Read Vaiphei GALATIA 5 Bible Online

GALATIA 5 - Vaiphei bible

GALATIA 5

¹Suak hilo dingin Khrista chun ei thâdok tai; ziaziakchun, ding det unla, suak ngawngkol in tâng kit ta kiu in.

²Ngai un, kei Paul in la kiang ua ka gen hi, zek la tan ua leh Khrista chu nang uh â dingin bangma phachuam pua’n a.

³Ahi, dan thu zosia zui ding ah bate a hiu ti, zektante zosia ka hiatsak kit ahi.

⁴Nang uh dan ah thiamchan gawte haw, Khrista tawh la kikhen tau ah, hepina chu la puksan tau hi.

⁵Keihaw’n vang Thagau jal in ginna ah dikna kinepna chu ka ngâk uh ahi.

⁶Khrista Jesu ah chun zektan chu bangma a phachuam pua’n, zektanlo le bangma a phatchuamna a um puai; ginna ah hepina bep chu a phachuam ahi.

⁷Pha tak in la tai un; thutak chu zui lo ding ah kua’n a hun dâl a hem?

⁸Zia gual ah thepzawna hivang nangmau hun kopa ah kipat ei puai.

⁹Thawi tawmcha’n vaithum chu a leng in a zen suak sek hi.

¹⁰Kei ngaituana gual lo in ngaitua lamdang diak pua’n lau ti, Lalpa ah chun ke’n vang ka hun muang hi; himaleh, nangmau hun su’ngol chu kua hiziang leh le, a chung ah gawtna tung in a.

¹¹Suapite haw, keima’n zektan thu gen nalai lai ka hi chun, bangatia hi’genthei ah um ka hem? Zia gual chu hileh vang, kros thu ka gen hin buaina siam lo ding hive’n.

¹²Nang uh hun subuaite hi paithâk hingal ngal leu ka nuam ahi.

¹³Nanghaw, suapite haw, suak hilo ding ah ko la hiu a; himaleh, suak la hi’lonau chu taksa â ding ah lemchâng in mang kiu inla, hepina’n na kisep tua piak chiat zaw tau in.

¹⁴“Nangma la kihepi gual in la vengte la hepi ding ahi,” ti thu kam khat hin, dan thu zosia chu a khaikhawm ahi.

¹⁵Himaleh, la kikiat ua, la kinêktua phat ua leh, la kisukgam lona ding un chingthei tau in.

¹⁶Chutichun, zia hi ka ti ahi, Thagau ah kalsuan un; tichun, taksa nopna lam chu zui lo mai inlau.

¹⁷Taksa chun Thagau chu a do sek a. Thagau inle taksa dona lam a nuam sek hi; thil la hi guatteu chu la hi’thei lona ding un ziate chu a kikãl sek uh ahi.

¹⁸Himaleh, Thagau pui ah la um ua leh, dan nuai ah chun la um puau hi.

¹⁹Tu’hin taksa nasepte chu a kilang tai; ziate chu zia hi ahi: Ângkawmna, tatsualna, buakna, hûkna,

²⁰milim biakna, dawi mang ah nasepna, huatna, kinakna, thangsiatna, lungnatna, kilanna, umchuamna, gindan chuamna;

²¹ênna, tualtha’na, zukhamna, kinoptelna leh zia tawhbang haw hi. Zia gual thilbawl chîngte chun Pathian gam lua pua’n au, tia ka hun hilkhol gual ah khan ka hun hil kit la hiu.

²²Himaleh, Thagau ga chu, hepina, kipakna, chamna, dawtheina, nunnemna, phatna, ginumna,

²³thunuaigolna leh kisumtheina ahi; ziate tawh kikãl hi dan a um puai.

²⁴Chun, Khrista Jesu ah um te chun taksa chu a thil phalo ngaituanate tawh a nopnate pum in a khênden tau hi.

²⁵Thagau ah hing I hiu chun, Thagau ma ma’n kalsuan hitiu.

²⁶Kiphatsak leh kichotua in, kuama ki-êng tua in um puai tiu.