Read Vaiphei KOLOSSA 1 Bible Online

KOLOSSA 1 - Vaiphei bible

KOLOSSA 1

¹Pathian doi gual ah Khrista Jesu sawlchâk Paul leh I suapiu Timothi hin:

²Kolossa khua Khrista mi thiangthote leh suapi ginumte kiang in; I Pau Pathian kiang ah kipat hepina leh chamna, la kiang un um ta hen.

³Nang uh â ding ah pauchap zing in, I Lalpau Jesu Khrista Pa, Pathian kiang ah chun kipak thu ka gen sek ui.

⁴Khrista Jesu la gindan uh leh, mithiangtho zosia chung ah hepina la nei dan uh ka het tâk ziak un;

⁵zia chu nang uh a ding ah kinepna, van ah koikhol ah a um ziak ahi. Zia kinepna chanchin ma chu tu’ma khan chanchinpha thutak thu la la he tau a.

⁶Zia chanchinpha chu khawvel zosia ah ga ah a pun pek gual in, la kiang un a hung tung ah, Pathian hepina chu thutak ah la ngaithâk ua, la het niu ah kipat in nangmau ah le ga in a pung zing hi.

⁷Epaphras, I suak chanpiu doitak lak ah la zil gual uh khan, ama chu kei uh thasâng in Khrista nasem ginum tak ahi.

⁸Ama chun la hepinau chu, thagau lam in kei uh ei hiatsak ta a hi.

⁹Ziaziakchun, ka het niu ah kipat kei unle nang uh â ding ah pauchap leh dot piak ka hai nai puau hi; thagau lam pilna leh hetna zosia, a doilam hetna hi’dim ah la hung umtheina ding un.

¹⁰Chuleh, nasep pha zosia ah ga sua ah, Pathian hetna hung khang ah, ama kipakna lam ah Lalpa â ding ah kilawm him ah la hin theina ding un.

¹¹Kipak tak ah bangkim thuak-hat tak ah la umtheina ding un, a thilhitheina nasa tak ah kipat hung pawtdok chun, bangkim in hun suhat hen la,

¹²vâk ah mithiangthote goluapi ding ah hun siampa, Pa kiang ngei ah chun kipak thu gen un.

¹³Ama chun thim thuneina lak ah kipat ei hukdok in, a chapa doichuam gam ah chun ei lângkâi tai;

¹⁴ama ah chun I kitatnau I muu ah, I gitlonateu ngaidamna chu.

¹⁵Ama chu mu theilo Pathian mêlpu ahi’n, thilsiam zosia lak ah piang masa pen ahi.

¹⁶Ama ah chun thil bangkim, van ah umte, lei ah umte, mu theite, mu theilote, lalchutphate tawh, thuneinate le, bangkim ama â ding leh ama ziak ah siam ahi.

¹⁷Bangkim um masang in ama chu a la um ta’n, ama ah chun bangkim a kizop khawm ui.

¹⁸Ama chu a taksa kochuamte luchang ahi’n; bangkim ah chungnungpen a hung hitheina dingin a bulpi, mithi lak ah piang masa pen chu ahi.

¹⁹Ama ah chun Pathian bukimna chu kilung tuak tak in a um khawm tangal un;

²⁰chuleh, ama ziak ah Pathian in bangkim tawh kichamna a nei chu a lung lam tak ahi; lei chung ah um hi’n, van ah um hitaleh, a kros thisan ziakin kichamna a hun siam ta ahi.

²¹Chuleh, lungthim lam ngaituana ah khen chuam leh a mêlma a la hi’n, nunsia tak in la la um tau a;

²²tu’hin vang ama leisiat hinkhua taksa hun thi’sak in, thiangtho, demna bei leh mawchansak theilo ding ah a ma-âng ah a hun piakdaw theina ding in,

²³van nuai khawvel thilsiam zosiate kiang ah kigen, la la het tâk uh thutiam kinepna chu, thasuak lo ah la tukdet zing theina ding un, a hung kipia ahi. Keima, Paul hi, zia chanchinpha nasem ding ah chu pang ka hi tai.

²⁴Nangmau ziak ah tu’ ka thokgimnate ah hin ka kipak ahi; chuleh, a taksa, a kochuamte ziak ah Khrista thokgimnate chu ka taksa ah hin ka subukim pek ahi.

²⁵Pathian thu chu bukim tak ah het a hitheina dingin, nanghaw ziak ah Pathian in mawpuakna ei piak dungzui in, nasem ah pang ka hi tai;

²⁶zia thugûk chu, khang tam tak leh suan tam tak sêlgûk a la hitamaleh, a mithiangthote kiang in a hun taklang tai.

²⁷Lopina hung tung ding I kinepnau leh, zia thugûk a lopi dan tak sulangpa Khrista nangmau ah a chênna thu a lopi dan tak hi, Jentelte kiang ah gen lang dingin Pathian in ei guat tai.

²⁸Mitin Khrista Jesu ah bukim tak ah ka piak theina ding un mitin chu hil in, pilna zosia ah hil in, ama chanchin chu ka gen sek uh ahi.

²⁹Zia ding ziak ah hin, ama’n ei suk-hatna dungzui ah kimang in, gim tak ah sêm in, ka kihabawl ma ma hi.