Read Vaiphei EPHESA 3 Bible Online

EPHESA 3 - Vaiphei bible

EPHESA 3

¹Ziaziakchun, keima Paul, nanghaw Jentelte ziak ah Jesu Khrista ah suangkul lut hin,

²nanghaw kiang ah Pathian hepina thu gen ding ah, sawl ah ka um dante kha a la he ngei ding la hingal un;

³chuleh, thugûk chu ka kiang ah hiatsak ah a um dan, tu’ma chomcha ka zik gual khan;

⁴zia kha la sim tak ua leh, Khrista thugûk ka het dan hi hethei in lau.

⁵Zia chu tu’lai ah sawlchâk thiangthote leh jawlnei thiangthote kiang ah, Thagau hiatsak ah a um gual ah hin, tu’ma lam ah khan mihing chate kiang ah hiatsak ahi ngai pua’n; zia thu chu zia hi ahi:

⁶Chanchinpha ziakin Khrista Jesu ah chun, Jentelte hi goluapi dingte, taksa bâk chanpite leh thutep chanpite a hung hitau hi.

⁷A thilhitheina nasep ah, a thawn ah piak Pathian hepina dungzui ah chun, zia chanchinpha nasêm ding ah chun suak ka hung hi tai.

⁸Keima, mithiangthote lak ah neupen sâng ah le neuzaw kiang ah hin, zia hepina chu piak ahi’n; Khrista hausakna suidaw guallote chanchin chu Jentelte kiang ah gen ding leh;

⁹Pathian, thil zosia siampa kiang ah kumtuang ah sêl ah a la um thugûk chu, mi zosia musak dingin.

¹⁰Chutia, Pathian pilna zosia chu van mun ah lalna leh thuneinate kiang ah, kochuamte mang ah tu’hun ah hiatsak ahi’na dingin.

¹¹Khrista Jesu, I Lalpau ah sep a guat, a kumtuang lemguat dungzui ah chun;

¹²zia Khrista Jesu chu I gin ziakin, ama ah chun nêl leh ngam tak ah luttheina chu I nei tau hi.

¹³Chutichun, nanghaw ziak ah ka thokgimnate ziak ah hin lungkham lo dingin ka ni la hiu; ziate hi la lopinau ahi.

¹⁴Ziaziakchun, Pa ma-âng ah chun ka khupdin sek ahi;

¹⁵lei leh van ah Inkuan zosia min sakna pa,

¹⁶a lopina hau dungzui in a Thagau jal in, la sunggil lam ua chun thilhitheina’ suk-hat ah la umtheina ding un, ka pauchap in;

¹⁷chuleh, hepina ah zung kai leh kinga in, Khrista chu ginna ziak ah la lunggil sung ua a chêntheina ding in.

¹⁸Mithiangthote zosia tawh, a letdan, a sau dan, a sândan leh a thûkdan hetchian theina ding leh,

¹⁹Khrista hepina het zaw gual lo, Pathian bukimna zosia ah hi’dim ah la umtheina ding un ka pauchap hi.

²⁰Tu’hin, eimau ah sêm sek thilhitheina gual in, I dot leh I ngaituana zosiau khêl ah lopi zaw ah hitheipa kiang ah chun,

²¹suan zosia tiang in, kochuamte leh Khrista Jesu ah chun kumtuang in lopina um ta hen. Amen!