Read Vaiphei GALATIA 4 Bible Online

GALATIA 4 - Vaiphei bible

GALATIA 4

¹Tu’hin chu ka ti ahi, goluatu ding chu bangkim chung ah neitu hi maleh, naupang ahi lai sia suak tawh a kikhiaknau bangma a um puai.

²A pa hun guat chu a hung tun masang sia, a donte leh enkolte nuai ah chun a um zaw ahi.

³Zia gual chun ei le naupang I hi’lai in, khawvel thubulte nuai ah suak in I la um un;

⁴himaleh, a hunbî a hung tin phatin, Pathian in a Chapa, numei suan in, dan nuai ah hung piang in a hun sawl tai.

⁵Cha hi’na I chan theina ding ah, dan nuai ah umte tandok dingin.

⁶Chuleh, chate la hi tâk ziak un Pathian in a Chapa Thagau chu, “Abba, He pa,” ti ah kiko in, I lung sung un a hun sawl ta ahi.

⁷Tichun, suak la hita puau in, cha la hizaw tau hi; cha la hileh, Pathian zal in a golua ding la hi tai.

⁸Himaleh, Pathian la la hetlo lai ua khan, piandan mawng ah le Pathian hilote suak la hiu a.

⁹Tu’hin, Pathian la hun het ua, Pathian mi het la hung hi’nung un, ti ding ahi zaw’n, thubul jawngkhal leh manlo suak ah um kit nopna lam ah bangatia kihei kit la hiu em?

¹⁰Nibîkte, tha’te, hunbîkte, kumte la chang sek un.

¹¹La chung un tha a thawn in ka sêng kha diam ti ka lau ahi.

¹²Suapite haw, ka hun ni la hiu, keima gual in um un, keile nang uh gual in ka um sek ah, ka chung ah bangma la hi’khial puau hi.

¹³Chanchinpha la kiang ua ka gen masakna pen kha, ka taksa hat lo ziak ahi ti la he ngal un.

¹⁴Chuleh, ka taksa chung ah nang uh â ding ah thepna um chu la mu tawm puau ah, lei pâmpai diak puau a: Pathian vansawlchâk gual in, Khrista Jesu tawhbang hial in lei lop ui.

¹⁵Hampha la kisaknau kha khoi ah um ahi tam? Hithei vang leh la mitteu kheldok in ei pia ta’n lau ti ka hia’i.

¹⁶Chutichun, thutak ka hun hilna ziakin la mêlmau ka hung suak zaw ta mai em?

¹⁷A pha lam hilo in, phatchuamngai tak in a hun hawldok sek ua; nang un amau la hawl theina ding un nang uh chu pawlam ah khak khum ding a guat uh ahi.

¹⁸Thupha lam vang bangtik lai inle phatchuamngai tak ah hawl zing hi a pha ahi, la kiang ua ka um sung bep hilo in.

¹⁹Chate haw, Khrista chu nangmau ah siam pitin ah a um masia, nauvei in ka hun vei la hiu.

²⁰Ahi, tu’lai hin la kiang ua um ah, ka aw hi’danglam ka nop dan mai chu; la chungthuu ah hin ka lungjing ahi.

²¹Dan nuai ah um nuamte haw, ei hil un, dan thu ngaitha lo ding la hiu em?

²²Zia gual hin zik ahi ngal a: “Abraham in chapa pani a nei in, pakhat chu suaknu hin ahi’n, pakhat chu suaklonu hin ahi.

²³Himaleh, suaknu hin zawk chu taksa dan ah a nei ahi’n, suaklonu hin zawk chu thutiam dungzui ah a nei ahi.

²⁴Zia thute chu etsakna a hiu ah; zia numeite chu thuthung pani chu a hiu: Pakhat chu Sinai tâng ah suak hiding ah cha hingnu chu Hagar ahi.

²⁵Chuleh, Hagar chu Arabia gam ah Sinai tâng ahi’n, tu’lai ah Jerusalem chu, a chate tawh suak ah um gual hi ahi.

²⁶Himaleh, pakhatnu zawk chu, chung lam Jerusalem ahi’n, suak ahi puai, zia ngei chu eihaw nu ahi.

²⁷‘Nang chîng, cha nei ngailo, kipak in, nang nauvei ngailo, La sa’n kikodok in; pawsal neinu sâng in lunglengnu’n chate a nei tam zaw ngal a,’ ti zik ahi.

²⁸Tichun, suapite haw, ei haw hi Isak gual ah khan thutiam chate chu I hiu hi.

²⁹Himaleh, zia lai gual ah khan tu’hin le ahi, taksa dan ah piang khan thagau dan ah piang chu a sugenthei hi.

³⁰Himaleh, Pathian Lekha thu chun bang a gen em? Suaknu chu a chapa tawh nawdok un; suaknu chapa chun suaklonu chapa chu go a luapi lo ding ziakin,” a tii.

³¹Tichun, suapite haw, suaknu chate I hi puau ah, suaklonu chate I hi zawu hi.