Read Vaiphei 1 THESSALONITE 3 Bible Online

1 THESSALONITE 3 - Vaiphei bible

1 THESSALONITE 3

¹Ziaziakchun, ka thok zaw lo ma ma phat un, Athen khua’n nutsia in um ta leng un pha ka sa tau a.

²I suapipau Timothi, Khrista chanchinpha lam ah Pathian nasempa hi nangmau hun phudet ding leh, la ginna lam ua hun thamuan dingin ka hun sawl tau hi,

³Zia sukgentheinate ziak ah hin, kuama a kilîn lona ding un. Ziate hi thuak ding him ka hiu ti nangmau ngei in la he ngal un.

⁴La kiang ua ka um lai ua khan, soisakna thuak ding him ka hi dan uh ka hun hil masau kha, zia gual ah chu um ding him I hiu ti la he tau hi.

⁵Ziaziakchun, ka thok zaw lo phatin, thêmpa chun hun thêm pûk kha’n tin, ka sepgimnau thawn kha’n ah ti’n, la gin dan uh ka hettheina dingin ka hun sawl ahi.

⁶Himaleh, Timothi chu la kiang ua kipat a hung tung ta’n, la gindan uh leh la hepinau chanchin kipak um tak a hun paw ta’n. Chuleh, ka hun mu nop gual un nang unle ei mu nuam in, lei hezing ui tile ei hil tai.

⁷Ziaziak hin, suapite haw, ka lungjinnau leh thokgimnau zosia ah hin, nangmau ah ginumna jal in thamuan in ka um tau hi.

⁸Tu’hin vang ka hing tau hi, Lalpa ah la dindet phot ua leh.

⁹I Pathian ma-âng in nangmau ziak ah ka kipaknau a hung um kit hi; nangmau lam thu ah Pathian kiang in kipak thu bang gual in ka gen ta bep diam uh?

¹⁰La mêl uh mu ah, ginna lam ah la tâksap awng uh ka huk piak theina ding un, sun leh jan ah pauchap in ka pang zing ui.

¹¹Tu’hin, I Pathian leh I Pau ngei leh I Lalpau Jesu’n la kiang lam un ei pui ta hen.

¹²Chuleh, nangmau chung ah hepina ka hau gual un, la lak ua kihepituana leh mi zosia chung ah hepina chu LALPA‘n hun hi’pun piak ta hen.

¹³Chuleh, I Lalpa Jesu, a mithiangtho zosia tawh a hung phat leh, I Pathian leh I Pau ma ah thianthona lam ah demna bei ah la umtheina ding un, la lungthimteu hun hi’hat piak ta hen.