Read Vaiphei JOSHUA 22 Bible Online

JOSHUA 22 - Vaiphei bible

JOSHUA 22

¹Chun, Joshua’n Reubente, Gadte leh Manasseh phung kimkhat ah mite zosia a ko khawm ah,

²a kiang un, “LALPA suak Mosi’n thu a hun piak zosia leh keima’n thu ka hun piak zosia la zawp tâk ziak un;

³tu’ni tiang ah la unauteu kilepsan lo ah, LALPA la Pathian uh thupiak la vopdet zaw tau a.

⁴Tichun, LALPA la Pathian un la kiang ua a la kitiam dungzui in, la unauteu chu a chawldamsak ta ahi; ziaziakchun, LALPA suak Mosi’n Jordan lui gâl lam ah la chanvo ding ua a hun piakna gam lam ah, la puanbûkteu kha zuan kit tau in;

⁵LALPA suak Mosi’n, LALPA la Pathian uh hepi ah, a lampi zosia haw in, la lunggil zosiau leh la thagau zosiau ah ginum tak ah a na sêm chiat dingin thu a hun piakte kha, zia thupiak leh a dan thuguatte chu chingthei tak in zawm phot mai un,” ti’n a gen a.

⁶Chutichun, amau chu Joshua’n maljawl in, a chiasak ta’n; tichun, a puanbûk lam un a chia kit tau hi.

⁷Manasseh phung ah mi a kimkhatte kha Mosi’n Bashan gam ah chanvo a la pia’n; ahi’n, a kimkhat dangte kiang in Joshua’n Jordan lui tumlam pang ah a unauteu kiang in chanvo a la pe zo tai. Chuleh, Joshua’n amau chu a maljawl ah, a puanbûk lam ua a sawl kit lai ah khan,

⁸a kiang un, “Nei leh lam, gan-gual leh dangka leh sana, sum-eng leh thîk, nîk leh puan tam tak tawh la puanbûk lam un chia kit unla; la mêlmateu lak ah kipat la gâllâkteu kha la unauteu kiang inle hawm dial dial un,” ti’n a gen a.

⁹Chutichun, Reuben, Gad leh Manasseh phung kimkhatte chu In lam in a chia kit tau a; Kanaan gam ah Shiloh khua Israelte kiang ah kipat in Gilead gam, LALPA‘n Mosi mang ah thu a la piak gual in, amau chanvo ding mawng ah guatsa gam ah chia kit dingin a pawtdok tau hi.

¹⁰Kanaan gam ah Jordan lui kiang ah Geliloth mun a hung tun phat un, Reubente, Gadte leh Manasseh phung kimkhatte chun Jordan lui gei ah chun mâichâm lianpi a bawl tau a.

¹¹Israelte chun Reubente, Gadte leh Manasseh phung kimkhatte chun Kanaan gam ah, Geliloth mun Jordan lui pang, Israelte gam lam kâi in mâichâm a siam ui ti a he tau a.

¹²Israel mipi zosia’n zia thu chu a hun hiat suak phat un, Israel mipi zosia chu amau do ah kuan dingin Shiloh mun in a kikhawm tau hi.

¹³Ziaphatchun, Israelte’n Eleazar chapa thiampu Phinehas chu Gilead gam ah Reubente, Gadte leh Manasseh phung kimkhatte kiang ah chun a sawl tau a;

¹⁴ama chu Israel phung sawmte lak ah kipat phung tin upa khat chiat kitêldok, upa sawmkhatte chu tawh a chia tau a.

¹⁵Gilead gam ah Reubente, Gadte leh Manasseh phung kimkhatte kiang a hung tun phat un, a kiang un,

¹⁶“LALPA mipite zosia chun, LALPA, Israelte Pathian kiheimangsan ah bang ding ah mâichâm chuam kisiam ah, tu’ni hin, zia gual ah thil phalo tak hi bawl la hiu em?

¹⁷Peor mun ah I la tatlêknau, tu’ni tiang ah le I kisil thian zaw tâk lo ziak ua, LALPA mipite lak ah hipi a tun khawlaw hial kha le hun tawk sa lo ah,

¹⁸tu’ni hin LALPA kiheimangsan gaw nalai la hiu maw! Tu’ni hin LALPA chung ah la hel uh chun, jing leh Israel mipi zosia chung in a lungna ngei ngei ding ahi.

¹⁹Ahi’n la, la luanau gam chu a thianglo ahi chun, LALPA gam sung, LALPA biakbûk umna lam ah hin hung gâl kâi unla, ka lak ua hin hung chêng zaw tau in; LALPA I Pathian â ding hilo mâichâm dang siam in, LALPA mitdo leh kei uh mitdo in vang um dâ ham un.

