Read Vaiphei PHILIPPI 2 Bible Online

PHILIPPI 2 - Vaiphei bible

PHILIPPI 2

¹Chutichun, Khrista ah lung muanna him him, hepi thamuanna him him, Thagau pawlna him him, lainatna leh lungsiatna him him a um chun, lungthim munkhat ah um in,

²hepina munkhat nei in, kithugual ah lungthim mun khat ah um in, ka kipakna subukim un.

³Kikhenna ding a hem, kilopisakna ziak a hem ah bangma bawl lo in, mi zosia’n kingaitawm tak in, ama sâng ah mi dang phazaw’n guat chiat uh hen.

⁴Kuama’n ama â ding bep enlo in, midang â dingle en zaw hen.

⁵Zia lungthim Jesu Khrista ah um kha, nangmau ah le um ta hen:

⁶Ama chun Pathian gual ah um, Pathian tawh kibang ah um chu, thil khiaklâ thei ah ngailo in;

⁷himaleh, ama chu mihing ah hung kisiam in, suak gual ah hung kihi’niam in, mihing mêlpu ah siam in a hung um ta’n;

⁸mihing gual ah hung piang in, ama leh ama a hung kingaitawm ah, thi tiang ah thu jawm in a hung um a, kros ah a thina ngei chu.

⁹Ziaziakchun, Pathian in ama chu, sâng tak in a chawisâng ah, min zosia chung ah min chungnung pen chu a pia tai.

¹⁰Tichun, Jesu min ah mi zosia a khupdin ua, van chung, lei chung leh lei nuai ah thil um zosia,

¹¹leh Lei zosia’n Pa Pathian lopina ding ah, Jesu Khrista chu Lalpa ahi, ti a puanna ding un.

¹²Ziaziakchun, ka doitakte haw, thu la zop sek gual uh khan, tu’hin le, keima ka um bep hilo in, ka umlo sung ah hin sêm nasa zaw diak in, lau leh kithing pum in hukdam la hi’nau chu sêm bukim tau in.

¹³A lung lam sêm ding ah sepnopna hun pepa chu Pathian ahi ngal a.

¹⁴Phunchiak leh kinial lo in bangkim sêm un.

¹⁵Khangthak gilo leh lungkawite, khawvel ah a lak ua aksi vâkte gual ah la chênnateu lak ah, Pathian cha gensiat bei leh thiangtho,

¹⁶hinna thu chu la taklat theina ding un; zia kipakna chu keima’n Khrista ni a hung tun phat leh, a thawn in ka sêm gim pua’n, a thawn in ka tai gim puai, ka ti ngamna ding in.

¹⁷Ahi, la ginnau thillat chung in Pathian â ding ah butthâk ah um ding hi lengle ka kipak hi, la leng un ka hun kipakpi hi.

¹⁸Zia gual ma chun nang uh le kipak unla, keile ei kipakpi tau in.

¹⁹La chanchin uh ka het ah ka lungmuan theina dingin, Timothi la kiang ua hun sawl vak ding chu Lalpa Jesu ah chun ka kinem hi.

²⁰La phatna ding uh hun dawipiak, ama gual lungthim pu hi midang ka nei puai.

²¹A leng un Jesu Khrista â ding hawl lo in, amau â ding bep a hawl chiat un.

²²Himaleh, Timothi lûl zia tak, chapa’n a pa a seppi gual ah chanchinpha nasepna ah keima ei seppi dan la hiau hi.

²³Ziaziakchun, ka chanchin ding ka het phat phat leh ama hi hun sawl ding ka kinem a;

²⁴chuleh, keima ngei le hung vak ta ding in Lalpa ah chun ka kinem hi.

²⁵Ahi’n, ka suapi leh seppi leh sepaipi leh, la thupawpau leh ka tâksapna ei khawtua sekpa, Epaphrodita hi la kiang ua hun sawl kul in ka hia’n;

²⁶a damlo thu la la het ziak un a lungkham ma ma ziang ah, nanghaw zosia a hun thangai ma ma ziang hi.

²⁷Thi tavang hial in a damlo ngei hi. Himaleh, Pathian a chung in a jangai ah; ahi, ama chung bep ah hilo in keima chung inle, lungngaina chung ah ka lungngai sawn lona dingin.

²⁸Chutichun, ama chu la la muu ah, la kipak theina ding uh leh keima lungngai le a nop dawm theina dingin, hun sawl kâl ka ngaklâ diak hi.

²⁹Ziaziakchun, kipak tak in Lalpa ah ama hi a la lop unla, zia gual mi hi a la jabawl tau in.

³⁰Khrista nasepna chun a la thi tavang ah, kei â ding ah la sepkimloteu kha sep butin a guatna lam in a hinna le bangma’n a la ngailo ahi.