Read Vaiphei 1 THESSALONITE 5 Bible Online

1 THESSALONITE 5 - Vaiphei bible

1 THESSALONITE 5

¹Himaleh, suapite haw, a hun leh ni ding thu ah chun zik piak la ngai puau hi.

²Lalpa ni chu jan ah gucha gual in hung tung ding ahi ti, chian tak in la he ngal ua.

³“Muanna leh bitna a um hi,” a ti lai tak un, numei nauvei gual in thakhat in manthaina a chung un hung tung intin, zia kipat chun suakcha pua’n au.

⁴Himaleh, suapite haw, nang uh vang zia ni chun gucha gual ah a hun huam dingin thim ah um la hi puau a.

⁵Vâk chate leh sun chate la hiu a; jan ah mi leh thim ah mi I hipuau hi.

⁶Ziaziakchun, midangte gual in ipmu puai tiu, hak zing in, ngaichâng tak in um zawi tiu.

⁷Ipmute chu jan ah ahi a i-mut sek uh; zukhamte le jan ah ahi a kham sek uh.

⁸Himaleh, ei uh vang chu sun ah mi I hiziak un, ginna leh hepina awmphaw chun kithuam in, hukdamna kinepna chu lukhuk ah mang in, ngaichâng tak in um hitiu.

⁹Pathian lungnatna thuak ding hilo in, I Lalpau Jesu Khrista ziak ah hukdamna mu dingin ei guat ahi zaw ngal a.

¹⁰Hak in, ipmu leu hingle, ama tawh I hin khawm theina ding un ama chu I thasâng un a thi tai.

¹¹Ziaziakchun, la hi’zing sek gual un, kitîlhat tua in kitungding tua chiat un.

¹²Suapite haw, la lak ua sêmgim leh Lalpa ah hun enkolte leh nang uh hun hilte chu, ja bawl dingin ka ni la hiu.

¹³A sepnau ziak ah hepi in, ngaisâng tau in. Kicham tak in um un.

¹⁴Chun, suapite haw, ka hun tîl la hiu, dan lo gual ah umte chu hil unla, lungkiate chu tilkhau unla, hatlote chu panpi unla, mi zosia lak in thuak-hat tau in.

¹⁵Kuama’n gitlo chu gitlo ma’n thuk ki’un; khat leh khat chung leh mi zosia chung in thilpha kihi piak tua un.

¹⁶Kipak zing un.

¹⁷Chawl lo in pauchap un.

¹⁸Bangkim in kipak thu gen zing un, zia chu nang mau lam ah Khrista Jesu jal ah Pathian lung lam ahi ngal a.

¹⁹Thagau chu sumit ki’un.

²⁰Jawlneite thute chu musit kiu in.

²¹Bangkim patep unla, a pha chu tudet tau in.

²²Thil phalo lam taphot ah kipat in kikoikâng un.

²³Chamna Pathian ngei chun la pum un hi’thiangtho ta hen; chuleh, la thagau uh leh, la lungthim uh leh, la taksau chu I Lalpa Jesu Khrista hung tiang ah thiangtho leh demna bei in um ta hen.

²⁴A hun ko’pa chu a ginum in, zia hi hun bawl ngei ding ahi.

²⁵Suapite haw, ei pauchap piak zing un.

²⁶Suapite zosia kha kichawp thiangtho in chibai ei bûk piak un.

²⁷Zia lekha hi a leng ua kiang ah la sim ding un Lalpa min in ka vaithâk la hiu.

²⁸I Lalpau Jesu Khrista hepina la kiang un um ta hen. Amen.