²⁰Zerah chapa Akan in thilbuak ah a ginna a la suksiat tâk ziak in, Israel mipi zosia chung ah lungnatna hung tung hilo a hem? Ama’n thil a la bawlkhial ziak in, ama bep in a thuak pua kha lam,” ti’n a vagen tau a.

²¹Ziaphatchun, Reubente, Gadte leh Manasseh phung a kimkhatte chun Israel nam lak ah upate chu zia gual hin a dawnhu tau a:

²²“LALPA, pathiante Pathian! LALPA, pathiante Pathian! Ama’n a henai; Israelte’n le he tau hen! LALPA kihei mangsan gua ah a chung ah ka hel ziak ua, zia mâichâm hi bawl ka hiu chun, tu’ni ma ma hin ei that gam ziang unla,

²³LALPA ka kiheimang sanna ding ua zia mâichâm hi bawl ka hiu ah, hâlmang thillatna ding leh, thâi thil latna ding a hem leh kichamna thil latna ding a hem ah ka bawl uh ahi ngei ngei chun, LALPA ma man ei thuk mai ta hen!

²⁴Himaijen lo e! Tu’nung leh la cha la nauteu in ka cha ka nauteu kiang in: ‘LALPA, Israelte Pathian tawh kimatna bang la nei ua a hem?

²⁵Nanghaw Reuben leh Gad suante leh kei uh kikâl ah gamgi dingin LALPA‘n Jordan lui hi a bawl hi; LALPA ah kipat in chanvo bangma la nei puau hi,’ hun ti kha’n au ti ka lau ziak ua, a ziak nei tak ah ka bawl uh ei vei: la suanteu in ka suanteu chu, LALPA a ho ding uh hun zada kha’n au ka tiu ah ahi.

²⁶Ziaziakchun, ‘mâichâm khat siam hitiu, hâlmang thillatna ding leh kithoina ding vang hilo in;

²⁷kei uh leh nang uh, I nung ua I suanteu kikâl ah kei unle LALPA kiang ah hâlmang thillat leh, kichamna thillatte a la bawl sek ka hiu, ti a het ua, tu’nung leh la suanteu in ka suanteu kiang ah, Nang hawn LALPA ah chanvo la nei puau, a tilo’na ding un hiatpitu hi dingin mâichâm bawl hitiu,’ ka tiu ah ka bawl uh ahi.

²⁸Tu’nung leh kei uh kiang a hem, ka suanteu kiang a hem ah zia gual thu chu a hun gen phat ua leh, kei un, ‘I pu leh pateu in LALPA mâichâm gual a la bawl uh, hâlmang thillatna ding leh kithoina ding hilo ah, nang uh leh kei uh kikâl ah hiatpitu ding ah kibawl hi en tau inla,’ ka titheina ding ua ka bawl uh ahi.

²⁹LALPA chung ah hel ah, LALPA kiheimangsan ah, LALPA ka Pathian uh mâichâm a biakbûk ah um tilo ngâl hâlmang thillatna ding leh, thâi thillatna ding a hem leh kithoina ding ah mâichâm dang siam gua ka hilo hial ui,” ti’n a dawnhu tau a.

³⁰Thiampu Phinehas leh a kiang ah um, mipite puitu, Israel Inkuan tin lak ah upate chun Reubente, Gadte leh Manasseh phung ah mite thugen chu a het phat un a lungkim ta ma mau a.

³¹Eleazar chapa thiampu Phinehas in, Reubente, Gadte leh Manassehte kiang ah chun, “Tu’ni hin zia thu hin LALPA chung ah thil phalo bawl ah a la bawlkhial lo la hiziak un, I lak un LALPA a um tak zet hi ti ka hiau; tu’hin, LALPA lungnatna khut ah kipat in Israelte chu la hukdok tau ahi,” a ti tai.

³²Tichun, Eleazar chapa thiampu Phinehas leh puitute chu, Reuben leh Gad suante kiang ah kipat in Kanaan gam ah Gilead gam, Israelte kiang lam in a kile’kit ua, thu chu a vatut kit tau a.

³³A thupuak uh chun Israelte a kipaksak ma ma ah; Israelte’n Pathian chawihoi in, Reuben leh Gad suante do ah, a chênnau gam vasuksiat piak ding chu a gen kha kit ta puau hi.

³⁴Chuleh, Reuben leh Gad suante chun, zia mâichâm chu, Ed a sak un. Amau in, “LALPA chu Pathian a hi ngei hi, ti I kikâl un hiatpitu ding ahi,” a ti ziak uh ahi.