Read Vaiphei PHILIPPI 3 Bible Online

PHILIPPI 3 - Vaiphei bible

PHILIPPI 3

¹A tawp pen ah chun, ka suapite haw, Lalpa ah chun kipak un. Thu kibang ma ma la kiang ua hun zik kit hi kei â dingin chimchâk um a hipua’n, nang uh a dingin a phazaw ngal a.

²Uichate lak ah chingthei un; thil phalo bawlte lak ah chun chingthei un; chuleh taksa zektan phûtte lak inle chingthei un.

³Thagau ah Pathian ho in, Khrista Jesu kisuanpi ah, taksa ah kimuang lote hi zektan dik tak I hizaw ngal un.

⁴Taksa lam ah kisuang ding hi leng suan ding ka nei hi. Kua’nle taksa lam ah suan ding a nei uh chun, keima’n ka nei tam zawi.

⁵Ni giat ni’ zektan, Israel mi, Benjamin nam, Hebrai lak ah Hebrai ah piang, dan lam ah chun Pharisai ka la hi’n;

⁶phatchuam ngaina lam in kochuamte sugentheipa, dikna dan lam ah chun dem kâi lo ka hi.

⁷Himaleh, kei â ding ah lawkna taphot chu Khrista ziakin chânna’n ka guat ta ahi.

⁸Ahi takzet hi, ka Lalpa Khrista Jesu hetna lopi diak ziak ah chun, zia thilte zosia chu ki’dak buaksia gual in chânna in ka guat ta, Khrista ka mutheina dingin.

⁹Ama ah ka umtheina dingin; dan thu lam ah keima dikna hilo in, ginna ah kinga Pathian ah kipat dikna um chu nei zaw’n.

¹⁰Chutichun, ama leh a thawkitna thilhitheina chu ka het ah, a thoknate kikoppi in, a thina ah ama ka kibatpi theina ding in;

¹¹bangtidan a hem ah mithi lak ah kipat thawkitna chu ka chan thei khâk leh ti in.

¹²A mu zo ta ka kiti pua’n, bukim ta le ka kiti diak puai; Khrista’n ei matlawna pen chu ka tuk det theina ding ti’n, ka del ham ham ahi zawi.

¹³Suapite haw, a chang zo ta gual in ka kingai pua’n; ahi’n la, zia thil pakhat hi ka hi’sek hi: Nung lam ah thil umte chu hemil in, ma lam ah thil umte chu ka del hâm hâm ahi.

¹⁴Khrista Jesu ah, van lam ah Pathian kona sâng tak kipakman chu mu dingin kung lam chu ka del ham ham ahi.

¹⁵Ziaziakchun, piting tapote chun zia gual lungthim chu nei hitiu; ahi’n la, lungdang pu’ I um tâk unle, Pathian in zia chule la kiang un hun taklang in a.

¹⁶Banghitaleh, I phâk taksau tiang uh chu tudet zing hitiu.

¹⁷Suapite haw, keima ei enton chiat un, kei uh etton ah ei nei taphot chule pha tak in tepte’ un.

¹⁸Mi tam tak in Khrista kros chu kãl in hinkhua a mang un; a chanchin uh ka hung hilsek kha, tu’hin le mitthi pawt kawm in ka hun hil kit la hiu.

¹⁹Zia mite tawpna ding chu manthaina ahi’n, a pathian uh chu a gilpiu ahi; a kilopisaknau chu a mualphonau ahi; a lungthim un lei thilte a koi ui.

²⁰Himaleh, eihaw I khawsaknau chu van ahi; zia ah kipat chun Lalpa Jesu Khrista, Hukdampa chu I ngak ui.

²¹Ama chun bangkim a thunuai ah a umsak thei ziakin, I taksau musit um tak hile ama taksa lopi gual hiding in hun siam danglam in a.