Read Vaiphei JOSHUA 17 Bible Online

JOSHUA 17 - Vaiphei bible

JOSHUA 17

¹Chun, Manasseh chu Joseph cha upa pen ahiziak in, amau phung ah mite’n a luana ding uh piak a hiu ah. Manasseh cha upa Makir, Gilead pa chu mi gâlhat ahiziak in, Gilead leh Bashan gamte chu piak a hiu a.

²Chuleh, Manasseh phung ah midangte zosia chan dingin, a Inkuan uh Abiezer, Helek, Asriel, Shekhem, Hepher leh Shemidate â ding le hop piak chiat a hiu a; zia cheng hi Joseph chapa Manasseh suante lak ah pawsalte chu a hiu a.

³Manasseh chapa Gilead chapa Hepher chapa Zelophehad in, chapa nei lo in chanu ngen a nei ah; a chanute min chu: Mahlah, Noah, Hoglah, Milkah leh Tirzah a hiu a.

⁴Amau cheng chu thiampu Eliezer leh Nun chapa Joshua leh upate ma âng in a hung un, a kiang un, “Ka unau pawsalte lak ah go chan ei pia ding in LALPA‘n Mosi kha thu a la pia ta ngâl ah,” ti’n a gen tau a. Tichun, LALPA thupiak dungzui in a pa chanaute lak in a gochan ding uh a pedok tai.

⁵Ziaziakchun, Jordan sualam gâl Gilead leh Bashan simlo in, Manasseh â dingin chan sawm piakbe a hiu;

⁶Manasseh chanute chunle a chapate chu tawh kigual ah gochan a nei ziak uh ahi. Manasseh chapa dangte cheng chu Gilead gam a chang tau a.

⁷Manasseh gamgi chu Asher tâng ah kipat in, Shekhem sualam ah Mikmethath tiang ahi’n; zia gamgi chu simlam ah kithung pek in, Entappuah mite chênna tiang in a kithung a.

⁸Tappuah gam chu Manassehte a chang un; himaleh, Manassehte gamgi chin ah a khawpiu Tappuah chu vang Ephraimte a chang ui.

⁹Gamgi chun Wadi Kanah luidung a zui suk a. Luidung simlam ah Manassehte khawpi lak ah khawpi umte chu Ephraimte chan ahi. Chuleh, Manassehte gamgi chu luidung mallam ah kithung pek in Tuipi tiang ahi.

¹⁰Zia gam simlam chu Ephraimte gam leh a mallam chu Manassehte gam ahi’n, Tuisuagiat chu a gamgiu ahi; mallam ah chun Asherte gamgi a sun ah, a sualam ah chun Issakharte gamgi tawh a kimat a.

¹¹Issakhar leh Asher gam sung ah chun Manasseh in Beth-shean leh a khawpelte, Ibleam leh a khawpelte, Dor leh a khawpelte, Endor leh a khawpelte, Taanakh leh a khawpelte leh Megiddo leh a khawpel ah chêng zosia (a pathumna hi Naphtali ahi’n) a nei un.

¹²Ahiziak in, Manasseh suante chun zia khawpi ah um zosia chu a nawdok ziang puau ah; Kanaan mite chule zia gam ah chun a chêng zing tho ui.

¹³Himaleh, Israelte a hung hat zawk deu phat un, Kanaan mite chu nawdok diak lo in, sum law ah nasem dingin a gawi tau hi.

¹⁴Joseph phung ah mite chun Joshua kiang in, “LALPA ei maljawlna dungzui in, mipi tam tak ka hung ting tau hi ti la mu zing sapi’nle, bang ding ah chan khat leh gam khat bep ei pia ziang la hem?” a tiu a.

¹⁵Joshua’n a kiang un, “Ephraim tânggam chu nanghaw â ding ah neu talua hial ah mipi tam la hi tâk uh chun, Perizte leh Rephaimte gam ah gammâng lak haw chu la umna ding uh vât thiang dingin kuan to tau in,” ti’n a dawnhu a.

¹⁶Joseph suante chun, “Tânggam chu kei uh â dingin a hun tawk puai; phâicham ah Kanaan mite, Beth-shean leh a khawpel ah chêng zosia tawh, Jezreel phâijawl ah chêng zosia chun thîk kângtalai a nei nalai sêt un,” a tiu a.

¹⁷Ziaphatchun, Joshua’n Joseph Inkuan Ephraim leh Manasseh suante kiang ah chun, “Ahi, nang uh hi la tam tau a, hat le la hat ua; chanvo khat bep doikhop pua’n lau,

¹⁸tâng gam zosia hi nanghaw chan ding hihen; gammâng himaleh vât thiang in, a gamgi jul tiang un la lua diu ahi; Kanaan mite chu bang gual ah hat in, thîk kângtalaite nei ziang maleu le nawdok tho tho ding la hiu,” ti’n a dawnhu tai.