Read Vaiphei 1 THESSALONITE 4 Bible Online

1 THESSALONITE 4 - Vaiphei bible

1 THESSALONITE 4

¹Chutichun, suapite haw, a tawp pen in la umdan ding uh leh Pathian la kipaksak dan ding uh, tu’ la umdan uh, keimau ah kipat la zil uh hi, la hau diakna ding un Lalpa Jesu ah chun ka ni un ka tilkhau la hiu.

²Lalpa Jesu ziakin bang thute a hem ka hun piak la he ngal ua.

³La thiantho ua, tatsual la kisûm uh hi Pathian lung lam ahi.

⁴Thiangtho leh ja-um tak in nangmau jite chiat vop thiangtho unla;

⁵Pathian helo Jentelte gual ah hûk pan lo in,

⁶zia thu ah chun kuama’n chawnvâl in a unau chung in thil phalo bawl ki’hen; Lalpa chu zia gual ah bawlte chung ah phuba la sek ahiziak in, ka hun hillawk un, ka hun hiatsak zo tau hi.

⁷A buak dingin Pathian in ei ko pua’n, thiangtho dingin ei ko zaw ahi.

⁸Ziaziakchun, a khawksa lo chun mihing khawksa lo a hipua’n, Pathian, nangmau ah Thagau Thiangtho pepa chu khawksa lo ahi zawi.

⁹Ahi’n, suapite, hepina thu ah chun zik piak la ngai puau, kihepitua chiat dingin nangmau ngei Pathian in a hun hil tangal a.

¹⁰Makedonia gam ah unau zosia chung in zia chu la hi ngei uh ahi.

¹¹Chuleh, thip hiau ah, nangmau na chiat ngai khawk ah, thu ka hun piak gual ua, la khut ua sep la guatna ding un.

¹²Chutichun, pawlam ah mite mu in mêlpha’n la tiu in, bangma le tasam pua’n lau.

¹³Himaleh, suapite haw, kinepna him neilo mite gual ah la lungkham lona ding un, ipmute umdan la hetlo uh ka dawi puau hi.

¹⁴Jesu a thi hen, a thokit tai ti I taksan ua chun, zia gual ma chun, Jesu ah ipmute chu Pathian in ama tawh kiton in hun pui ngei in a.

¹⁵Zia hi Lalpa thu’n ka hil la hiu: eihaw Lalpa hung tiang ah hing ah um zingte hin, ipmusate chu makhel puai tiu, ti hi.

¹⁶Lalpa ngei chu thupiak kiko thawm tawh, vansawlchâk chungnungpen kona tawh, Pathian pengkul gi tawh, van ah kipat hung ding ahi ngal a: Chuleh, Khrista ging ah thi tate kha tho masa’n tiu in;

¹⁷ziazaw chuleh, ei haw hing ah umte hi, vanlai jawl ah khin Lalpa tuak dingin, amau tawh kigual in sûm chung ah lâk to in um hitiu: tichun, kumtuang in Lalpa kiang ah um tai tiu.

¹⁸Ziaziakchun, zia thute hin kithamuan tua chiat un.