Read Vaiphei JOSHUA 14 Bible Online

JOSHUA 14 - Vaiphei bible

JOSHUA 14

¹Ziate hi Israelte’n Kanaan gam a laknau, thiampu Eleazar leh Nun chapa Joshua leh Israel Inkuan tin lak ah kipat luchangte’n a hoppiaknau chu ahi.

²LALPA‘n Mosi kiang ah thu a la piak gual in, nam pakua leh a kimkhatte kiang in âisân in gam chu a hawm piak a.

³Mosi’n, nam ni leh a kimkhatte chu Jordan lui gâl lam ah a luana ding uh a la pia ta ngâl a; Levite Inkuan gochan ding vang a pe puai.

⁴Joseph suante chu Manasseh leh Ephraim phungte ni a hiu a; chuleh, Levite chu a chênna ding uh khawpite leh, a ganchateu tatna ding tilo ngâl chu, go ah a lua ding un gam chu piak ahi puau a.

⁵LALPA‘n Mosi kiang ah thu a la piak gual ah khan, Israelte’n le a bawl tau a; gam chu a kihawm zo tau hi.

⁶Ziaphatchun, Judah Inkuante chu Gilgal mun ah Joshua kiang in a vachiau ah; Keniz Inkuan ah mi, Jephuneh chapa Kaleb chun a kiang in, “Kadesh-barnea ah Pathian mi Mosi kiang ah khan LALPA‘n keima leh nangma chung thu ding a gen kha la henai.

⁷LALPA suak Mosi’n Kadesh-barnea mun ah kipat gam entha ding ah ei sawl lai khan, kum sawmli mi ka la hi’n; chuleh, a kiang in thu a dik tak ka la tut kit a.

⁸Ahi’n la, ka lawite, ka chia khawmpite khan mipite ahi lungthuai tau ah; keima’n vang ka lunggil zosia’n LALPA ka Pathian chu ka zui a.

⁹Zia ni chun Mosi’n, ‘LALPA la Pathian chu la lungthim zosia la zui ziakin, la keng ah la chawtna gam taphot chu nang leh la suante kiang ah kumtuang ah la gochan ding un hun pia ding ka hi,’ ti’n a la kitiam ta’ngâl a.

¹⁰Chun, tu’ni hin en in, LALPA‘n Mosi kiang ah zia thu a la gen ah kipat, Israelte gamthip ah a vâkvâi sung uh kum sawmli leh nga zet hi LALPA‘n damna ei pia nalai ah; tu’hin vang kum sawmgiat leh kum nga hial ka hung hita hi.

¹¹Mosi’n ei la sawl lai gual tho ah khan tu’hin le ka hat nalai ah; kidona ding hihenla, nasep thilbawl, chia suk chiato’na ding hileh, zia hun lai ah ka hatna gual ah khan tu’hin le ka hat zing nalai hi.

¹²Chutichun, LALPA‘n zia ni a la gensa, zia tak tâng gam ngei hi ei pia ta’n; zia ni khan Anakimte leh a khawpiu, kulpi detdo tak tak neite chênna gam ahi ti zia ni khan la he ta’ngâl ah; LALPA‘n ei umpi intin, amau chu deldok mai ding ka hi, LALPA‘n ei la gen piaksa ahi gual in,” ti’n a gen ta’n.

¹³Tichun, Joshua’n a maljawl ah, Hebron chu Jephuneh chapa Kaleb go chan dingin a pia tai.

¹⁴Chutichun, LALPA, Israelte Pathian chu a lunggil zosia a zui ziakin, tu’tiang hin Hebron khua chu Keniz mi, Jephuneh chapa Kaleb gochan a hung hiden tai.

¹⁵Masanglai in Hebron khua min chu Kiriath-arba a la hi’n; zia Arba chu Anakimte lak ah mi thupi pen a la hi. Chun, a gam chu gâl muang in a um tai.