Read Vaiphei 1 THESSALONITE 2 Bible Online

1 THESSALONITE 2 - Vaiphei bible

1 THESSALONITE 2

¹Suapite haw, la lak ua ka hung uh kha a thawn puai ti nangmau ngei in la hiau hi.

²Ahi’n, Philippi khua sukgentheina thuak ah, jachâk um tak ah bawl ka hi’nung un, Pathian chanchinpha la kiang ua gen ding ah dâlna nasa tak lak ah Pathian in hânsanna ei piai ti la hiatsau ahi.

³Ka hun dotnau kha juau a hem, thian lona leh juauthepna kipat pawt a hipua’n.

⁴Chanchinpha vopsak ding ah Pathian phasak mi ka hi gual ngei un, mihing kipaksak ding gua hilo in, ka lunggilteu pateppa Pathian kipaksak dingin ka gen uh ahi zawi.

⁵Bangtik lai inle kimaichang phatna thu a hem, huaihapna dawha a hem ka mang ngai puau hi ti la hiau a, Pathian chu ei hiatpipa ahi.

⁶Nangmau lak hin, midang lak ah hitaleh, mihingte pakchat ka hawl ngai puau hi,

⁷ziate chu Khrista sawlchâkte ka hi jal un phût ka hiu hi. Nu nau chawi lai in ama chate a duat gual in, la lak un nunnem tak in ka um zawu hi.

⁸Ka hun khawtua ma mau in, nangmau ka hun ngainat ma ma ziak un, Pathian chanchinpha bep hilo in, keimau hial le nang uh â ding ah kipiak mai ka nuam uh ahi.

⁹Suapite haw, ka sepgim dan uh leh ka chawl dan uh la hezing ui; la lak ua kuama â dia puakgik ka guanlona ding un, sûn leh jan ah na sêm in, Pathian chanchinpha ka hun hil uh ahi.

¹⁰Nang uh gingtute chung ah thiangtho leh dik tak leh, demna bei ah ka um dan uh nangmau leh Pathian a hiatpite la hiu hi.

¹¹La hiatsa gual un, Pa’n a chate chung ah ahi gual in la leng ua chung in ka hi’sek un,

¹²a lenggam leh lopina hun kolutpa Pathian â ding ah kilawm la hi’theina ding un, hun tilkhau leh thamuan in ka hun ni la hiu.

¹³Ziaziak hin, chawl lo in Pathian kiang in kipak thu ka gen sek ui: Pathian thu keimau ah kipat la het uh, la pom uh khan, mihing thu gual ah hilo in, Pathian thu ahi gual tak ah la pom ziak un; zia chu nanghaw a gingte sung ah sêm sek chu ahi.

¹⁴Nang uh, suapite haw, Judea gam ah Khrista Jesu ah Pathian kochuamte la enton tau ah, amau in Judate lak ah a thok gual un, nang unle la gam mi teu lak in la thuak ngal ua;

¹⁵amau chun Lalpa Jesu leh jawlneite kha a that ua, keihawle ei deldok ua, Pathian ahi’lungdam puau ah, mi zosia a dodâl sek ui,

¹⁶amau chun, Jentelte kiang ah hukhin a hitheina ding ua thu gen ei khâm ui. Tichun, a gitlo te’nau a hi’dim zing un; himaleh, Pathian lungnatna chu a chung un a hung tung tai.

¹⁷Ahi’n la, suapite haw, chomcha sung â ding ah nangmau tawh lunggil lam ah hilo in, taksa lam ah kikhen ah I um tâkdi ziak un, nauchagate gual in, la mêl uh mu kâl ka ngaklâ ma mau hi.

¹⁸La kiang ua hung ka tup ngal a, kei Paul inle nivei hial hung ka gawta, himaleh, Setan in ei dâl sek hi.

¹⁹I Lalpau Jesu hung phat leh ka kineppiu a hem, ka kipaknau a hem, ka lallukhuk suan uh a hem chu bang a hem? Nangmau hi hilo la hiu em?

²⁰Ahi, nangmau hi ka lopinau leh ka kipaknau chu la hiu!