Read Vaiphei EPHESA 2 Bible Online

EPHESA 2 - Vaiphei bible

EPHESA 2

¹Nanghaw le, la sukkhial leh gitlonateu ziak ah thi la hi’lai uh khan, a hun hinsak la hiu a;

²malai khan zia khawvel dan gual hin la um un, beingawn ah thuneina lal, thu awilo chate sung ah sêm zing pa thagau dan gual ah chun la um ui.

³Zia awilo chate lak ah chun ei hawle malai ah khan, taksa leh lungthim doigualte bawl in, I taksa nopnateu gual in I um chiat un; midangte gual tho ah lungnatna chate piang I la hiu in.

⁴Ahi’n la, Pathian chun, hepina a hau dungzui ah ei la hepi ziakin;

⁵I sukkhialnateu ziak ah thi I hi zing lai un, Khrista tawh kigual in ei suhing ta’n, hepina ah hukhin la hitau hi.

⁶Khrista Jesu ah chun ama tawh kigual in ei kaitho in, van mun ah te khin ei chutsak tai.

⁷Chutichun, hun hung tung kit ding ah te chun Khrista Jesu ziak ah I chung ua nunnem in, a hepina lopi hau dan te’gual lo chu ei musak theina ding in.

⁸Lungsiatna ziak ah ginna ah chun hukhin la hingal un; zia chu nangmau ah kipat pawt hilo in, Pathian thilthawnpiak ahi zawi.

⁹Thilhi ziak ahi puai; chutilochun mi kisuang kha’n au.

¹⁰Thilpha hi’ding ah Khrista Jesu ah chun siam ah um in, ama khutsuak I hingal un; zia thilpha hi’ chu I khawsak dan ding ua Pathian in a siamkholsa ahi.

¹¹Ziaziakchun, malai ah nanghaw taksa dan ah Jentel ah piang, taksa khut ah “Zektan,” kititen, “Zektanlo,” a la titeu haw:

¹²Zia lai ah khan Khrista neilo in, Israelte khua leh tui tawh kikhendan in, khawvel ah kinepna him neilo leh Pathian neilo in, thutiam thuthung lak ah kipat malzin la hiu kha hezing tau in.

¹³Tu’hin vang, Khrista Jesu ah chun, nanghaw malai ah gamla tak ah umte chu, Khrista thisan ah chun hi’nai in la hung um tau hi.

¹⁴Ama chu I kichamnau ahi’n, pawl nite chu pumkhat ah siam in, I kikâl ua daidanna bâng chu a suchim ta ahi.

¹⁵Pani hilai kha ama ah mihing thak pakhat hiding ah a siamdaw theina dingin, dan leh a thupiakte leh a thuthungte chu subei in, kichamna a bawl tai;

¹⁶kros jal ah panite chu kipumkhat ah, Pathian ah a kicham theina ding un, kituak lona zosia chu a that ta ahi.

¹⁷Chun, a hung ah, nanghaw gamla tak ah umte leh naicha umte kiang in le chamna chanchinpha a hung hil a.

¹⁸Ama ziak ah chun Thagau mun khat ah, Pa kiang ah luttheina I nei gêl tau hi.

¹⁹Ahi’n, tu’hin malzin leh gam chuam mi la hita puau a, mithiangthote tawh tual khat ah leng khawm, Pathian Inkuante la hitau hi;

²⁰Khrista Jesu ngei chu a kil ah suang poimaw pen ahi’n, sawlchâkte leh jawlneite suangphûm chung ah sak la hiu hi.

²¹Ama ah chun suanglep chuam chuamte, kituak tak ah sutua in, Lalpa ah biak In thiangtho a hung suak tai.

²²Nanghaw le ama ah chun, Thagau ah Pathian chênna mun ding ah lepkhawm la hitau hi.