Read Vaiphei PHILIPPI 1 Bible Online

PHILIPPI 1 - Vaiphei bible

PHILIPPI 1

¹Paul leh Timothi, Khrista suakte hin, Philippi khua Khrista Jesu ah mithiangtho um zosia leh, hotute leh nasemte kiang ah chun,

²I Pau Pathian leh Lalpa Jesu Khrista ah kipat hepina leh chamna la kiang un um ta hen.

³Nanghaw ka hetdaw phat si’n leh, ka Pathian kiang in kipak thu ka gen sek hi.

⁴Nanghaw zosia â ding ah ka pauchapna taphot ah chun, lim tak in ka hun dot piak sek hi.

⁵Ni masa pen ah kipat tu’tiang ah chanchinpha puanjakna la pan zing ziak un.

⁶Nangmau ah nasep pha panpa khan, Jesu Khrista ni tiang in sêm bukim ngei in ah ti chu, ka gingcha ahi.

⁷Nanghaw zosia lam ah zia gual lungthim put chu kei â dingin a kilawm him ahi, la lunggil un lei hezing ngal ua; ka kolbuna leh, chanchinpha ka panpina leh ka sukdetna ah le, la leng un Pathian lungsiatna chu lei kikoppi ngal un.

⁸Jesu Khrista lainatna ah la leng ua ka hun ngainat jia mai chu, Pathian in ei hetpi ahi.

⁹La hepinau chu hetna leh hetkhen theina tawh kithua’n, luanglêt zing leh ti in ka hun pauchap piak in;

¹⁰tichun, thil phazaw diakte chu la tup ua, Khrista ni ah thiangtho leh dem kâi lo ah la umtheina ding un.

¹¹Pathian lopina leh choihoina ding ah, Jesu Khrista vang ah hung um, dikna gate chu la sua theina ding un.

¹²Suapite haw, ka chung ah thiltung te hi chanchinpha machâlna ding ahi zawi ti la het uh ka nuam hi;

¹³tichun, Lengpa vêng ah pang sepai pawl zosia lak leh, midang zosia kiang ah chun, Khrista ziak ah kolbut ka hi ti a lang suak ta’n;

¹⁴chuleh, ka kolbunate ziakin unaute lak ah tam tak in, Lalpa muanna nei zaw diak in, Pathian thu gen dingin nasa zaw diak ah suk-hansan leh launa neilo a hung hitau hi.

¹⁵Mi khenkhat chun mitthîpna leh langpanna ziakin Khrista thu a tângkopiu a; khenkhat in vang a pha doina ziakin a tângkopi sek ui.

¹⁶Amau chun, chanchinpha thiamna thu gen ding ah guat ka hi ti hia’n, hepina ziakin a gen sek ui;

¹⁷a dangte chun vang, ti’ tak tak ziak hilo in, amau ângsung khualna ziakin, ka kolbuna chung ah lungngaina ei belap piak nopna ziak un, Khrista thu a gen ui.

¹⁸Bang a khawk em? Bang lam lam ah le Khrista chu puanlat ah a um phot leh, a lêm hi’n a tak hileh, ka kipak hi. Ahi, kipak zing ing ka.

¹⁹La pauchapnateu leh Jesu Khrista Thagau panpina ziakin, zia chu ka suachâkna hung hi’n ah ti ka hia’i.

²⁰Bang lam lam inle sukmualpho ah umlo in, hangsan tak ah thu ka gen ziakin Khrista chu ka taksa ah hin, ka thi inle ka hin inle, choihoi ah um zing ding ahi ti chu ka kinepna leh ka kingakna ahi.

²¹Kei â dingin hin hi Khrista â ahi’n, thi le lawkna ahi.

²²Himaleh, taksa ah hing nalai ding ka hi chun, zia chu kei â dingin sep ga tampi sua’na hiding ahi; ka têl zawk ding vang ka he diak puai.

²³Pawt daw ah Khrista kiang ah um chu a phat zawk ma ma ziakin, a kâl lak ah lungthim laklaw tak in ka um ahi.

²⁴Ahi’n la, nangmau ziak ah hin taksa ah um zing hi a kul zawi.

²⁵Chuleh, zia chu ka ginchâk ziakin, ginna ah la hung khanto ua, la kipakna ding un, la leng ua kiang ah um zing ding ka hi ti ka hia’i.

²⁶Tichun, la kiang ua ka hung kit phat leh, Khrista Jesu ah lei suannau nasa tak thu hi, ka hung genlat theina ding in.

²⁷Banghitaleh, la umdan uh chu Khrista chanchinpha tawh kituak sak phot tau in; ka hung ah nang uh hung mu a hem, ahiloleh, ka umlo lai ah le thagau munkhat ah la dindet dan uh leh, lungthim munkhat nei ah chanchinpha ginna la pan dan uh chanchin ka hettheina ding in.

²⁸Bang lam lam inle la mêlmateu suklau in um kiu in; zia chu amau manthai ding kihetchianna chu ahi; himaleh, nang uh chu Pathian ah kipan ngei ah hukdamna mu la hitau hi.

²⁹A jangaina ziak ah Khrista la gin bep uh hilo in, ama ziak ah la thok uh le phal ahi.

³⁰Kidona keima ah la mu sek uh leh la het uh, zia kidona ma ma chu la do ding uh ahi.