Read Vaiphei GALATIA 6 Bible Online

GALATIA 6 - Vaiphei bible

GALATIA 6

¹Suapite haw, mi kuale a hi’khelna matdaw in um taleh, nang uh thagau mite haw, thepna tuak kha’ng ka ti ah kivêng pha kawm in, zia gual mi chu tungding kit un.

²La puakgikteu chu kidawn tua chiat un; tichun, Khrista dan chu la zui uh hi’n a.

³Mi bangma hilo ah milian khat ah kingai chu, ama leh ama kithêm ahi.

⁴Mi zosia’n ama nasep chu enchian chiat zawu hen; chutileh mi dang chung ah hilo in, ama chung bep in suan ding nei in au.

⁵Mitin in amau puak chiat a kipuak diu ahi ngal in.

⁶Chun, thuhil ah umpa chun a hilpa kiang in thilpha zosia pia hen.

⁷Thep in um kiu in; Pathian chu thep ding gual ahi puai; min a tu tapo, zia ma chu ât kit ding a hiu.

⁸Ama taksa lam ah tû’pa chun taksa lam ah siatna chu luak intin, Thagau lam ah tû’pa vang chun Thagau lam kumtuang hinna luak in a.

⁹Ziaziakchun, thilpha hi chimchâk puai tiu; I kithada lo uh chun a hun tak in ât ngei ding I hingal un.

¹⁰Chutichun, hun lemchâng I nei dan dan un, mi zosia chung ah thilpha bawl chiat hitiu; ginna’ I Inkuanpiteu chung in bawl diak hitiu.

¹¹Keima khut ngei ah la kiang ua lekhamal lianpi pi’ ka zik hi en un.

¹²Taksa lam kilawmsak nuam mite’n zektan dingin a hun phût sek un; bangma dang ziak ahi puai, Khrista kros ziak ah a thoklona ding un ahi.

¹³Zektante nangawn inle dan thu chu a zui diak puau ah, a taksau ah suan ding a neitheina ding un zektan ding nuam mai a hiu.

¹⁴Kei vang in, I Lalpau Jesu Khrista kros longal chu ka suan lo ding zia mai chu; ama ziakin khawvel hi kei â dingin khetden in a um ta’n, keile khawvel â dingin khetden in ka um tai.

¹⁵Kisiam thak kitna longal ah chun zektan hi bangma a hipua’n, zektanlo le bangma ahi diak puai.

¹⁶Zia dan gual ah um tapote chung ah chun chamna leh jangaina um ta hen.

¹⁷Tu’khêl vang kuama’n ei subuai ta kiu hen; ka taksa ah hin Jesu teptênate chu ka paw ta ngal a.

¹⁸Suapite haw, Lalpa Jesu Khrista hepina la thagau kiang un um ta hen. Amen.