Read Vaiphei KOLOSSA 4 Bible Online

KOLOSSA 4 - Vaiphei bible

KOLOSSA 4

¹Hotute haw, nanghaw’n le van ah Hotu la nei ui ti hia’n, la suakteu chung ah dik tak leh kilawm tak in bawl un.

²Pauchap zing unla, kipak thu gen kawm in ngâk zing un.

³Chuleh, suangkul ah ka tân lawna pen, Khrista thugûk chu ka taklat ding gual ah kichian tak ah ka taklat theina ding ah,

⁴Pathian in kot ei hon piak theina dingin, ei la pauchap piak sek un.

⁵Chuleh, hun apha thei pen ah mang zing in, pawlam mite lak ah chun chingthei tak in um un.

⁶Mitin bang gual ah dawnhu chiat ding a hem ti la hettheina ding un, la kam ua thu pawt chu chi gual ah al, hepina pang hizing ta hen.

⁷Lalpa ah suapi doitak, nasemtu ginum, I suak chanpiu Tukika hin ka chanchin zosia hun hil in a.

⁸Zia ding tak ah chun ama chu la kiang ua ka hun sawl ahi. Ka chanchin la het ua, la lungthim uh a tilkho theina ding in,

⁹Onesima, suapi ginum leh doitak, nang uh lak ah mi hi tawh. Amau chun zia lam ah thil umdan zosia hi hun hil in au.

¹⁰Aristarka, ka suak chanpi hin chibai a hun bûk hi. Marka, Barnaba tupa hinle chibai a hun bûk hi; a chung thu ah thuhilna la muu kha; la kiang ua a hung chun, a la lop tau in;

¹¹chuleh, Jesu, Justas a tiu hin chibai a hun bûk hi. Ziate chu zektan mi a hiu a; ziate bep chu Pathian gam thu ah chun ka seppi, ka lungmuanna a hiu hi.

¹²Epaphras, la lak ua mi, Khrista Jesu suak hin chibai a hun bûk hi; Pathian dawi gual taphot ah, piting leh muan um tak ah la dindet theina ding un, pauchapnate’n a pang sek hi.

¹³Nanghaw, Laodikia khua umte leh Hierapolis khua umte â dingin, phatchuam a ngai ma ma hi ti ka hetpi ahi.

¹⁴Daktor doitak Luka leh, Dema inle chibai a hun bûk ui.

¹⁵Laodikia khua unaute chibai ei la bûk piak un; Numpha leh a In ah kochuam kikhawm sekte kha chibai ei la bûk piak un.

¹⁶Chuleh, zia lekha hi la lak ua la sim zaw phat uh leh, Laodikia kochuam ah le simsak unla; nang unle Laodikia ah um kha a la sim un.

¹⁷Chuleh, Arkhippa kiang ah khan, “Nasepna Lalpa ah la mu kha mualsua dingin chingthei in,” a la tiu in.

¹⁸Kei Paul in, ka khut ngei in zia chibai bûkna hi ka zik a hi. Ka kol bute hi hezing un. Hepina la kiang un um ta hen. Amen.