Read Vaiphei JOSHUA 13 Bible Online

JOSHUA 13 - Vaiphei bible

JOSHUA 13

¹Tu’hin Joshua chu a upa ta’n, têklam a manaw tai; chuleh, LALPA‘n a kiang in, “La upa ta’n, têk lam la manaw tai, gam lâk ding la a tam ma ma nalai ngâl a.

²Zia gamte hi a lâk nailote chu: Philistinte gam leh Geshurte gam zosia,

³(Aigupta gam ah sualam Shihor ah kipat mallam ah Ekron gamgi tiang in, zia chu Kanaan mite gam ah ngai ahi’n; Philistinte lal panga: Gaza, Ashdod, Ashkelon, Gath leh Ekron khuate hin a la um ua;) chuleh, mallam ah Avvim khuale a um in;

⁴Kanaan mite gam zosia leh Sidonte gam ah Mearah kipat Amorte gamgi Aphek tiang leh,

⁵Gebal mite gam leh sualam Lebanon gam zosia, Hermon tâng nuai ah Baal-gad ah kipat Lebo-hamath khua lutna tiang leh,

⁶Lebanon ah kipat Misrephoth-maim tiang ah tâng gam ah chêng zosia leh, Sidon mite zosia tiang in a huap ah. A bawn un Israelte ma-âng in hun nawdaw piak ding ka hi; thu ka hun piak gual in, Israelte a gam luana ding chiat uh la hawm ding ahi.

⁷Ziaziakchun, tu’hin zia gam hi nam kuate leh Manasseh nam a kimkhatte gochan dingin hop piak ta’n,” ti’n a hun gen a.

⁸Manasseh nam kimkhatte chun, Reubente leh Gadte tawh Jordan lui sualam pang ah, a gochan ding uh LALPA suak Mosi’n a piakna gam chu a chang tau a;

⁹Arnon lui pang, kênliang ah um Aroer khua kipat leh guam lai tak ah khawpi leh, Medeba phâijawl zosia Dibon tiang in;

¹⁰chuleh, Amorte lal Sihon, Heshbon ah vaihawmpa khawpi kipat Ammonte gamgi jul tiang in;

¹¹Gilead gam leh Geshurte leh Maakathte gamgi chin leh, Hermon tâng zosia leh, Bashan ah kipat Salekah khua tiang in;

¹²Ashtaroth leh Edrei khua vaihawm, Bashan ah Og lenggam zosia, (ama chu Rephaim suante lak ah a um sun ahi ta’n;) amau chu Mosi’n a la do ah, a la deldawsa a hiu a.

¹³Himaleh, Israelte’n Geshurte leh Maakathte chu vang a nawdok nai puau; Geshurte leh Maakathte chu tu’ni tiang hin Israelte lak in a chêngden tau a.

¹⁴Mosi’n Levite phung bep chu gochan ding gam a pepua’n; LALPA, Israelte Pathian kiang ah mei ah mipite thil latte chu amau go chan ding ahi ti a la gensa gual ah khan.

¹⁵Mosi’n a Inkuan dungzui un Reuben phung ah mite go luana dingin gam a la pe zo ta’n.

¹⁶A gamgiu chu Arnon luidung ah um Aroer khua kipat ah phâi guam lailung tak ah khawpi umte leh Medeba gam tângcham tawh

¹⁷Heshbon tawh a phâicham ah khawpi zosia tawh, Dibon, Bamoth-baal, Beth-baal-menom,

¹⁸Jahaz, Kedemoth, Mephaath,

¹⁹Kiriathaim, Sibmah leh phâicham ah tângjawl chung ah um Zereth-shahar,

²⁰Beth-peor leh Pisgah kênliang leh Beth-Jeshimoth leh,

²¹gam tângcham chung ah khawpi zosia leh Amorte lengpa, Heshbon ah vaihawmpa Sihon tawh, Midiante milian haw Evi leh Rekem, Zur, Hur leh Reba leh Sihon lal chapate zosia a gam ah a la chêngsate Mosi’n a la do ah, a la zawsate ngen a hiu a.

²²Beor chapa Balaam, âisân thiampa chule Israelte’n midang a thalupteu lak ah chun chemjam in a that khawm tau a.

²³Chun, Reubente gamgi chu Jordan lui leh a kam tiang ahi. Zia chu Reubente gochan, a Inkuan dungzui ua a khawpiu leh a khawpelteu zosia chu ahi.

²⁴Mosi’n Gad phung ah mite chule a Inkuan dungzui chiat un a go chan ding uh gam a hop piak a.

²⁵A gam channau chu Jazer khua leh Gilead gam ah khawpite zosia tawh, Rabbah sualam ah Ammonte gam kimkhat ah kipat Aroer tiang leh,

²⁶Heshbon ah kipat Rammath-mizpeh leh Betonim tiang; chuleh, Mahanaim ah kipat Debirte gam tiang leh,

²⁷phâicham ah Beth-haram, Beth-nimrah, Sukkoth, Zaphon leh Heshbon ah lengpa Sihon lenggam zosia, Jordan lui leh a lui pang zosia leh Jordan lui gâl sualam pang ah Kinnereth Tuipi mallam mawng tiang a huap a.

²⁸Zia cheng chu Gad phung ah mite, a Inkuan dungzui chiat ua go ah a lua ding ua a piakna gam leh a khawpi leh a khawpelteu zosia chu a hiu a.

²⁹Mosi’n Manasseh phung kimkhatte kiang in gam a pia’n; zia mun chu Manasseh phung a kimkhatte luana dingin a Inkuan dungzui chiat un a hop piak a.

³⁰A gam chu Mahanaim ah kipat in Bashan gam zosia, Bashan gam ah Lengpa Og gam leh Bashan ah Jair khawpi tawh, khawpi sawmguk tawh,

³¹Gilead gam kimkhat leh Bashan gam ah leng Og gam ah Ashtaroth tawh Edrei khuate tawh, zia cheng hi a Inkuan dungzui un Manasseh chapa Makir Inkuante â dingin a pia’n, zia chu Makir Inkuan kimkhatte â ding ah kipia chu ahi.

³²Jeriko sualam Jordan lui gâl ah Moab phâicham ah Mosi’n go ah a lua ding ua a piakna munte chu ziate hi ahi.

³³Levi phung ah mite vang Mosi’n go ah a lua ding un gam a pia puai; LALPA, Israelte Pathian chu la gochan ding uh ahi, ti ah a kiang ua a la gensa dungzui in.