaihuaipa nuai ah chun I um ta puau a;

²⁶Khrista Jesu gin ziakin Pathian chate la hung hi chiat tau hi.

²⁷La lak ua Khrista ah baptisma chang tapote kha Khrista ah chun la kivan tangal un.

²⁸Zia tak ah chun Juda mi a um ta pua’n, Grik mi le a um ta puai; zia chun suak a um ta pua’n, suak lo le a um ta puai; chuleh, pawsal leh numeile a um chuam ta puai. Khrista Jesu ah chun la leng un pumkhat la hingal un.

²⁹Chuleh, Khrista â la hiu chun, Abraham suan, thutiam dungzui ah golua dingte chu la hitau hi.