Read Vaiphei EPHESA 6 Bible Online

EPHESA 6 - Vaiphei bible

EPHESA 6

¹Naupangte haw, Lalpa ah chun la nu leh pateu thu zawm un; zia chu thil dik ahi ngal in.

²“La nu leh pa ja in,” ti hi thutiam nei thupiak masa pen chu ahi.

³Chutileh, nang â dingin pha’n tin, lei ah la dam kum le sawt in a.

⁴Ahi’n, nanghaw pate haw, la chateu hi’lungna kiu inla, Lalpa thununna leh zilgaina chun kaihuai zaw tau in.

⁵Suakte haw, Khrista kiang ah la kituk lut gual un, lungthim thua neilo in, lau leh kithing kawm in taksa ah la puteu kiang ah chun kitulut unla;

⁶mi kipakna ding mai ah, mitmei vêng bep ah sêm hilo in, Khrista suak gual jaw’n, lung sung ah kipat Pathian lung lam hawl in sêm zawu in.

⁷Mi â ding bep ah napha sêm hilo in, Lalpa â dingin thanuam tak in sêm zawu in.

⁸Suak hi’n, suak lo hileu chinle, thilpha la hi taphot uh chu LALPA‘n ei thuk ding ahi, ti he tau in.

⁹Chuleh, nanghaw suak neite haw, nang uh chung ah le thunei a um ah, ama chun kuama doichuam neilo ahi ti hia’n, la suakteu chu vau thaw ta kiu in.

¹⁰A tawp pen in ka suapite haw, Lalpa leh a hâtna thilhitheina ah chun hat tak in um unla.

¹¹Diabol tawh kidona chu la zaw theina ding un, Pathian gâlvan bukim in kivan un.

¹²Taksa leh thisan ah mêlmate tawh kibuan I hi puau ah, lalnate, thuneinate leh zia khawvel thim chung ah vaihawmte tawh, van mun ah thagau gilote tawh kibuan I hizaw ngal un.

¹³Ziaziakchun, ni phalo ah chun la do zawu ah, la zaw nung ua le kipuk lo ah la din zing theina ding un, Pathian gâlvan bukim ah chun kithuam un.

¹⁴Ziaziakchun, ding unla, la kawng uh chu thutak in gâk unla, diktatna awmphaw chun kithuam un.

¹⁵Chuleh, la kengteu â dingin chamna chanchinpha chu but un.

¹⁶Zia zosia hi tawh, ginna phaw chu lau inla, zia chun migilo thalkuangthei chu sumit thei in lau.

¹⁷Chuleh, hukdamna lukhuk chu khuk in, Pathian thu, Thagau chemjam chu pan un.

¹⁸Thagau ah chun pauchapna leh dotna zosia’n huntin in pauchap un. Zia ding ah chun, mithiangtho zosia â dingin phatchuamngai tak thuak zo tak ah don in hu’ngai zing un.

¹⁹Chanchinpha thugûk chu hangsan tak ah gen ding ah ka kam ka kât ah, thu ka gen theina dingin ei pauchap piak un,

²⁰zia chanchinpha palai ding ah, thikkhau but chu ka hi tangal a. Ka gen ding gual tak ah hangsan tak ah ka gen theina dingin, ei pauchap piak un.

²¹Himaleh, nangmau inle bangti’n ka um em ti la hettheina ding un, Tukika, Lalpa ah suapi doitak leh nasem ginum hin bangkim hun hiatsak in a.

²²Ziaziak tak ah hin, ama chu la kiang un ka hun sawl ahi: Ka chanchin uh la hetna ding uh leh ama’n la lungthim uh a hung thamuan theina ding in.

²³Pa Pathian leh Lalpa Jesu Khrista ah kipat ginna, hepina leh chamna chu suapite zosia chung ah um ta hen.

²⁴I Lalpau Jesu Khrista chuai lo ah hepite chung in, a hepina chu um zing ta hen. Amen.